အီတလီ – ဟန်ဂေရီ (မြန်မာစံတော်ချိန် ဇွန်လ ၈ ရက် နံနက် ၁း၁၅ နာရီ)
အီတလီအသင်းက အုပ်စုအဖွင့်ပွဲစဉ်မှာ ဂျာမနီအသင်းနဲ့ ကစားခဲ့ပြီး အိမ်ကွင်းမှာ သရေကစားခဲ့တယ်။ ပွဲစဉ်ရေးဆွဲပုံအရ နောက်ထပ်အိမ်ကွင်းပွဲစဉ်ဖြစ်ပြီး ပြိုင်ဘက်အသင်းကလည်း အီတလီအသင်းအတွက် တခြားပြိုင်ဘက်အသင်းနှစ်သင်းထက် ပိုလွယ်ကူတယ်လို့ ယူဆရတဲ့ ဟန်ဂေရီဖြစ်နေတယ်။ ဒီပွဲမှာသာ သရေထပ်ကျရင် အီတလီအတွက် အခြေအနေက ပိုခက်ခဲသွားနိုင်တယ်။ ဟန်ဂေရီကတော့ သရေဆိုရင် ကျေနပ်စရာပါ။ ဒါပေမဲ့ အီတလီဒီပွဲတော့ နိုင်အောင်ကစားပါလိမ့်မယ်။
ဂျာမနီ – အင်္ဂလန် (မြန်မာစံတော်ချိန် ဇွန်လ ၈ ရက် နံနက် ၁း၁၅ နာရီ)
ဂျာမနီနဲ့အင်္ဂလန်က အစဉ်အလာကြီးတဲ့ ပြိုင်ဘက်အသင်းတွေဖြစ်တယ်။ သမိုင်းတစ်လျှောက် ထိပ်တိုက်တွေ့ဆုံမှုပေါင်းများစွာမှာ ဂျာမနီအသင်းက တစ်ကြိမ်သာ နိုင်ပွဲပိုရထားပြီး အကြိတ်အနယ်ဖြစ်လေ့ရှိတဲ့ ပြိုင်ဘက်ကောင်းတွေဖြစ်တယ်။ အင်္ဂလန်က ဂျာမနီကို မြူးနစ်မှာ (၅)ဂိုးသွင်းခဲ့တဲ့ပွဲ၊ ဂျာမနီက ကမ္ဘာ့ဖလားမှာ အင်္ဂလန်ကို (၄) ဂိုးသွင်းတဲ့ပွဲတွေက အပြန်အလှန် နာကျည်းစရာပွဲတွေလို့ ပြောရမယ်။ နောက်ဆုံးကစားခဲ့တဲ့ပွဲကတော့ ပြီးခဲ့တဲ့ ယူရို-၂၀၂၀ တုန်းကဖြစ်ပြီး အင်္ဂလန်အသင်းက ဂျာမနီကို (၂-၀)ဂိုးနဲ့ အနိုင်ရရှိခဲ့တယ်။ Nations League အဖွင့်ပွဲတွေမှာ ဂျာမနီက သရေကျပြီး၊ အင်္ဂလန်က ရှုံးထားတယ်။ အုပ်စုဗိုလ်နေရာအတွက်ဆိုရင် သရေရလဒ်က နှစ်သင်းစလုံးအတွက် ကျေနပ်စရာမဟုတ်လို့ နိုင်ပွဲရှာကြလိမ့်မယ်။ ဂျာမနီ ရှုံးကြွေးဆပ်နိုင်မယ်ထင်တယ်။
ဖင်လန် – မွန်တီနီဂရိုး (မြန်မာစံတော်ချိန် ဇွန်လ ၇ ရက် ည ၁ဝး၃၀ နာရီ)
မွန်တီနီဂရိုးက လွန်ခဲ့တဲ့ (၅)နှစ်လောက်ကတော့ တော်တော်လေးအားကောင်းတဲ့ အသင်းဖြစ်ခဲ့တယ်။ ဒါပေမဲ့ အခုအချိန်မှာတော့ ဖင်လန်က ပိုကောင်းနေပါပြီ။ အိမ်ရှင်လည်းဖြစ်လို့ ဖင်လန်ကိုပဲ ကြိုက်တယ်။
ဘော့စနီးယား – ရိုမေးနီးယား (မြန်မာစံတော်ချိန် ဇွန်လ ၈ ရက် နံနက် ၁း၁၅ နာရီ)
ဘော့စနီးယားအသင်းက ဥရောပမှာ အဆိပ်ရှိတဲ့အသင်းတစ်သင်းဖြစ်ပြီး ကစားသမားကောင်းတွေလည်း ပိုင်ဆိုင်ထားတယ်။ ဒါပေမဲ့ ရိုမေးနီးယားအသင်းကလည်း မာကျောပြီး အနိုင် ယူဖို့ ခက်တဲ့အသင်းမျိုးပါ။ ဒီပွဲက ခြေသိပ်မကွာတဲ့အသင်းနှစ်သင်းရဲ့ ပွဲစဉ်ဖြစ်ပြီး အိမ်ရှင် ဘော့စနီးယားက အနည်းငယ်အားသာပေမဲ့ သရေကျဖို့များပါတယ်။
အခြားပွဲစဉ်များ
ဖာရိုးကျွန်းစုများ – လူဇင်ဘတ်
လစ်သူယေးနီးယား – တူရကီ
