အမှတ်ပေးဇယားက မလိမ်တတ်ဘူးတဲ့။ ဒီစကားက ထိပ်သီးအသင်းကြီးတွေ အချွတ်အချော်များတဲ့အခါ သုံးလေ့ရှိတဲ့စကားဖြစ်ပြီး အမှတ်ပေးဇယားရဲ့ ရှိသင့်တဲ့နေရာမှာ ရှိမနေတာဟာ ပြုပြင်ဖို့ လိုအပ်ချက်တွေ၊ အမှားအယွင်းတွေ ရှိနေကြောင်း ပြသတဲ့ သင်္ကေတလို့ အဓိပာယ်ရပါတယ်။ ဒါဆိုရင် အမှတ်ပေးဇယားမှာ ရှိသင့်တဲ့နေရာထက် ပိုမြင့်အောင် စွမ်းဆောင်ထားနိုင်တဲ့ အသင်းတွေအတွက်ကျတော့ကော။ ဒီဇင်ဘာ(၂၆) Boxing Day ပွဲစဉ်တွေအပြီးမှာ ပရီးမီးယားလိဂ်အမှတ်ပေးဇယားရဲ့ တတိယနေရာ ရောက်ရှိခဲ့ပါတယ်။ ထိပ်ဆုံးမှာကတော့ အာဆင်နယ်အသင်းပါ။ နှစ်သင်းစလုံးက ရှိသင့်တဲ့နေရာထက် ပိုမြင့်အောင် စွမ်းဆောင်ထားနိုင်ကြတာဖြစ်ပြီး အာဆင်နယ်အသင်းကိုတော့ ချီးမွမ်းခန်းအမျိုးမျိုး ဖွင့်ထားပြီးပါပြီ။ ပြီးတော့ အာဆင်နယ်ဆိုတာက ပရီးမီးယားလိဂ်ရဲ့ Big Six စာရင်းဝင် ချန်ပီယံဟောင်းဖြစ်တာကြောင့် လက်ရှိရောက်နေတဲ့နေရာကို ရှိသင့်တဲ့နေရာလို့ သတ်မှတ်လို့လည်း ရနိုင်ပါတယ်။ နယူးကာဆယ်ကတော့ ပရီးမီးယားလိဂ်ခေတ်ဦးပိုင်းတုန်းက ချန်ပီယံဆုကို စိန်ခေါ်နိုင်တဲ့ အမြင့်ဆုံးဒုတိယနေရာရရှိဖူးတဲ့ အသင်းတစ်သင်း ဖြစ်ခဲ့ဖူးရုံပဲ ရှိပါတယ်။ ပရီးမီးယားလိဂ်ခေတ်အတွင်း လိဂ်ချန်ပီယံရှစ်ကို နှစ်ကြိမ်တန်းဆင်းခဲ့ရပြီး ပရီးမီးယားလိဂ်ကို ပြန်ရောက်လာတာ (၆)ရာသီပဲ ရှိပါသေးတယ်။ ဒီလိုအသင်းအတွက်တော့ အမှတ်ပေးဇယား တတိယနေရာဆိုတာ ရှိသင့်တဲ့နေရာထက် အများကြီးပိုတယ်လို့ ဆိုရပါလိမ့်မယ်။
