အာဆင်နယ်နည်းပြ အာတီတာက တိုက်စစ်မှူး လာကာဇက်မှာ အသင်းအတွက် အရေးပါသည့်ကစားသမားဖြစ်ကြောင်း ပြောကြားခဲ့သည်။
အသက် (၃၀)နှစ်အရွယ်ရှိ ပြင်သစ်တိုက်စစ်မှူး လာကာဇက်သည် ယခုရာသီတွင် အာဆင်နယ်အသင်း၌ ပွဲကစားခွင့်နည်းပါးနေပြီး လာမည့်ဇန်နဝါရီအပြောင်းအရွှေ့ကာလတွင် အသင်းပြောင်းရွှေ့ဖွယ်ရှိသည်ဟု သတင်းများထွက်ပေါ်နေသည်။
သို့သော် အာတီတာက လာကာဇက်မှာ မိမိတို့အတွက် အရေးပါဆဲဖြစ်ပြီး အသင်းအောင်မြင်မှုများတွင် အဓိကနေရာမှ ပါဝင်မည်ဟု ပြောကြားခဲ့ခြင်းဖြစ်သည်။
အာတီတာက “အာဆင်နယ်အသင်းရဲ့ အနာဂတ်စီမံကိန်းတွေမှာ လာကာဇက် ပါဝင်ပါတယ်။ သူ့အနေနဲ့ ပွဲကစားချိန် နည်းပါးနေတာကြောင့် မီဒီယာတွေက အသင်းပြောင်းမယ်လို့ ဖော်ပြနေကြတာပါ။ ဒါပေမဲ့ လာကာဇက် ပြန်လာပါလိမ့်မယ်။ သူဟာ ကျွန်တော်တို့အတွက် အရေးပါတဲ့ ကစားသမားဖြစ်ပြီး အသင်းရဲ့အောင်မြင်မှုတွေမှာ အဓိကနေရာက ပါဝင်ပါလိမ့်မယ်”ဟု ပြောကြားခဲ့သည်။
လာကာဇက်သည် ယခုရာသီတွင် အာဆင်နယ်အသင်းအတွက် ပြိုင်ပွဲစုံ (၂)ပွဲတွင် (၁) ဂိုးသွင်းယူပေးထားသည်။
အာဆင်နယ်အသင်းနှင့် ချုပ်ဆိုထားသည့် လာကာဇက်၏ လက်ရှိစာချုပ်မှာ ၂၀၂၂ ဇွန်လ (၃၀)ရက်တွင် ကုန်ဆုံးမည်ဖြစ်ပြီး ၎င်းကို ခေါ်ယူရန် ဂျူဗင်တပ်စ်အသင်းက စိတ်ဝင်စားနေကြောင်း သိရသည်။
