ချယ်လ်ဆီးဝါရင့်နောက်ခံလူ သီယာဂိုဆေးလ်ဗားက PSG အသင်းတွင် အနာဂတ်လှုပ်ခတ်နေသည့် ဘရာဇီးလ်အသင်းဖော် နေမာအား ချယ်လ်ဆီးအသင်းသို့ လာရောက်ကစားရန် တိုက်တွန်းပြောကြားခဲ့သည်။
PSG အသင်းတာဝန်ရှိသူများသည် အသက် (၃၀)အရွယ်ရှိ ဘရာဇီးလ်တိုက်စစ်မှူး နေမာကို သဘောမကျဖြစ်နေပြီး ယခုနွေရာသီအပြောင်းအရွှေ့ကာလတွင် ရောင်းထုတ်ရန်စီစဉ်နေကြောင်း သတင်းများထွက်ပေါ်နေသည်။
PSG အသင်းတွင် အနာဂတ်လှုပ်ခတ်နေသည့် နေမာအားခေါ်ယူရန် ချယ်လ်ဆီး၊ ဂျူဗင်တပ်စ်နှင့် နယူးကာဆယ်အသင်းတို့က စိတ်ဝင်စားနေကြကြောင်း သိရသည်။
လက်ရှိတွင် မွေးရပ်မြေ ဘရာဇီးလ်တွင် အပန်းဖြေနေသည့် ချယ်လ်ဆီးနောက်ခံလူ သီယာဂိုဆေးလ်ဗားအား နေမာ၏အပြောင်းအရွှေ့နှင့် ပတ်သက်ပြီး ဒေသခံမီဒီယာတစ်ခုက မေးမြန်းခဲ့သည်။
၎င်းတို့၏မေးမြန်းမှုကို သီယာဂိုဆေးလ်ဗားက ” နေမာသာ ချယ်လ်ဆီးလာမယ်ဆိုရင် အကောင်းဆုံးဖြစ်လာမှာပါ။ သူနဲ့ ပတ်သက်လို့ မှတ်ချက်ပေးစရာမရှိပါဘူး။ ဒါပေမဲ့ သူ ချယ်လ်ဆီးကို လာဖို့တော့ ကျွန်တော် မျှော်လင့်တယ်”ဟု ပြောကြားခဲ့သည်။
PSG အသင်းသည် ကမ္ဘာ့စံချိန်တင်ပြောင်းရွှေ့ကြေး ပေါင် (၁၉၈)သန်းဖြင့် ခေါ်ယူခဲ့သည့် နေမာကို ပေါင်သန်း (၅၀) ဝန်းကျင်ဖြင့် ပြန်လည်ရောင်းချလိုနေသည်။
