မြန်မာ MMA ဖိုက်တာ အောင်လအန်ဆန်သည် ONE Championship နှင့် ချုပ်ဆိုထားသည့်စာချုပ်အရ လက်ကျန်ခုနစ်ပွဲထိုးသတ်ရန် ကျန်ရှိနေပြီး ယခုနှစ်အတွင်း ထိုးသတ်မည့် မစ်ဒယ်ဝိတ်တန်းစိန်ခေါ်ပွဲအတွက် စနစ်တကျ ပြင်ဆင်သွားမည်ဖြစ်ကြောင်း သိရသည်။
အောင်လအန်ဆန်သည် ၂၀၁၉ ခုနှစ် စက်တင်ဘာလအတွင်း ONE Championship နှင့် ၁၀ ပွဲထိုးသတ်ရန် စာချုပ်ချုပ်ဆိုခဲ့ ခြင်းဖြစ်သည်။
အောင်လအန်ဆန်သည် ONE Championship နှင့် ၁၀ ပွဲစာချုပ် ချုပ်ဆိုပြီးနောက် လက်ရှိအချိန်အထိ တစ်နှစ်ခွဲကျော်ကာလအတွင်း သုံးပွဲသာ ထိုးသတ်ထားရသေးကြောင်း သိရသည်။
ထို့ကြောင့် အောင်လအန်ဆန်အနေဖြင့် ONE Championship နှင့် ချုပ်ဆိုထားသည့်စာချုပ်အရ လက်ကျန်ခုနစ်ပွဲအထိ ထိုးသတ်ရန် ကျန်ရှိနေခြင်းဖြစ်သည်။
အောင်လအန်ဆန်သည် ONE Championship နှင့် ၁၀ ပွဲထိုးသတ်ရန် စာချုပ်ချုပ်ဆိုပြီးနောက် ၂၀၁၉ ခုနှစ် အောက်တိုဘာတွင် လိုက်ဟဲဗီးဝိတ်တန်း ချန်ပီယံကာကွယ်ပွဲအဖြစ် ဘရန်ဒန်ဗီရာနှင့် ထိုးသတ်ရာ အလဲထိုးဖြင့်အနိုင်ရခဲ့သည်။
ထို့နောက် ၂၀၂၀ ပြည့်နှစ် အောက်တိုဘာတွင် မစ်ဒယ်ဝိတ်တန်းချန်ပီယံကာကွယ်ပွဲအဖြစ် နယ်သာလန်နိုင်ငံသား ဒီရစ်ဒါနှင့်ယှဉ်ပြိုင်ထိုးသတ်ရာ Naked Choke ဖြင့် ပထမအချီမှာပင် ရှုံးနိမ့်ခဲ့ပြီး ချန်ပီယံခါးပတ် စွန့်လွှတ်ခဲ့ရသည်။
အောင်လအန်ဆန်သည် ယခုနှစ် ဧပြီတွင် လိုက်ဟဲဗီးဝိတ်တန်းချန်ပီယံကာကွယ်ပွဲအဖြစ် နယ်သာလန်နိုင်ငံသား ဒီရစ်ဒါနှင့်ပင် ပြန်လည်ထိုးသတ်ရာ ငါးချီပြည့်သည်အထိ ထိုးသတ်နိုင်သော်လည်း အမှတ်ဖြင့် ထပ်မံရှုံးနိမ့်သဖြင့် လိုက်ဟဲဗီးဝိတ်တန်းချန်ပီယံခါးပတ်ကိုပါ စွန့်လွှတ်ခဲ့ရသည်။
အောင်လအန်ဆန်သည် နောက်ဆုံးထိုးသတ်ခဲ့သည့် လိုက်ဟဲဗီးဝိတ်တန်းချန်ပီယံကာကွယ်ပွဲတွင် ဒီရစ်ဒါကို ရှုံးနိမ့်ပြီးနောက် မစ်ဒယ်ဝိတ်တန်းပွဲများကိုသာ ဆက်လက်ထိုး သတ်သွားမည်ဖြစ်ကြောင်းနှင့် ယခုနှစ်အတွင်းထိုးသတ်မည့် မစ်ဒယ်ဝိတ်တန်းစိန်ခေါ်ပွဲအတွက် စနစ်တကျပြင်ဆင်သွားမည်ဖြစ်ကြောင်း ပြောကြားခဲ့သည်။
”မစ်ဒယ်ဝိတ်တန်းပွဲတွေကိုပဲ ထိုးသတ်သွားမှာပါ။ ဒီနှစ်ထဲမှာ ထိုးသတ်ဖြစ်မှာပါ။ ဒီတစ်ကြိမ်မှာတော့ ကျွန်တော် စနစ်တကျနဲ့ သေချာပြင်ဆင်သွားမှာပါ။ လေ့ကျင့်မှုတွေကိုလည်း ပိုပြီးပြင်းပြင်းထန်ထန်လုပ်ဆောင်သွားမှာပါ”ဟု အောင်လ အန်ဆန်က ပြောကြားသည်။
အောင်လအန်ဆန်သည် လက်ရှိတွင် အသက် ၃၅ နှစ်ရှိနေပြီဖြစ်ပြီး ONE Championship နှင့် ချုပ်ဆိုထားသည့် စာချုပ်အရ လက်ကျန်ခုနစ်ပွဲစလုံး အပြည့်ထိုးသတ်မည်ဆိုပါက ၂၀၂၃ အထိ ရောက်ရှိသွားနိုင်သည်။
