နာမည်ကျော် အမေရိကန်စီးပွားရေးမဂ္ဂဇင်း ဖြစ်သည့် Forbes က ၂၀၂၂ ခုနှစ်အတွက် တန်ဖိုးအကြီးဆုံး အားကစားကလပ်အသင်း(၅၀)စာရင်းကို ထုတ်ပြန်ခဲ့ရာ ဘောလုံးကလပ်အသင်းများထဲတွင် ရီးယဲလ်အသင်းက ဦးဆောင်ခဲ့ပြီး ပရီးမီးယားလိဂ်ကလပ်အသင်းများထဲ၌ မန်ယူအသင်းက တန်ဖိုးအကြီးဆုံး နံပါတ်(၁)အသင်းဖြစ်ခဲ့ကြောင်း သိရသည်။
Forbes ၏ စာရင်း၌ တန်ဖိုးအကြီးဆုံးအားကစားအသင်းအဖြစ် ရပ်တည်နိုင်ခဲ့သည်မှာ NFL ကလပ် ဒဲလက်စ်ကောင်းဘွိုင်အသင်းဖြစ်ပြီး တန်ဖိုးပေါင်(၆.၈)ဘီလီယံတန်ကြေးရှိသည်ဟု သတ်မှတ်ခံရသည်။
တန်ဖိုးအကြီးဆုံးအားကစားကလပ်အသင်းစာရင်းတွင် အမေရိကန်အားကစားလောကမှ ကလပ်အသင်းများက အများဆုံးစိုးမိုးထားခဲ့ပြီး NFL အသင်းများက အများဆုံး၊ NBA အသင်းများက ဒုတိယအများဆုံးနှင့် MLB အသင်းများက တတိယအများ ဆုံးဖြစ်ခဲ့သည်။
သို့သော် မေဂျာလိဂ်ဘောလုံးအသင်းများမှာမူ တန်ဖိုးအကြီးဆုံး(၅၀)စာရင်းထဲ ပါဝင်ခြင်းမရှိခဲ့ပေ။
ယခုစာရင်း၌ ဥရောပဘောလုံးလောကမှ ကလပ်အသင်း(၈)သင်း သာပါဝင်ခဲ့ပြီး ပရီးမီးယားလိဂ်မှ (၄)သင်းဖြင့် အများဆုံးဖြစ်ခဲ့သည်။
ဥရောပကလပ်အသင်း(၈)သင်းမှာ ရီးယဲလ်၊ ဘာစီလိုနာ၊ မန်ယူ၊ လီဗာပူးလ်၊ ဘိုင်ယန်မြူးနစ်၊ မန်စီးတီး၊ PSG နှင့် ချယ်လ်ဆီးတို့ဖြစ်သည်။
မန်ယူအသင်းသည် နည်းပြ ဖာဂူဆန် အနားယူသွားပြီးနောက်ပိုင်း ကွင်းတွင်းအောင်မြင်မှုများ လျော့ကျလာခဲ့သော်လည်း ပရီးမီးယားလိဂ်၏ တန်ဖိုးအကြီးဆုံးအသင်းအဖြစ် ဆက်လက်ရပ်တည်နိုင်ခဲ့ခြင်းဖြစ်သည်။
Forbes က မန်ယူအသင်း၏ တန်ဖိုးကို ပေါင်(၃.၉)ဘီလီယံဟု သတ်မှတ်ပေးခဲ့သည်။
ထို့ကြောင့် တန်ဖိုးအကြီးဆုံးအားကစားကလပ်အသင်း(၅၀)စာရင်း၌ အဆင့်(၁၉)နေရာတွင် ရပ်တည်နိုင်ခဲ့ကြောင်းလည်း သိရသည်။
မန်ယူအသင်း၏ လက်ရှိအသင်းပိုင်ရှင်များဖြစ်သည့် ဂလေဇာမိသားစုသည် မန်ယူအသင်းကို ပြန်လည်ရောင်းထုတ်ရန် စီစဉ်လာပြီး ဒူဘိုင်းစော်ဘွားများ၏ စျေးစုံစမ်းမှုကို ပေါင်(၃.၇၅)ဘီလီယံဟု တုံ့ပြန်ခဲ့ကြောင်း ပြီးခဲ့သည့်ရက်ပိုင်းအတွင်းက သတင်းထွက်ခဲ့သည်။
ယခု Forbes ၏ တန်ဖိုးဖြတ်မှုမှာ ပေါင်(၃.၉)ဘီလီယံဖြစ်သောကြောင့် ဂလေဇာမိသားစု လိုချင်သည့်တန်ဖိုးထက်ပင် ပိုများနေကြောင်းလည်း သိရသည်။
ပြီးခဲ့သည့် နွေရာသီက ပိုင်ရှင်အပြောင်းအလဲဖြစ်ထားသော ချယ်လ်ဆီးအသင်းမှာ တန်ဖိုးအကြီးဆုံးအားကစားကလပ်အသင်း(၅၀)စာရင်းတွင် အဆင့်(၅၀)နေရာ၌ ပေါင်(၂.၆၇)ဘီလီယံဖြင့် ရပ်တည်ခဲ့ခြင်းဖြစ်သည်။
ချယ်လ်ဆီးအသင်း၏ အရောင်းအဝယ်ကို ပေါင်(၄.၂၅)ဘီလီယံဟု ဖော်ပြခဲ့ကြသော်လည်း ပိုင်ရှင်သစ်အနေဖြင့် အသင်းတွင် ရင်းနှီးမြှုပ်နှံရမည့် ငွေကြေးပမာဏကိုပါ ထည့်တွက်ထားခြင်းဖြစ်ပြီး ပေးချေခဲ့ရသည့် အရောင်းအဝယ်တန်ဖိုးမှာ ပေါင်(၂.၅)ဘီလီယံဖြစ်ကြောင်း သိရသည်။
ယခုစာရင်း၌ ဥရောပထိပ်သီးလိဂ်(၅)ခုအနက် ပရီိးမီးယားလိဂ်၊ လာလီဂါ၊ ဘွန်ဒစ်လီဂါနှင့် ပြင်သစ်လိဂ်တို့မှ အသင်းများ ပါဝင်ခဲ့သော်လည်း စီးရီးအေတစ်သင်းမျှ ပါဝင်ခြင်းမရှိသည်မှာလည်း ထူးခြားမှုဖြစ်ခဲ့သည်။
