COVID-19 ရောဂါဖြစ်ပွားမှုကြောင့် ယခုရာသီ စတုတ္ထမြောက် ပရီးမီးယားလိဂ်ပွဲစဉ် ရွှေ့ဆိုင်းရမှုအဖြစ် ယနေ့ ယှဉ်ပြိုင်ကစားမည့် ဘန်လေ-ဖူလ်ဟမ်ပွဲကို ထပ်မံရွှေ့ဆိုင်းခဲ့ရကြောင်း သိရသည်။
ယင်းပွဲစဉ်ကို မြန်မာစံတော်ချိန် ညနေ ၆ နာရီခွဲ (ဗြိတိန်စံတော်ချိန် နေ့လယ် ၁၂ နာရီ) တွင် ယှဉ်ပြိုင်ကစားရန် စီစဉ်ထားသော်လည်း ဖူလ်ဟမ်အသင်း၌ Positive တွေ့ရှိသူ ထပ်တိုးလာသဖြင့် ပရီးမီးယားလိဂ်ဘုတ်အဖွဲ့ အစည်းအဝေးပြုလုပ် ပြီးနောက် ပွဲရွှေ့ဆိုင်းကြောင်း မနေ့ညက ထုတ်ပြန်ကြေညာခဲ့ခြင်းဖြစ်သည်။
ဖူလ်ဟမ်အသင်းသည် COVID-19 ရောဂါကြောင့် ပြီးခဲ့သည့်ဗုဒ္ဓဟူးနေ့က စပါးအသင်း နှင့် အဝေးကွင်းပွဲစဉ်ကို ရွှေ့ဆိုင်းခဲ့ရပြီးနောက် တနင်္ဂနွေနေ့တွင် ဘန်လေအသင်းနှင့်ကစားမည့် အဝေးကွင်းပွဲကိုပါ ထပ်မံရွှေ့ဆိုင်းခဲ့ရခြင်း ဖြစ်သည်။ ဖူလ်ဟမ်အသင်း ကစားသမားများနှင့် ဝန်ထမ်းများကို စစ်ဆေးထပ်မံပြုလုပ်ခဲ့ပြီး စနေနေ့ နံနက်ပိုင်းတွင် ရလဒ်ထုတ်ပြန်ရာ Positive တွေ့ရှိမှု ထပ်တိုးလာသဖြင့် ရွှေ့ဆိုင်းရခြင်းဖြစ်ကြောင်း သိရသည်။
” နောက်ဆုံးအကြိမ်ပြုလုပ်ထားတဲ့ COVID-19 စစ်ဆေးမှု အရ Positive တွေ့ရှိမှု ထပ်တိုးလာတာကြောင့် အသင်းဆေးအဖွဲ့နဲ့ ပရီးမီးယားလိဂ်တို့ ဆွေးနွေးညှိနှိုင်းပြီး တနင်္ဂနွေနေ့မှာ ဘန်လေနဲ့ကစားမယ့် အဝေးကွင်းပွဲစဉ်ကို ရွှေ့ဆိုင်းခဲ့တာဖြစ်ပါတယ်။ Positive တွေ့ရှိသူတွေအနေနဲ့ ဗြိတိန်အစိုးရနဲ့ ပရီးမီးယားလိဂ်ရဲ့ လမ်းညွှန်ချက်အတိုင်း သီးခြားခွဲပြီး နေထိုင်လျက်ရှိပါတယ်။ အသင်းရဲ့ကစားသမားတွေ၊ ဝန်ထမ်းတွေနဲ့ သူတို့မိသားစုဝင်တွေက ထိပ်တန်းဦးစားပေးရမယ့်အရာတွေအဖြစ် ဆက်ရှိနေမှာပါ။ Positive တွေ့ရှိသူတွေအနေနဲ့ ဘေးကင်းပြီး လျင်မြန်စွာ သက်သာလာစေဖို့လည်း ဆန္ဒပြုပါတယ်” ဟု ဖူလ်ဟမ်အသင်း က ထုတ်ပြန်ခဲ့သည်။
ဘန်လေ-ဖူလ်ဟမ်ပွဲမှာ ယခုရာသီ ပရီးမီးယားလိဂ်ပြိုင်ပွဲတွင် COVID-19 ပြဿနာကြောင့် ရွှေ့ ဆိုင်းရသည့် စတုတ္ထမြောက်ပွဲဖြစ်လာပြီး ဒီဇင်ဘာ ၁ ရက်က နယူးကာဆယ်-ဗီလာ၊ ဒီဇင်ဘာ ၂၈ ရက်က အဲဗာတန်-မန်စီးတီးနှင့် ဒီဇင်ဘာ ၃၀ ရက်က စပါး-ဖူလ်ဟမ်ပွဲတို့ကိုလည်း ရွှေ့ဆိုင်းထားရပြီးဖြစ်သည်။ ယင်းကဲ့သို့ ပွဲရွှေ့ဆိုင်းရမှုပိုများလာသော်လည်း ပြိုင်ပွဲအား ရပ်နားမည် မဟုတ်ဘဲ မူလရေးဆွဲထားသည့်အတိုင်း ဆက်လက်ကျင်းပမည်ဖြစ်ကြောင်း၊ ကလပ်အသင်းများတွင် Positive တွေ့ရှိမှု အရေအတွက်မှာ နည်းပါးသေးပြီး အစိုးရ၏ထောက်ခံ မှုဖြင့် COVID-19 လုပ်ထုံးလုပ်နည်းများအတိုင်း ဆက်လက်ကျင်းပနိုင်မည်ဟု ယုံကြည်ကြောင်း ပရီးမီးယားလိဂ်ကထုတ်ပြန်ကြေညာခဲ့သည်။
“ယနေ့ နံနက်ပိုင်းတွင် ပရီးမီးယားလိဂ်ဘုတ်အဖွဲ့ အစည်းအဝေး ပြုလုပ်ခဲ့ပြီး ဇန်နဝါရီ ၃ ရက်၊ တနင်္ဂနွေနေ့ နေ့လယ် ၁၂ နာရီကစားမယ့် ဘန်လေ-ဖူလ်ဟမ်ပွဲကို ရွှေ့ဆိုင်းလိုက်ပါပြီ။ ဗုဒ္ဓဟူးနေ့က တော့တင်ဟမ်ဟော့စပါးနဲ့ပွဲ ရွှေ့ဆိုင်းရပြီး နောက်မှာ ဖူလ်ဟမ်အသင်း ကစားသမားနဲ့ ဝန်ထမ်းတွေကို ဆေးစစ်မှု ချက်ချင်းပြုလုပ်ခဲ့ပြီး ယနေ့ နံနက်ထုတ်ပြန်မှုအရ COVID-19 Positive တွေ့ရှိမှု ထပ်တိုးလာကြောင်း သိရှိရပါတယ်။ ဘန်လေနဲ့ပွဲစဉ်ကို ပြောင်းလဲပေးဖို့ ဖူလ်ဟမ်အသင်းရဲ့ တောင်းဆိုမှုအရ ပရီးမီးယားလိဂ် ဘုတ်အဖွဲ့အနေဖြင့် လွတ်လပ်သော ဆေးဘက်ဆိုင်ရာ အကြံပေးမှုရယူရာ ၎င်းတို့အသင်းမှာ ရောဂါကူးစက် ပြန့်ပွားမှု ဖြစ်နိုင်ခြေရှိတာကြောင့် ရွှေ့ဆိုင်းဖို့ ဆုံးဖြတ်လိုက်တာဖြစ်ပါတယ်။ ကစားသမားတွေနဲ့ ဝန်ထမ်းတွေရဲ့ ကျန်းမာရေးကို ဦးစားပေး ရမှာဖြစ်ပြီး ရောဂါကူးစက်ပြန့်ပွားမှု ထိန်းချုပ်ဖို့ ဆောင်ရွက်ရေး၊ ဘေးကင်းလုံခြုံစွာ ပြန်လည်ယှဉ်ပြိုင်နိုင်ရေး၊ ကစားသမားနဲ့ ဝန်ထမ်းတွေကို ပြန်လည်စစ်ဆေးမှု ပြုလုပ်ရေးအတွက် ပရီးမီးယားလိဂ်နဲ့ ဖူလ်ဟမ် အသင်းတို့ သဘောတူထားပါတယ်။ ကလပ်အသင်းအများစုမှာ Positive တွေ့ရှိမှုပမာဏ နည်းပါးသေးတာကြောင့် အစိုးရရဲ့ ထောက်ခံမှု အပြည့်နဲ့ COVID-19 လုပ်ထုံး လုပ်နည်းတွေအတိုင်း ပွဲစဉ်တွေကို ရေးဆွဲထားတဲ့အတိုင်း ဆက်လက်ကျင်းပနိုင်မယ်လို့ ယုံကြည်ပါတယ်။ ဖူလ်ဟမ်အသင်းရဲ့ ရွှေ့ဆိုင်းထားတဲ့ ပွဲစဉ်နှစ်ပွဲကိုလည်း အမြန်ဆုံးကစား နိုင်ဖို့ စီစဉ်သွားမှာပါ” ဟု ပရီးမီးယားလိဂ်က ထုတ်ပြန်ခဲ့သည်။
