COVID-19 ကပ်ရောဂါဖြစ် ပွားသည့် တစ်နှစ်တာကာလအတွင်း လာလီဂါနှင့် ဆီဂန်ဒါ စပိန်ထိပ်သီး လိဂ်ပြိုင်ပွဲနှစ်ခု၏ ဆုံးရှုံးမှုပမာဏမှာ ယူရိုတစ်ဘီလီယံကျော်အထိရှိကြောင်း သိရသည်။
ယင်းစစ်တမ်းကို လန်ဒန်အခြေ စိုက် PricewaterhouseCoopres စာရင်းအင်းကုမ္ပဏီက လေ့လာသုံးသပ်၍ ထုတ်ပြန်ခဲ့ခြင်းဖြစ်ပြီး စပိန်နိုင်ငံထုတ် EL Mundo Deportvo သတင်းစာက ဖော်ပြခဲ့သည်။ COVID-19 ကပ် ရောဂါဖြစ်ပွားမှုကြောင့် ပြီးခဲ့သည့် နှစ် မတ်လမှ မေလအထိ ဘောလုံး ပွဲများ ခေတ္တရပ်နားခဲ့ရသလို ယခုအချိန်အထိ ပရိသတ်များ ပြန်လည် ကြည့်ရှုခွင့်မရဘဲ ကွင်းပိတ်ကစား နေရဆဲဖြစ်သည်။ သို့ဖြစ်ရာ လာလီဂါနှင့် ဆီဂန်ဒါကလပ်အသင်းများ၏ ဆုံးရှုံးမှုပမာဏမှာ အနည်းဆုံး ယူရို ၈၂၅ သန်းမှ အများဆုံး ယူရို ၁ ဒသမ ၀၂၉ သန်းအထိ ရှိလာနိုင်ကြောင်း PricewaterhouseCoopres စစ်တမ်းက ဖော်ပြခဲ့ခြင်းဖြစ်သည်။
ကလပ်အသင်းများအနေဖြင့် ကပ်ရောဂါကာလအတွင်း ဝင်ငွေလျော့နည်းမှု ကာမိစေရန်အတွက် လစာလျှော့ချခြင်း၊ ပေးချေမှုရွှေ့ ဆိုင်းခြင်း၊ ကစားသမားခေါ်ယူမှုကို အကန့်အသတ်ဖြင့်သာ ပြုလုပ်ခြင်း၊ ကစားသမားရောင်းချမှုမှ ဝင်ငွေ ရှာဖွေခြင်း စသည့်နည်းလမ်းမျိုးစုံ ဖြင့် ကြိုးစားလျက်ရှိသည်။ သို့သော် ပြီးခဲ့သည့်ရာသီ လက်ကျန်ကာလနှင့် ယခုရာသီအတွက် ကလပ်အသင်း များ၏ ဝင်ငွေရရှိမှုမှာ ယူရိုနှစ်ဘီလျံ အထိ လျော့နည်းသွားကြောင်း သိရသည်။
၂၀၁၉-၂၀၂၀ ရာသီ လက် ကျန်ကာလတွင် ယူရို ၃၆၆ သန်းနှင့် ၂၀၂၀-၂၀၂၁ ရာသီတွင် ယူရို ၁ ဒသမ ၆၄၇ ဘီလျံ လျော့နည်းသွား ရာ နှစ်ရာသီအတွင်း ဝင်ငွေရရှိမှုစုစု ပေါင်း ယူရို ၂ ဒသမ ၀၁၃ ဘီလျံ လျော့နည်းသွားခြင်းဖြစ်သည်။ ကပ် ရောဂါ၏ အကျိုးသက်ရောက်မှု အဖြစ် အပြောင်းအရွှေ့ကာလတွင် စပိန်ကလပ်အသင်းများ၏ ငွေကြေး သုံးစွဲမှုပမာဏမှာ သိသိသာသာ လျော့နည်းသွားပြီး ၂၀၁၉-၂၀၂၀ ရာသီတွင် ယူရို ၁၉၁ သန်းနှင့် ၂၀၂၀ -၂၀၂၁ ရာသီတွင် ယူရို ၅၅၇ သန်း သာ အသုံးပြုခဲ့ကြောင်း သိရသည်။
ထို့ပြင် ကမ္ဘာ့ဘောလုံးအဖွဲ့ ချုပ် (FIFA) က တရားဝင်ထုတ်ပြန်ထားသည့် စာရင်းဇယားများအရ ပြီးခဲ့သည့် ဇန်နဝါရီအပြောင်းအရွှေ့ ကာလတွင် စပိန်လိဂ်ပြိုင်ပွဲ၏ အသုံး စရိတ်စုစုပေါင်းမှာ ဒေါ်လာ ၁၉ ဒသမ ၃ သန်း (ယူရို ၁၅ ဒသမ ၉၈ သန်း) သာရှိပြီး ဥရောပလိဂ်ပြိုင်ပွဲ များအနက် အဆင့် ၈ နေရာ ရပ် တည်ခဲ့ကြောင်း သိရသည်။ စပိန် လိဂ်၏ ကစားသမားခေါ်ယူမှုအရေ အတွက်မှာ ၁၄၅ ဦးရှိပြီး ခေါ်ယူမှု အများဆုံးလိဂ်ပြိုင်ပွဲအဖြစ် ရပ်တည် ခဲ့သော်လည်း ပြောင်းရွှေ့ကြေးဖြင့် ခေါ်ယူမှု အလွန်နည်းပါးကာ အငှား သို့မဟုတ် အလွတ်ခေါ်ယူမှုသာ အများဆုံး ပြုလုပ်ခဲ့ခြင်းဖြစ်သည်။
FIFA ၏ ထုတ်ပြန်မှုအရ ဇန်နဝါရီ ကာလတွင် ငွေကြေးသုံးစွဲမှုအများ ဆုံးအဖြစ် အင်္ဂလန်လိဂ်ပြိုင်ပွဲက ဒေါ်လာ ၁၃၀ ဒသမ ၅ သန်းဖြင့် ဆက်လက်ဦးဆောင်နိုင်ခဲ့ပြီး အီ တလီက ဒေါ်လာ ၁၀၆ ဒသမ ၄ သန်းဖြင့် ဒုတိယ၊ ဂျာမနီက ဒေါ်လာ ၆၈ ဒသမ ၇ သန်းဖြင့် တတိယ၊ ပြင် သစ်က ဒေါ်လာ ၅၈ ဒသမ ၅ သန်း ဖြင့် စတုတ္ထ၊ နယ်သာလန်က ဒေါ်လာ ၃၅ ဒသမ ၅ သန်းဖြင့် ပဥ္စမ၊ သြစတြီး ယားက ဒေါ်လာ ၂၄ ဒသမ ၂ သန်း ဖြင့် အဆင့် ၆ နှင့် ဘယ်လ်ဂျီယံက ဒေါ်လာ ၂၃ ဒသမ ၅ သန်းဖြင့် အဆင့် ၇ နေရာ ရပ်တည်ခဲ့ကြောင်း သိရသည်။
လာလီဂါပြိုင်ပွဲဥက္ကဋ္ဌ ဟာဗီယာတီဘက်စ်ကလည်း ပရိသတ်မပါ ဘဲ ကွင်းပိတ်ကစားနေရသဖြင့် ပြက္ခ ဒိန်တစ်နှစ်အတွင်း လာလီဂါနှင့် ဆီဂန်ဒါကလပ်အသင်းများ၏ ကွင်း ဝင်ကြေးဆုံးရှုံးမှုပမာဏမှာ ယူရို သန်း ၇၀၀ မှ ၈၀၀ အကြားရှိနိုင် ကြောင်း ခန့်မှန်းထားသည်။
