COVID-19 အန္တရာယ်စိုးရိမ်ရသဖြင့် ချက်-စကော့တလန် UEFA Nations League ပွဲစဉ်ကို ရွှေ့ဆိုင်းမည်ဖြစ်ကြောင်း ချက်အသင်းက သောကြာနေ့တွင် အတည်ပြုကြေညာခဲ့သည်။
ချက်အသင်း ကစားသမားနှစ်ဦးဖြစ်သည့် ဝက်စ်ဟမ်းကွင်းလယ်လူ ဆိုချုခ်နှင့် ရိုးမားတိုက်စစ်ကစားသမား ပက်ထရစ်ရှစ်သည် COVID-19 တွေ့ရှိသည့် နည်းပြအဖွဲ့ဝင်နှင့် ထိတွေ့မှုရှိခဲ့ကြောင်း သိရသည်။
ထို့ကြောင့် ၎င်းတို့နှစ်ဦးစလုံးသည် ဆလိုဗက်ကီးယားအသင်းအား (၃-၁)ဂိုးဖြင့် အနိုင်ရသည့် အဝေးကွင်းပွဲစဉ်ကို လွဲချော်ခဲ့သည်။
ချက်အသင်းသည် ဆလိုဗက်ကီးယားနှင့် သွားရောက်ယှဉ်ပြိုင်ရန် (၂၄)နာရီရွှေ့ဆိုင်းခဲ့သလို တနင်္လာနေ့တွင်ကစားမည့် စကော့တလန်အသင်းနှင့် အိမ်ကွင်းပွဲကိုလည်း ရွှေ့ဆိုင်းရန် ဆုံးဖြတ်ခဲ့ခြင်းဖြစ်သည်။
ယင်းပွဲ ပြန်ကစားမည့်အချိန်ကို ဥရောပဘောလုံးအဖွဲ့ချုပ်(UEFA) က ထုတ်ပြန်ကြေညာမည်ဖြစ်ကြောင်း သိရသည်။
ထို့ပြင် ချက်အသင်းသည် စကော့တလန်နှင့်ယှဉ်ပြိုင်မည့်ပွဲစဉ်အတွက် လက်ရှိရွေးချယ်ထားသည့် ကစားသမားများကို အသုံးပြုမည်မဟုတ်ဘဲ ကစားသမားသစ်များ ပြန်လည်ခေါ်ယူသွားမည်ဖြစ်ကြောင်းလည်း သိရသည်။
