လီဗာပူးလ်အသင်း၏ တိုက်စစ်မှူး ဆာလာက ကမ္ဘာ့အကောင်းဆုံးဘောလုံးသမားဆု (Ballon d’Or)ကို ဂျော့ချ်ဝီယာ နောက်ပိုင်း ပထမဆုံးရယူနိုင်သည့် အာဖရိကကစားသမားဖြစ်လိုသည်ဟု ဖွင့်ဟဝန်ခံခဲ့သည်။
Ballon d’Or ဆုကို ပြင်သစ်ဘောလုံးမဂ္ဂဇင်းက ၁၉၅၆ ခုနှစ်တွင် စတင်ချီးမြှင့်ခဲ့ပြီး စုစုပေါင်း(၆၅)ကြိမ်တွင် အာဖရိကကစားသမားများထဲမှ လိုက်ဘေးရီးယားတိုက်စစ်မှူး ဂျော့ချ်ဝီယာတစ်ဦးတည်းသာ ရရှိခဲ့ဖူးသည်။
ဂျော့ချ်ဝီယာသည် ၁၉၉၅ ခုနှစ်တွင် PSG အသင်းမှ အေစီမီလန်အသင်းသို့ ပြောင်းရွှေ့ကစားပြီး Ballon d’Or ဆု ရရှိခဲ့ခြင်းဖြစ်သည်။
Ballon d’Or ဆုကို ယင်းမတိုင်မီက ဥရောပကစားသမားများထဲမှသာ ရွေးချယ်ချီးမြှင့်ခဲ့ခြင်းဖြစ်ပြီး ဥရောပရောက် ကစားသမားအားလုံးအတွက် အကျုံးဝင်သောဆုအဖြစ် စည်းမျဉ်းပြောင်းလဲလိုက်သည့် ပထမဆုံးနှစ်တွင်ပင် ဂျော့ချ်ဝီယာက ဆွတ်ခူးနိုင်ခဲ့ခြင်းလည်းဖြစ်သည်။
နောက်ပိုင်းတွင် တောင်အမေရိကကစားသမားများ ရယူနိုင်ခဲ့သော်လည်း အာဖရိကကစားသမားများထဲမှ ရယူနိုင်ခြင်းမရှိတော့ပေ။
ယခုအခါ အီဂျစ်တိုက်စစ်မှူး ဆာလာသည် လီဗာပူးလ်အသင်းတွင် ခြေစွမ်းပြကစားပြီး ကမ္ဘာ့အဆင့်ထိပ်တန်းကစားသမားတစ်ဦးအဖြစ် ရပ်တည်လာနိုင်ရုံသာမက တစ်ဦးချင်းထူးချွန်ဆုများစွာလည်း ရယူလာနိုင်သည့်အတွက် Ballon d’Or ဆုကို မျှော်လင့်လာခြင်းလည်းဖြစ်သည်။
ပြင်သစ်သတင်းစာ L’Equipe နှင့်တွေ့ဆုံရာတွင် ဆာလာက ”ဒီဆုကို ၁၉၉၅ ခုနှစ်က ရယူဖူးတဲ့ တစ်ဦးတည်းသော အာဖရိကကစားသမား ဂျော့ချ်ဝီယာနဲ့အတူ Ballon d’Or ဆု ရယူနိုင်သူဖြစ်ချင်ပါတယ်”ဟု ဆာလာက ပြောကြားခဲ့သည်။
ဆာလာသည် ၂၀၂၁-၂၂ ရာသီအတွက် အင်္ဂလန်ဘောလုံးလောကမှ ချီးမြှင့်သည့် တစ်ဦးချင်းအကောင်းဆုံးဆုများစွာ ရရှိထားခြင်းကြောင့် Ballon d’Or ဆုကို မျှော်လင့်နိုင်စွမ်းရှိနေသော်လည်း ရီးယဲလ်တိုက်စစ်မှူး ဘန်ဇီမာက (၁-၉)လေး ဖြင့် ပိုမိုရေပန်းစားနေပြီး ဆာလာက (၁၀-၁)လေးဖြင့် ဒုတိယနေရာတွင် ရှိနေကြောင်း သိရသည်။
ဆာလာသည် ပြီးခဲ့သည့်နှစ်က Ballon d’Or ဆုအတွက် အဆင့်(၇)သာ ရရှိခဲ့ခြင်းကိုလည်း မယုံနိုင်အောင်ဖြစ်ခဲ့မိကြောင်း ပြောကြားခဲ့သည်။
”၂၀၂၁ မှာ ကျွန်တော့်အဆင့် (၇)ဆိုတော့ အံ့အားသင့်သွားတာအမှန်ပါပဲ။ ဒီထက် ပိုမြင့်တဲ့အဆင့်ကို ရရှိလိမ့်မယ်လို့ ထင်ထားခဲ့တာပါ”ဟု ဆာလာက ပြောကြားခဲ့သည်။
