ပြင်သစ်ဘောလုံးမဂ္ဂဇင်း(France Football) က နှစ်စဉ်ချီးမြှင့်နေသည့် Ballon d’Or ဆုကို ယခုနှစ်တွင် ကိုရိုနာဗိုင်းရပ်စ်ကပ်ဘေးကြောင့် ချီးမြှင့်မည်မဟုတ်ကြောင်း အတည်ပြုကြေညာခဲ့ပြီးနောက် ဂျာမန်မီဒီယာများက ဝေဖန်ပြစ်တင်မှုများ ပြုလုပ်ခဲ့ကြကြောင်း သိရသည်။
ပြင်သစ်ဘောလုံးမဂ္ဂဇင်းသည် Ballon d’Or ဆုကို ၁၉၅၆ ခုနှစ်မှစ၍ နှစ်စဉ်မပျက်မကွက် ချီးမြှင့်လာခဲ့ခြင်းဖြစ်ပြီး ယခင်က ဥရောပမှကစားသမားများကိုသာ ရွေးချယ်ချီးမြှင့်သည့်အတွက် ဥရောပအကောင်းဆုံးဘောလုံးသမားဆုဟု လူသိများခဲ့သည်။ ၂၀၀၇ ခုနှစ်မှစ၍ ကမ္ဘာတစ်ဝှမ်းမှ ဘောလုံးသမားအားလုံးနှင့်သက်ဆိုင်သောဆုအဖြစ် ပြောင်းလဲခဲ့ခြင်းကြောင့် ကမ္ဘာ့အကောင်းဆုံးဘောလုံးသမားဆုဟုပင် သတ်မှတ်ရမည်ဖြစ်သည်။ ယင်းဆုကို အများဆုံးရယူနိုင်ခဲ့သူမှာ ဘာစီလိုနာအသင်းမှ အာဂျင်တီးနားတိုက်စစ်မှူး မက်ဆီ (၆ ကြိမ်)ဖြစ်ပြီး ပြီးခဲ့သည့် ၂၀၁၉ ခုနှစ်တွင်လည်း မက်ဆီက ဆွတ်ခူးထားခြင်းဖြစ်သည်။
ပြင်သစ်ဘောလုံးမဂ္ဂဇင်းသည် Ballon d’Or ဆုကို ၁၉၅၆ ခုနှစ်မှ ၂၀၁၉ ခုနှစ်အထိ ပျက်ကွက်မှုမရှိဘဲ ချီးမြှင့်ခဲ့သော်လည်း ယခုနှစ်တွင်မူ ကိုရိုနာဗိုင်းရပ်စ်ကပ်ဘေးကြောင့် ဘောလုံးပြိုင်ပွဲများ ကမောက်ကမဖြစ်ခဲ့ရသည့်အတွက် ဖျက် သိမ်းခဲ့ခြင်းဖြစ်ကြောင်း သိရသည်။ သို့သော် ဥရောပထိပ်သီးလိဂ်အများစု ရာသီအဆုံးသတ်သည်အထိ ကျင်းပနိုင်ခဲ့သလို၊ ချန်ပီယံလိဂ်နှင့် ယူရိုပါလိဂ်ပြိုင်ပွဲများကိုလည်း ပြီးဆုံးအောင်ကျင်းပသွားရန် စီစဉ်ထားသည့်အတွက် ပြင်သစ်ဘောလုံးမဂ္ဂဇင်း၏ ဆုံးဖြတ်ချက်အပေါ် ဝေဖန်မှုများ ထွက်ပေါ်လာခဲ့ခြင်း ဖြစ်သည်။ အထူးသဖြင့် ဂျာမန်မီဒီယာများက ဘိုင်ယန်မြူးနစ် တိုက်စစ်မှူး လီဝန်ဒေါစကီးဘက်မှ ရပ်တည်ကာ ပြစ်တင်ဝေဖန်ခဲ့ကြခြင်းဖြစ်ပြီး လီဝန်ဒေါစကီး ရရှိမည့် Ballon d’Or ဆု လုယက်ခံခဲ့ရပြီဟုပင် ရေးသားဖော်ပြခဲ့ကြသည်။ လီဝန်ဒေါစကီးသည် ယခုရာသီတွင် ဘိုင်ယန်မြူးနစ်အသင်းအတွက် ပြိုင်ပွဲစုံ (၄၃)ပွဲကစားကာ (၅၁)ဂိုးအထိ သွင်းယူနိုင်ခဲ့သည်။ ဘိုင်ယန်မြူးနစ်အသင်းနှင့် ဖလား(၂)လုံး ရယူနိုင်ခဲ့သည့်အပြင် ဘွန်ဒစ်လီဂါဂိုးသွင်းဘုရင်ဆုနှင့် ဘွန်ဒစ်လီဂါ အကောင်းဆုံးကစားသမားဆုများကိုရရှိခဲ့ပြီး ဥရောပဂိုးသွင်းဘုရင်ဆုကိုရရှိရန်လည်း အလားအလာကောင်းနေသောကြောင့် ဂျာမန်မီဒီယာများက ဝေဖန်ပြစ်တင်ခဲ့ခြင်းဖြစ်သည်။
