PSG တိုက်စစ်မှူး နေမာအား နယူးကာဆယ်အသင်းသို့ လာရောက်ကစားရန် ဂျိုလင်တန် ဖိတ်ခေါ် ခဲ့ပြီး ကျောနံပါတ် ၁၀ ဂျာစီက စောင့်မျှော်နေကြောင်း ပြောကြား
နယူးကာဆယ်အသင်း၏ ဘရာဇီးလ်ကွင်းလယ်တိုက်စစ်ကစားသမား ဂျိုလင်တန်က တစ်နိုင်ငံတည်းသားဖြစ်သူ PSG တိုက်စစ်မှူး နေမာအား နယူးကာဆယ်အသင်းသို့ လာရောက်ကစားရန် ဖိတ်ခေါ်ခဲ့ပြီး ကျောနံပါတ် ၁၀ ဂျာစီမှာ နေမာကို စောင့်မျှော်နေကြောင်း ပြောကြားခဲ့သည်။
PSG အသင်းသည် ၂၀၁၇ နွေရာသီ အပြောင်းအရွှေ့ကာလတွင် ကမ္ဘာ့စံချိန်တင် ပြောင်းရွှေ့ကြေး ပေါင် ၁၉၈ သန်းဖြင့် ခေါ် ယူထားသည့် နေမာကို ယခုနွေရာသီတွင် ရောင်းထုတ်ဖွယ်ရှိနေကြောင်း သတင်းများ ထွက်ပေါ်နေသည်။ PSG အသင်းအနေဖြင့် ကစားသမားလစာငွေကို လျှော့ချရန်အတွက် နေမာအားရောင်းထုတ်ရန် ပြင်ဆင်နေခြင်း ဖြစ်ပြီး ၎င်းကိုခေါ်ယူရန် ချယ်လ်ဆီး၊ ဂျူဗင်တပ်စ်နှင့် နယူးကာဆယ်အသင်းတို့က စိတ်ဝင်စားနေကြောင်း သိရသည်။
ယခုအခါ နယူးကာဆယ်အသင်း၏ ဘရာဇီးလ်ကွင်းလယ်တိုက်စစ်ကစားသမား ဂျိုလင်တန်က နယူးကာဆယ်အသင်းသို့ ပြောင်းရွှေ့ရန် နေမာကို တိုက်တွန်းခဲ့ခြင်း ဖြစ်သည်။ “အသင်းတိုင်းက နေမာ လာမယ်ဆိုရင် ကြိုဆိုကြမှာပါပဲ။ သူက ကမ္ဘာ့ဘောလုံးလောကမှာ ပုံရိပ်ကြီးမားသူဖြစ်ပါတယ်။ ကျွန်တော်တို့အသင်းအနေနဲ့ သူ့ကို ခေါ်ယူဖို့ အခွင့်အရေးရှိတယ်ဆိုရင် နည်းပြက သူ့ ကိုဖုန်းခေါ်ဖို့ ကျွန်တော် မျှော်လင့်ပါတယ်။ တကယ်လို့ နေမာသာ လာမယ်ဆိုရင် နယူးကာဆယ်အသင်းမှာ သူ့အနေနဲ့ ကျောနံပါတ် ၁၀ ဂျာစီကိုလည်း ဝတ်ဆင်ကစားနိုင်မှာဖြစ်ပါတယ်။ သူ့ကို နယူးကာဆယ်အသင်းမှာ လာကစားစေချင်ပါတယ်” ဟု ဂျိုလင်တန်က ပြောကြားခဲ့သည်။
