အာဆင်နယ်အသင်းသည် ယခုနှစ်အစပိုင်းတွင် ကစားထားသည့် ပြိုင်ပွဲစုံပွဲစဉ် ငါးပွဲ၌ သွင်းဂိုးရရှိမှုထက် အနီကတ်အရေအတွက်က ပိုများလျက်ရှိကြောင်း ဗြိတိန်သတင်းစာ The Sun က ဖော်ပြခဲ့သည်။
အာတီတာ၏အာဆင်နယ်အသင်းသည် ၂၀၂၂ ခုနှစ်အတွင်း ပြိုင်ပွဲစုံ ငါးပွဲကစားထားရာတွင် နိုင်ပွဲလုံးဝမရသေးဘဲ ပြည်တွင်းဖလားပြိုင်ပွဲများဖြစ်သည့် FA ဖလားနှင့် လိဂ်ဖလား(Carabao)တို့မှ ထွက်ခွာခဲ့ရသည်။
အာဆင်နယ်သည် ၂၀၂၂ ခုနှစ် အတွင်း ပထမဆုံးပွဲစဉ်အဖြစ် ဇန်နဝါရီ ၁ ရက်က ကစားခဲ့သည့် ပရီးမီးယားလိဂ်ပွဲစဉ်၌ မန်စီးတီးအသင်းကို အိမ်ကွင်း၌ (၁-၂)ဂိုးဖြင့် ရှုံးနိမ့်ခဲ့သည်။
ယင်းနောက်တွင် အာဆင်နယ်အသင်းသည် FA ဖလား တတိယအဆင့်၌ နော်တင်ဟမ်ဖောရက်စ်အသင်းကို (ဝ-၁)ဂိုး ဖြင့်ရှုံးနိမ့်ကာ ပြိုင်ပွဲမှ ထွက်ခွာခဲ့ရသလို၊ လိဂ်ဖလားဆီမီးဖိုင်နယ် ပထမအကျော့တွင် လီဗာပူးလ်အသင်းကို (ဝ-၀)ဂိုးဖြင့် သရေကျခဲ့သော်လည်း ဒုတိယအကျော့တွင် (ဝ-၂)ဂိုးဖြင့် ရှုံး နိမ့်ကာ ပြိုင်ပွဲမှထွက်ခွာခဲ့ရသည်။
ထို့ပြင် ဇန်နဝါရီ ၂၃ ရက်က ကစားခဲ့သည့် ပရီးမီးယားလိဂ်အိမ်ကွင်းပွဲစဉ်တွင်လည်း ဘန်လေအသင်းကို (ဝ-၀)ဂိုးဖြင့် သရေကျခဲ့သည်။
ထို့ကြောင့် အာဆင်နယ်အသင်းသည် ၂၀၂၂ ခုနှစ်အတွင်း ကစားခဲ့သည့် ပြိုင်ပွဲစုံ ငါးပွဲတွင် နိုင်ပွဲမရှိသေးသလို၊ သွင်းဂိုးမှာလည်း မန်စီးတီးနှင့်ပွဲတွင် သွင်းယူခဲ့သည့်ဂိုး တစ်ဂိုးသာ ရရှိခဲ့သည်။
သို့သော် အာဆင်နယ် အသင်းသည် ၂၀၂၂ ခုနှစ်အတွင်း အနီကတ်ဖြင့် ထုတ်ပယ်ခံရမှု သုံးကြိမ်အထိ ရှိခဲ့ကြောင်း သိရသည်။ အာဆင်နယ်(၂-၁)မန်စီးတီးပွဲတွင် ဂါဘရီယဲလ်လ်၊ လီဗာပူးလ် (ဝ-၀) အာဆင်နယ်ပွဲတွင် ချာကာနှင့် အာဆင်နယ် (ဝ-၂) လီဗာပူးလ်ပွဲတွင် ပါတေးတို့ အနီကတ်ဖြင့် ထုတ်ပယ်ခံခဲ့ရခြင်းဖြစ်သည်။
အားကစားကလောင်ရှင် ပီယာ့စ်မော်ဂန်ကမူ အာဆင်နယ်အသင်းအနေဖြင့် လာမည့်ရာသီ၌ ချန်ပီယံလိဂ်ဝင်ခွင့် ထပ်မံဆုံးရှုံးမည်ဆိုပါက အာတီတာကို ရာထူးမှထုတ်ပယ်သင့်ကြောင်း တိုက်တွန်းခဲ့သည်။
ယခုနှစ်အစတွင် အာဆင်နယ်အသင်းသည် ပရီးမီးယားလိဂ်ပွဲစဉ် နှစ်ပွဲသာ ကစားထားရပြီး ၂၀၂၂ ခုနှစ်အတွင်း အချက်အလက်များအရ ဂိုးကန်သွင်းခွင့်ရရှိမှု၌လည်း ၂၇ ကြိမ်ရရှိကာ ဘန်လေ(၁၈ ကြိမ်)ပြီးနောက် အနည်းဆုံးဖြစ်နေသည်။
ထို့ပြင် ဂိုးအဖြစ်ပြောင်းလဲနိုင်မှု (Shot Conversion) တွင်လည်း အာဆင်နယ်အသင်းမှာ ၃ ဒသမ ၇ ရာခိုင်နှုန်းဖြင့် ဝက်ဖို့ဒ်(၂.၆ ရာခိုင်နှုန်း)ပြီးနောက် ဒုတိယအနည်းဆုံးဖြစ်နေပြီး ဂိုးကန်ချက်တိကျမှု(Shot Accuracy)၌ ၃၇ ရာခိုင်နှုန်းဖြင့် ဘန်လေ(၂၃ ရာခိုင်နှုန်း)၊ နယူးကာဆယ်(၂၅ ရာခိုင်နှုန်း)ပြီးနောက် တတိယအနည်းဆုံးအဖြစ် ရပ်တည်လျက်ရှိသည်။
