ဇန်နဝါရီလ ၂၅ ရက်က ဝက်ဖို့ဒ်အသင်း နည်းပြအဖြစ် တရားဝင်ခန့်အပ်ခံရသည့် အင်္ဂလန်ဝါရင့်နည်းပြ ရွိုင်းဟော့ဒ်ဆန်သည် ရာသီကုန်၌ အသင်းအား တန်းဆင်းအန္တရာယ်မှ လွတ်မြောက်အောင် စွမ်းဆောင်နိုင်ခဲ့လျှင် ဆုကြေးအနေဖြင့် ပေါင်သန်းနှင့်ချီရရှိမည်ဟု ဗြိတိန်မီဒီယာများက ဖော်ပြခဲ့သည်။
ဝက်ဖို့ဒ်အသင်းသည် ဇန်နဝါရီ ၂၄ ရက်တွင် အသင်းနည်းပြ ရာနီရေးရီကို ရာထူးမှ ထုတ်ပယ်ပြီးနောက် သတင်းများထွက်ပေါ်ခဲ့သည့်အတိုင်း တစ်ရက်အကြာဖြစ်သည့် ဇန်နဝါရီ ၂၅ ရက်တွင် ရွိုင်းဟော့ဒ်ဆန်ကို အသင်းနည်းပြအဖြစ် ခန့်အပ်ကြောင်း တရားဝင်ကြေညာခဲ့ခြင်းဖြစ်သည်။
အသက် ၇၄ နှစ်အရွယ်ရှိ ဝါရင့်နည်းပြ ရွိုင်းဟော့ဒ်ဆန်သည် ပြီးခဲ့သည့် ၂၀၂၀-၂၁ ရာသီကုန်တွင် ခရစ္စတယ်ပဲလေ့စ် အသင်းနှင့်လမ်းခွဲပြီးနောက် အသင်းလက်မဲ့ ဖြစ်နေသူဖြစ်ပြီး ဝက်ဖို့ဒ်အသင်းကို ခြောက်လစာချုပ်ဖြင့် ယခုရာသီကုန်အထိ ကိုင်တွယ်သွားမည်ဖြစ်သည်။
ဝက်ဖို့ဒ်အသင်းသည် ယခုရာသီ ပရီးမီးယားလိဂ်တွင် ပွဲ ၂၀ ကစားထားပြီး ရမှတ် ၁၄ မှတ်ဖြင့် အဆင့် ၁၉ နေရာ၌ ရပ်တည်နေသည်။ ရွိုင်းဟော့ဒ်ဆန်အနေဖြင့် ဝက်ဖို့ဒ်အသင်းကို တန်းဆင်းဇုန်မှ လွတ်မြောက်အောင် စွမ်းဆောင်ပေးရမည်ဖြစ်ပြီး ယင်းသို့စွမ်းဆောင်နိုင်ပါက ဆုကြေးပေါင်သန်းချီရဖွယ်ရှိနေကြောင်း သိရသည်။
ရွိုင်းဟော့ဒ်ဆန်သည် ၁၉၇၆ ခုနှစ်က စတင်ခဲ့သည့် သူ၏နည်းပြဘဝတွင် အင်တာမီလန်၊ လီဗာပူးလ်၊ အင်္ဂလန်လက်ရွေးစင်အသင်းအပါအဝင် အသင်းများစွာကို ကိုင်တွယ်ဖူးသူ ဖြစ်သည်။