အင်တာမီလန်အသင်း၏နည်းပြ ဆီမြွန်နီအင်ဇာဂီက အေစီမီလန်အသင်းနှင့် ယှဉ်ပြိုင်ရမည့် ချန်ပီယံလိဂ်ဆီမီးဖိုင်နယ် ဒုတိယအကျော့ပွဲစဉ်တွင် ပထမအကျော့မှ ဦးဆောင်ထားမှုကို ကာကွယ်နိုင်ရုံ ယှဉ်ပြိုင်ကစားသွားမည်မဟုတ်ဟု ပြောကြားခဲ့သည်။
အင်တာမီလန်အသင်းသည် ပထမအကျော့ မီလန်ဒါဘီပွဲစဉ်တွင် အဝေးကွင်း၌ ယှဉ်ပြိုင်ကစားခဲ့ရသော်လည်း (၂-၀)ဂိုးဖြင့် အနိုင်ရခဲ့သည်။
ထို့ကြောင့် ဗိုလ်လုပွဲတက်ရောက်ရန်လည်း ထင်ကြေးပေးခံနေရသည်။
သို့သော် အင်ဇာဂီက လာမည့်ပွဲမှာ အသင်း၏သမိုင်းတွင် အရေးအပါဆုံးပွဲများထဲမှ တစ်ပွဲဖြစ်ပြီး နိုင်ပွဲထပ်မံရယူနိုင်ရန် ကြိုးပမ်းသွားမည်ဟု ပြောကြားခဲ့သည်။
”နည်းပြတစ်ယောက်အနေနဲ့ ပွဲတိုင်းကို ကျွန်တော် အတူတူလို့ပဲ သဘောထားပါတယ်။ အေစီမီလန်နဲ့ပွဲက အသင်းရဲ့သမိုင်းမှာ အရေးအပါဆုံးပွဲတွေထဲက တစ်ပွဲဆိုတာ ကျွန်တော်တို့ သိထားပါတယ်။ ကျွန်တော်တို့ အားသာချက်ကောင်းကောင်းလည်း ရရှိထားပါတယ်။ ဒါပေမဲ့ ကျွန်တော်တို့ ပထမအကျော့က ဦးဆောင်ထားတဲ့ရလဒ်ကို ကာကွယ်နိုင်ရုံ ယှဉ်ပြိုင်ကစားသွားမှာမဟုတ်ပါဘူး။ အင်တာမီလန်အသင်းရဲ့ ပုံစံအတိုင်းပဲ ယှဉ်ပြိုင်ကစားသွားမှာပါ။ ကျွန်တော်တို့ ရှေ့ဆက်ဖို့ ခရီးရှည် ကျန်ရှိနေဆဲဖြစ်ပြီး အေစီမီလန်နဲ့ပွဲမှာ အကောင်းဆုံးစွမ်းဆောင်နိုင်ဖို့ လိုအပ်ပါတယ်”ဟု အင်ဇာဂီက ပြောကြားခဲ့သည်။
အင်ဇာဂီက မိမိတို့အသင်း ယခုအဆင့်သို့ ရောက်လာခြင်းမှာ ကံကောင်း၍ မဟုတ်ကြောင်းလည်း ထည့်သွင်းပြောကြားခဲ့သည်။
