ဥရောပစူပါလိဂ်ကျင်းပရန် ကြိုးပမ်းခဲ့သည့် ပရီးမီးယားလိဂ်ထိပ်သီး(၆)သင်း အနက် မန်ယူ၊ ချယ်လ်ဆီး၊ လီဗာပူးလ်၊ မန်စီးတီးနှင့် အာဆင်နယ်အသင်း တာဝန်ရှိသူများအနေဖြင့် ပရီးမီးယားလိဂ်ကော်မတီများမှ နုတ်ထွက်ခဲ့ရကြောင်း သိရသည်။
ဥရောပစူပါလိဂ်အစီအစဉ်ကို ပရီးမီးယားလိဂ် ထိပ်သီး (၆)သင်း၊ လာလီဂါကလပ် အက်သလက်တီကို၊ ရီးယဲလ်မက်ဒရစ်၊ ဘာစီလိုနာ၊ စီးရီးအေကလပ် အေစီမီလန်၊ အင်တာမီလန်နှင့် ဂျူဗင်တပ်စ်စသည့် ထိပ်သီးကလပ် (၁၂) သင်းက ဧပြီ (၁၈) ရက်တွင် ထုတ်ပြန်ကြေညာခဲ့သည်။
သို့သော် အဆိုပါဥရောပစူပါလိဂ်ပြိုင်ပွဲကို ဘောလုံးအလွှာအသီးသီးမှ ပြင်းထန်သည့် ဝေဖန်ကန့်ကွက်မှုများကြောင့် ပရီးမီးယားလိဂ် (၆)သင်းအပါအဝင် အက်သလက်တီကိုနှင့် အင်တာမီလန်အသင်းတို့က ရက်ပိုင်းအကြာမှာပင် ပြန်လည်နုတ်ထွက်ခဲ့သည်။
ပရီးမီးယားလိဂ်ထိပ်သီး(၆)သင်းအနေဖြင့် ပရီးမီးယားလိဂ်အပေါ် သစ္စာဖောက်ခြင်းဖြစ်ကြောင်း ကျန်ကလပ် (၁၄)သင်းက စွပ်စွဲထားပြီး ၎င်းတို့၏ အမှုဆောင်များကိုလည်း ရာထူးမှနုတ်ထွက်ရန် တောင်းဆိုထားသည်။
ထို့ကြောင့် မန်ယူအသင်း အမှုဆောင်ဒုဥက္ကဋ္ဌ အက်ဒ်ဝုဒ်ဝက်ဒ်နှင့် လီဗာပူးလ်အသင်းဥက္ကဋ္ဌ တွမ်ဝါနာမှာ ကလပ်ရုပ်သံထုတ်လွှင့်ခွင့်ဆိုင်ရာ အကြံပေးကော်မတီမှလည်းကောင်း၊ မန်စီးတီးအသင်း အမှုဆောင်ချုပ် ဆိုရီယာနိုနှင့် အာဆင်နယ်အသင်းအမှုဆောင်ချုပ် ဗန်ကတ်တေရှမ်မှာ ကလပ်မဟာဗျူဟာဆိုင်ရာ အကြံပေးကော်မတီမှလည်းကောင်း၊ ချယ်လ်ဆီးအသင်းဥက္ကဋ္ဌ ဘရုစ်ဘက်မှာ စာရင်းစစ်နှင့် လစာကော်မတီမှလည်းကောင်း နုတ်ထွက်ခဲ့ရခြင်းဖြစ်သည်။