ဥရောပဘောလုံးအဖွဲ့ချုပ်(UEFA)အနေဖြင့် ဥရောပစူပါလိဂ်ပြိုင်ပွဲကျင်းပရန် ကြိုးပမ်းသည့်ကလပ်အသင်းများအား အရေးယူမှုမလုပ်ရန် မက်ဒရစ်မြို့ရှိတရားရုံးက ဆုံးဖြတ်ခဲ့ကြောင်း သိရသည်။
ဥရောပစူပါလိဂ်ပြိုင်ပွဲကျင်းပမည့်အစီအစဉ်ကို ထိပ်သီးကလပ် ၁၂ သင်းက ဧပြီဒုတိယပတ်တွင် ထုတ်ပြန်ကြေညာခဲ့ခြင်းဖြစ်ပြီး နယ်ပယ်အသီးသီးမှ ဝေဖန်ပြစ်တင်မှုများကြောင့် ရက်ပိုင်းအကြာမှာပင် ကိုးသင်းက နုတ်ထွက်ကြောင်း ကြေညာခဲ့ရာ သုံးသင်းသာ ကျန်ရှိတော့သည်။
UEFA သည် စူပါလိဂ်မှ နုတ်ထွက်ကြောင်း ကြေညာထားသည့် ကိုးသင်းအား ဒဏ်ကြေးအနည်းငယ်ပေးဆောင်စေရန် ဆုံးဖြတ်ခဲ့သည်။
ထို့ပြင် ပြိုင်ပွဲ၌ကျန်ရှိနေသည့် သုံးသင်းကိုလည်း အရေးယူရန် စုံစမ်းစစ်ဆေးမှုများ ပြုလုပ်ခဲ့သည်။
သို့သော် စပိန်နိုင်ငံရှိ မက်ဒရစ်ကုန်သွယ်ရေးတရားရုံး၏ တားမြစ်မှုကြောင့် စစ်ဆေးမှုများကို ဇွန်လမှစ၍ ရပ်ဆိုင်းခဲ့ရသည်။
ပြီးခဲ့သည့်သောကြာနေ့တွင် အဆိုပါတရားရုံးက ကလပ်အသင်းသုံးသင်းအား စည်းကမ်းပိုင်းအရ အရေးယူမည့်အစီအစဉ် ရပ်ဆိုင်းရန်နှင့် ကျန်ကိုးသင်းအပေါ် ချမှတ်ထားသည့် ပြစ်ဒဏ်နှင့် ကန့်သတ်ချက်များကိုလည်း ဖယ်ရှားရန် ဆုံးဖြတ်ခဲ့ခြင်းဖြစ်သည်။
