အင်တာမီလန်အသင်းက အသင်းတိုက်စစ်မှူး လူကာကူသည် ပေါင်ဒဏ်ရာကြောင့် အေစီမီလန်အသင်းနှင့်ကစားမည့် မီလန်ဒါဘီပွဲစဉ်ကို လွဲချော်မည်ဖြစ်ကြောင်း အတည်ပြုထုတ်ပြန်ခဲ့သည်။
အသက် (၂၉) နှစ်အရွယ်ရှိ ဘယ်လ်ဂျီယံလက်ရွေးစင်တိုက်စစ်မှူး လူကာကူသည် ယခုနွေရာသီအပြောင်းအရွှေ့ကာလတွင် ချယ်လ်ဆီးအသင်းမှ အင်တာမီလန်အသင်းထံသို့ တစ်ရာသီအငှားဖြင့် ပြန်လည်ရောက်ရှိခဲ့သူဖြစ်သည်။
၎င်းသည် ယခုရာသီတွင် အင်တာမီလန်အသင်းအတွက် စီးရီးအေ (၃) ပွဲကစားထားရာတွင် (၁)ဂိုးသွင်းယူပေးထားသည်။ သို့သော် ၎င်းသည် ပေါင်ဒဏ်ရာရရှိခဲ့ခြင်းကြောင့် သြဂုတ် (၃၀)ရက်က ကစားခဲ့သည့် ခရီမိုနီဆီအသင်းအား (၃-၁) ဂိုးဖြင့် အနိုင်ရသည့်ပွဲကို လွဲချော်ခဲ့သလို၊ ဒဏ်ရာအခြေအနေကို စစ်ဆေးရဦးမည်ဖြစ်ကြောင်း သိရှိရသည်။
အင်တာမီလန်အသင်း၏ ထုတ်ပြန်ချက်တွင် လူကာကူ၏ ပေါင်ဒဏ်ရာအခြေအနေကို လာမည့်ရက်သတ္တပတ်တွင် အကဲဖြတ်သွားမည်ဖြစ်ကြောင်း ဖော်ပြပါရှိသည်။ သို့သော် လူကာကူအနေဖြင့် အောက်တိုဘာလအစောပိုင်းတွင်မှ ပြန်ကစားနိုင်ဖွယ်ရှိကြောင်း အီတလီမီဒီယာများက ဖော်ပြနေကြသည်။
ထို့ကြောင့် လူကာကူသည် စက်တင်ဘာ (၃)ရက် (စနေနေ့) ကစားမည့် အေစီမီလန်အသင်းနှင့် စီးရီးအေအဝေးကွင်းပွဲစဉ်ကို လွဲချော်မည်ဖြစ်သလို၊ စက်တင်ဘာ (၈)ရက်တွင် ကစားမည့် ဘိုင်ယန်မြူးနစ်နှင့် ချန်ပီယံလိဂ်အဖွင့်ပွဲကိုပါ လွဲချော်မည်ဖြစ်သည်။
လူကာကူအနေဖြင့် အင်တာမီလန်အသင်း၏ ပွဲစဉ်(၆)ပွဲကို လွဲချော်ဖွယ်ရှိပြီး အောက်တိုဘာ (၄)ရက်တွင်ကစားမည့် ရိုးမားနှင့် ပွဲတွင်မှ ပါဝင်ဖွယ်ရှိကြောင်းသိရသည်။
