အာဆင်နယ် အသင်း နည်းပြ မီခေးလ် အာတီတာ က အပြောင်းအရွှေ့ကာလ မှာ ဘာတွေ ဖြစ်ပျက်မလဲ ဆိုတာ စောင့်ကြည့်သွားမှာ ဖြစ်ကြောင်း နဲ့ အိုဇေးလ် ရဲ့ အခြေအနေကို ဇန်နဝါရီ လကုန်မှသာ စဉ်းစား သွားမှာ ဖြစ်တယ်လို့ ဆိုပါတယ် ။
အသက် ၃၂ နှစ် အရွယ် ရှိပြီ ဖြစ်တဲ့ အိုဇေးလ် ဟာ အာတီတာ နည်းပြ ဖြစ်ခါစမှာ အာဆင်နယ် အတွက် ပွဲထွက် ကစားခွင့် ရခဲ့ပေမယ့် ဘောလုံးပွဲတွေ ပြန်စတဲ့ ဇွန်လ ကတည်းက အသင်းလူစာရင်းကနေ ချန်လှန် ခံထားရတာပါ ။
ဂျာမနီ ကွင်းလယ်လူဟောင်း မီဆွတ် အိုဇေးလ် ဟာ ဒီရာသီ အာဆင်နယ် အသင်း ရဲ့ ယူရိုပါလိဂ်အုပ်စု အဆင့်ပွဲစဉ်တွေအတွက် အပြီးသတ် လူစာရင်း မှာ ပါဝင် ခဲ့ခြင်း မရှိသလို ပရီးမီးယားလိဂ် လူစာရင်း ကနေလည်း ထပ်မံ ချန်လှပ် ခံခဲ့ရပြန် ပါတယ် ။
အိုဇေးလ် ဟာ အာဆင်နယ် အသင်းမှာ တစ်ပတ် လုပ်ခ ပေါင် ၃ သိန်းခွဲ ရရှိနေသူ ဖြစ်ပြီး ရာသီကုန်မှာ အသင်း နဲ့ စာချုပ် သက်တမ်း ကုန်ဆုံးမှာ ဖြစ်ပါတယ် ။ အိုဇေးလ် ကတော့ စာချုပ် သက်တမ်းကုန်သည် အထိ အာဆင်နယ်မှာ ကစားသွားမှာ ဖြစ်ကြောင်း ပြောကြားထားဖူးပါတယ် ။
အာဆင်နယ် ပရိသတ်တွေဟာ အသင်းရဲ့ ဂိုးဖန်တီးမှု အပိုင်း အားနည်းမှု ပြဿနာ ဖြေရှင်း နိုင်ဖို့ရာ ပရီးမီးယားလိဂ် မှာ ဂိုးဖန်တီးမှု အကြိမ် ၅၀ ကို အမြန်ဆုံး ပြည့်မြောက်ခဲ့တဲ့ အိုဇေးလ် ကို အသင်း လူစာရင်းထဲ ပြန်လည် ထည့်သွင်း စေချင်နေကြပါတယ် ။
အာတီတာ ကတော့ အိုဇေးလ် ကို ပြန်လည် အသုံးပြုဖို့ ရှိမရှိ ဆိုတဲ့ မေးခွန်းကို ” အပြောင်းအရွှေ့ကာလမှာ ဘာတွေ ဖြစ်ပျက် သွားမလဲ ဆိုတာ စောင့်ကြည့်ရမှာပါ ၊အပြောင်းအရွှေ့ပိတ်တော့မှာပဲ အခြေအနေတွေကို လေ့လာ ဆန်းစစ် သွားမှာပါ ။ ” လို့ ဆိုပါတယ် ။
အာဆင်နယ် အသင်းမှာ လာမယ့် လပိုင်း အတွင်း စာချုပ် သက်တမ်း ကုန်ဆုံးမယ့် ကစားသမားတွေ အမြောက်အများ ရှိနေပြီး ဒေးဗစ်လူးဝဇ် ၊ ဆိုကရက်တစ် နဲ့ မူစတာဖီ တို့ဟာ မကြာခင်မှာ စာချုပ် သက်တမ်းကုန်ဆုံးတော့မှာ ဖြစ်ပါတယ် ။
ဆက်လက်ပြီး သတင်းထောက်တွေက ဆိုကရက်တစ် နဲ့ အိုဇေးလ် တို့နဲ့ ပတ်သက်ပြီး အာတီတာကို မေးမြန်းခဲ့ရာ ” ကစားသမားတွေရဲ့ စာချုပ် သက်တမ်းကို လေးစားရမှာပါ ။ ကျွန်တော်တို့ လုပ်ရမှာက ကစားသမားတွေနဲ့ ပွင့်ပွင့်လင်းလင်း ပြောဆို ဆွေးနွေးပြီး ဘာတွေ ရည်မှန်းထားသလဲ ဆိုတာ ပြောပြဖို့ပါ ။ “
” အသင်းက သူတို့ရဲ့ အခန်း ကဏ္ဍ နဲ့ သူတို့ကို ဘာကြောင့် အဲ့ဒီ နေရာမှာ ကစားခိုင်းတာလဲ ဆိုတာ ပြောပြရပါမယ် ။ ဆုံးဖြတ်ချက်ကတော့ သူတို့ စိတ်ကြိုက် ချမှတ်ခွင့် ရှိပါတယ် ၊ စာချုပ် သက်တမ်း ရှိနေတာကြောင့်ပါ ၊ တစ်ချို့က ကစားခွင့် မရတော့ ထွက်ခွာချင်တယ် ၊ တစ်ချို့ကျ ဆက်နေချင်ပါတယ် ၊ ဒါတွေက ကျွန်တော်တို့ ဆုံးဖြတ်လို့ရတဲ့ ကိစ္စတွေ မဟုတ်ပါဘူး ။ ” လို့ ဆိုပါတယ် ။
