TNT Sports ရဲ့ ဘောလုံးပွဲ သုံးသပ်သူ အဖြစ် လုပ်ကိုင်နေတဲ့ မန်ချက်စတာ ယူနိုက်တက် ကွင်းလယ်လူဟောင်း အိုဝင် ဟားဂရေဗ့် က အာဆင်နယ် အသင်းဟာ ဒီနှစ်မှာ အတော်လေး ခြေစွမ်းပိုင်း ထူးချွန် ကောင်းမွန် နေတာကြောင့် ချန်ပီယံလိဂ် ချန်ပီယံ ဖြစ်နိုင်တဲ့ အသင်း တစ်သင်း ဖြစ်ကြောင်း သုံးသပ် ပြောကြား လိုက်ပါတယ် ။
အာဆင်နယ် အသင်းဟာ လက်ရှိမှာ လိဂ် ပွဲ ၇ ပွဲ ဆက်တိုက် အနိုင် ရထားပြီး အမှတ်ပေး ဇယား ထိပ်ဆုံးက လီဗာပူး အသင်း နဲ့ ၂ မှတ် အကွာမှာ ရှိနေပါတယ်။ အာဆင်နယ် အသင်းဟာ ချန်ပီယံလိဂ် မှာတော့ ပထမအကျော့ အဝေးကွင်းမှာ ပေါ်တို အသင်းကို တစ်ဂိုး ဂိုးမရှိနဲ့ အရေး နိမ့်ထားပြီး နောက်တစ်ပတ်ထဲမှာ ဒုတိယ အကျော့ ကစားရမှာ ဖြစ်ပါတယ် ။
ဟားဂရေဗ့် က အာဆင်နယ် အသင်း ရဲ့ချန်ပီယံလိဂ် အလားအလာ နဲ့ ပတ်သက်ပြီး ” လက်ရှိ အာဆင်နယ် အသင်းက ထူးခြား ကောင်းမွန်လှပါတယ်။ သူတို့မှာ ရဲရင့်တဲ့ မန်နေဂျာ ၊ ရဲရင့်တဲ့ အသင်းသားတွေ ရှိပါတယ် ၊ သူတို့သာ ရကိုရရမယ်ဆိုတဲ့ စိတ်မျိုးနဲ့ တိုက်ပွဲဝင်မယ်ဆို ချန်ပီယံလိဂ် ချန်ပီယံ ဖြစ်နိုင်တယ်လို့ ကျနော်ကတော့ ယုံကြည်မှု ရှိပါတယ် ။ ”
” ဒါပေမဲ့ အတွေ့အကြုံကလည်း အရေးကြီးတဲ့ အရာပါပဲ။ ဒီအရာကို ပထမအကျော့မှာ ကျနော်တို့ မြင်တွေ့ ခဲ့ရပါတယ် ။ အာဆင်နယ် အသင်းကို ဗိုလ်စွဲဖို့ တတိယ ရေပန်းအစားဆုံး အသင်း နေရာမှာ ထားထားတာ မှန်ပါတယ် ၊ စီးတီး ကတော့ သေချာပေါက် ရေပန်း အစားဆုံးပေါ့ဗျာ ၊ ပြီးရင်တော့ ရီးရဲလ်မက်ဒရစ်ပေါ့ ၊ အာဆင်နယ် က သူတို့ နောက်မှာပေ့ါ ။ ” လို့ ပြောကြား သွားခဲ့ပါတယ် ။
