မန်ချက်စတာ ယူနိုက်တက် နောက်ခံလူဟောင်း ရီယို ဖာဒီနန် က လက်ရှိ အချိန်မှာ အာဆင်နယ် အသင်းမှာ ရုန်းကန် နေရတဲ့ အကြောင်းကို ဆွေးနွေး သုံးသပ် သွားခဲ့ပြီး အူဘာမီယန်း အပေါ် မှီခို လွန်းနေကြောင်း ထောက်ပြ သွားခဲ့ပါတယ် ။
အာဆင်နယ် အသင်းဟာ ဝုလ်ဗာဟမ်တန် အသင်းကို နှစ်ဂိုး တစ်ဂိုး နဲ့ ရှုံးနိမ့်ပြီးနောက် ဒီရာသီမှာ ရှုံးပွဲ ငါးပွဲ အထိ ရှိသွား ခဲ့ပြီ ဖြစ်ပါတယ် ။ ဒီရှုံးပွဲဟာ အာဆင်နယ် အသင်းအတွက်ပရီးမီးယားလိဂ် အိမ်ကွင်း သုံးပွဲဆက် ရှုံးပွဲလည်း ဖြစ်ပါတယ် ။
အာဆင်နယ် အသင်းဟာ ဒီရာသီ ၁၀ ပွဲ ကစားအပြီးမှာ နိုင်ပွဲထက် ရှုံးပွဲ က ပိုများနေပြီး အဆင့် ၁၄ နေရာ အထိ ရောက်ရှိ သွားခဲ့ပါပြီ ။ ၁၀ ပွဲ ကစားအပြီးမှာ ရမှတ် ၁၃ မှတ်သာ ရယူထားနိုင်တာဟာ အာဆင်နယ် အသင်း ရဲ့ ပရီးမီးယားလိဂ် သမိုင်းတစ်လျှောက် ရာသီ အဖွင့် ၁၀ ပွဲအပြီး အနည်းဆုံး ရမှတ် ဖြစ်တယ်လို့လည်း သိရပါတယ် ။
အာဆင်နယ် အသင်း ရလဒ်ကောင်း ရဖို့ ရုန်းကန် နေရသလို အူဘာမီယန်း ဟာလည်း တိုက်စစ်မှာ ဂိုးရဖို့ ရုန်းကန် နေရပါတယ် ။ အူဘာမီယန်း ဟာ ဖူလ်ဟမ် အသင်း နဲ့ အဖွင့် ပွဲနောက်ပိုင်း ပရီးမီးယားလိဂ် နောက်ဆုံး ၉ ပွဲဆက် open play ကနေ ဂိုးသွင်း နိုင်ခြင်း မရှိသေးပါဘူး ။
ဖာဒီနန် က အာဆင်နယ် အသင်း ရဲ့ သွင်းဂိုး တာဝန်ကို အူဘာမီယန်း အပြင် နီကိုလပ်စ် ပေပေ နဲ့ လာကာဇက်တို့ကလည်း ထမ်းဆောင်သင့်တယ်လို့ ပြောကြား လိုက်ပါတယ် ။
ဖာဒီနန် က Five YouTube channel မှာ ” အာဆင်နယ် အသင်းမှာ ဘာတွေ ဖြစ်ပျက်နေတာလဲ ။ တည်ငြိမ်မှု ပျောက်ဆုံး နေသလို သွင်းဂိုးတွေလည်း ရှာဖွေ နေရပါတယ် ၊ အခု အချိန်မှာ သွင်းဂိုးတွေ ကင်းမဲ့ နေတာ အမှန်ပါပဲ ။ ”
” အူဘာမီယန်း သာ ဂိုးမသွင်းရင် ဘယ်သူမှ ဂိုးမသွင်းနိုင်တာက ပြဿနာ ပါပဲ ။ အာတီတာ က လူငယ်တွေကို နေရာ ပေးပြီး စွမ်းဆောင်ရည်ပြခွင့်ပေးတာကို ကျနော် သဘောကျပါတယ် ၊ ဒါပေမယ့် တစ်ခါတစ်လေမှာ ဒီလို အခြေအနေတွေကနေ ရုန်းထ နိုင်ဖို့ အတွေ့အကြုံရင့် ကစားသမားတွေ လိုအပ်ပါတယ် ။ ”
” လာကာရေ ၊ အာဆင်နယ် အသင်း က မင်းရဲ့ ပုံစံကောင်း နဲ့ သွင်းဂိုးတွေ လိုအပ်နေတယ်ကွာ ။ ပေပေ ရေ အခွင့်အရေး ရတာနဲ့ ဂိုးဝင်အောင် ကန်ကွာ ။ ကစားသမားတွေ အနေနဲ့ အာတီတာ လုပ်ချင်တဲ့ အရာကို ကောင်းကောင်းမွန်မွန် တုန့်ပြန် နိုင်ဖို့ လိုအပ်ပါတယ် ။ ”
” အူဘာမီယန်း က အသင်း အတွက် ဂိုးတွေ သွင်းခဲ့ပါတယ် ၊ ဒါပေမယ့် အာဆင်နယ် အသင်းက သူ့အပေါ် ဘယ်လောက် အထိ မှီခို နေသလဲ ဆိုရင် သူသာ ဂိုးမသွင်း နိုင်ရင် အာဆင်နယ် က တူညီတဲ့ အသင်း မဟုတ်တော့ သလိုပါပဲ ။ ” လို့ ပြောကြား သွားခဲ့ပါတယ် ။
