၂၀၂၀-၂၁ ဘောလုံးရာသီ ရဲ့ အဖွင့် ပွဲစဉ်လို့ ဆိုရမယ့် ပရီးမီးယားလိဂ် ချန်ပီယံ လီဗာပူး အသင်း နဲ့ အက်ဖ်အေ ဖလား ချန်ပီယံ အာဆင်နယ် တို့ အားပြိုင်ကြတဲ့ ကွန်မြူနတီဒိုင်း ပွဲကတော့ ပြီးဆုံး သွားခဲ့ပါပြီ ။
အာဆင်နယ် အသင်း နဲ့ လီဗာပူး ဟာ သာမန် ပွဲကစားချိန် အတွင်း တစ်ဖက် တစ်ဂိုးစီ သရေကျနေတာကြောင့် ပင်နယ်တီ အဆုံးအဖြတ် ခံယူ ခဲ့ရပြီး အာဆင်နယ် အသင်းဘက်က ပင်နယ်တီ ငါးလုံး စလုံး ဝင်ပြီး ၅ ဂိုး ၄ ဂိုး နဲ့ အနိုင် ရသွားခဲ့ပါတယ် ။
အာဆင်နယ် အသင်း အတွက် အဖွင့်ဂိုးကို တိုက်စစ်မှူး အူဘာမီယန်း က သွင်းယူ ပေးခဲ့ပြီး လီဗာပူး အတွက် ချေပဂိုးကိုတော့ မီနာမီနို က သွင်းယူ ပေးခဲ့တာပါ ။ ပင်နယ်တီ အဆုံးအဖြတ်မှာတော့ လီဗာပူး ဘက်က ဘရူးစတား ရဲ့ ကန်ချက် ဂိုးဘားတန်း ထိထွက် ခဲ့တာကြောင့် အာဆင်နယ် တို့ ၅-၄ နဲ့ အနိုင် ရသွားခဲ့ပါတယ် ။
အာဆင်နယ် နဲ့ လီဗာပူး ပွဲမှ မှတ်မှတ်ထင်ထင် ပြောစရာ ဖြစ်ခဲ့တဲ့ အချက် ၄ ချက် ကို ဖော်ပြ ပေးလိုက်ပါတယ် ။
အာဆင်နယ် နဲ့ အာတီတာ တို့ရဲ့ဖလား luck
အာဆင်နယ် အသင်း အတွက် ဒီတစ်ကြိမ် ကွန်မြူနတီဒိုင်း ရရှိတာဟာ ၁၆ ကြိမ် မြောက် ဖြစ်ပြီး အက်ဖ်အေ ဖလား ချန်ပီယံ အဖြစ် ကစားခဲ့ရတဲ့ နောက်ဆုံး ကွန်မြူနတီဒိုင်း လေးပွဲစလုံးကိုလည်း အနိုင်ရအောင် ကစား ထားနိုင်ပါတယ် ။
အာဆင်နယ် နည်းပြ အာတီတာ အနေနဲ့လည်း ကစားသမား ဘဝမှာရော နည်းပြ ဘဝမှာပါ အက်ဖ်အေ ဖလား နဲ့ ကွန်မြူနတီဒိုင်း ကို ကိုင်မြှောက် နိုင်ခဲ့သူ ဖြစ်လာ ခဲ့ပါတယ် ။ ဒီနေ့ပွဲမှာ ပရီးမီးယားလိဂ် ချန်ပီယံ လီဗာပူး ဟာ အာဆင်နယ် ထက် လူအင်အား ပိုမိုတောင့်တင်း ပေမယ့် ဂန်းနားတို့ရဲ့ဖလား luck ကို မယှဉ်နိုင်ခဲ့ပါဘူး ။
အာဆင်နယ် အတွက်တော့ ဝင်ဘာလေ ဟာ အောင်မြေလို့ ဖြစ်နေခဲ့ပြီး လီဗာပူး အတွက်တော့ နှစ်နှစ်ဆက် ကွန်မြူနတီဒိုင်းမှာ ပင်နယ်တီနဲ့ချည်း အရှုံး ပေးခဲ့ရတာပါ ။
Man of the Match ဆုရှင် နိုင်းလ်စ်
ကွန်မြူနတီဒိုင်း ပွဲစဉ် ရဲ့ အကောင်းဆုံး ကစားသမားဆုကို ရရှိ သွားသူကတော့ အာဆင်နယ် ကနေ ထွက်ခွာတော့မယ်လို့ သတင်းကြီးနေတဲ့ မိတ်လန်နိုင်းလ်စ် ပါ ။ လီဗာပူး နဲ့ ပွဲမှာ မိတ်လန်နိုင်းလ်စ် ရဲ့ နေရာယူပုံ ၊ ဘောလုံး ရှင်းထုတ်ပုံ နဲ့ ဖြတ်တင်ဘော တွေဟာ အတော်လေး ကောင်းမွန် ခဲ့ပြီး အကောင်းဆုံးဆု နဲ့ ထိုက်တန် ခဲ့ပါတယ် ။
မိတ်လန်နိုင်းလ်စ် ဟာ ဒီလို ခြေစွမ်းပြ ကစား နိုင်တာကြောင့်လည်း ချက်ချင်း ဆိုသလိုပဲ အင်္ဂလန် လက်ရွေးစင် အသင်းကြီးရဲ့လူစာရင်းထံ ခေါ်ဆောင် ခြင်း ခံခဲ့ရပါတယ် ။
Wakanda Forever
မနေ့က နံနက် အစောပိုင်းမှာ ရုပ်ရှင်ချစ် ပရိသတ်တွေ အတွက် စိတ်မကောင်းစရာ သတင်း တစ်ပုဒ် ထွက်ပေါ် ခဲ့ပြီး Black Panther မင်းသား Chadwick Boseman တစ်ယောက် ကင်ဆာ ရောဂါ နဲ့ ဆုံးပါး သွားခဲ့ပြီ ဆိုတဲ့ သတင်းပါ ။
အဆိုပါ သတင်းသိသိချင်းမှာပဲ အာဆင်နယ် အသင်း တိုက်စစ်မှူး အူဘာမီယန်းဟာ သူ့ရဲ့တွစ်တာ အကောင့်မှာ Chadwick တစ်ယောက် ငြိမ်းချမ်းစွာ အနားယူနိုင်ပါစေလို့ ဆုတောင်း ပေးခဲ့သလို လီဗာပူး နဲ့ ပွဲမှာလည်း ဂိုးသွင်းအပြီး ” Wakanda Forever ” salute ပုံစံနဲ့ အောင်ပွဲ ခံသွားခဲ့ပါတယ်
အူဘာမီယန်း ဟာ အရင်က Black Panther မျက်နှာဖုံး နဲ့ အောင်ပွဲ ခံခဲ့ဖူးပြီး ဒီတစ်ကြိမ်မှာတော့ သူ့ရဲ့ သွင်းဂိုးဟာ ကွယ်လွန်သွားတဲ့ Chadwick Boseman အတွက် ရည်စူးတယ်ဆိုတာ အသေအချာပါပဲ ။
ထူးခြားတဲ့ တိုက်ဆိုင်မှု
ဒီနှစ် ကွန်မြူနတီဒိုင်း ပွဲစဉ်ရဲ့အဖွင့်ဂိုးကို အာဆင်နယ် တိုက်စစ်မှူး အူဘာမီယန်း က ပွဲချိန် ၁၂ မိနစ်မှာ သွင်းယူ ခဲ့တာပါ ။ တိုက်တိုက်ဆိုင်ဆိုင်ပဲ မနှစ်က ကွန်မြူနတီဒိုင်း ပွဲစဉ်မှာလည်း စတာလင် ဟာ လီဗာပူး ဘက်ကို ပွဲချိန် ၁၂ မိနစ်မှာပဲ ဂိုးသွင်း ခဲ့တာပါ ။
အဆိုပါ နှစ်ပွဲ စလုံးကို လီဗာပူး အသင်းဟာ ပင်နယ်တီ အဆုံး အဖြတ် ရလဒ် ၅-၄ နဲ့ ရှုံးနိမ့် ခဲ့တာကလည်း ထူးခြားတဲ့ တိုက်ဆိုင်မှု တစ်ခုပါ ။ မနှစ်က ကွန်မြူနတီဒိုင်း ရှုံးပွဲ တွေ့ခဲ့ပေမယ့် လီဗာပူး ဟာ ပရီးမီးယားလိဂ် ဖလား ရယူ နိုင်ခဲ့ပြီး လာမယ့် နှစ်မှာကော ပရီးမီးယားလိဂ် ဖလား ထပ်မံ ရယူ နိုင်မလား ဆိုတာကတော့ စိတ်ဝင်စားစရာပါ ။
