အာဆင်နယ်ဝါရင့်ကွင်းလယ်ကစားသမား ချာကာသည် လာမည့်နွေရာသီအပြောင်းအရွှေ့ကာလတွင် ဂျာမန်ကလပ် လေဗာကူဆင်အသင်းသို့ ပြောင်းရွှေ့ရန် အလွန်နီးစပ်နေကြောင်း ဗြိတိန်မီဒီယာများက ဖော်ပြနေကြသည်။
အသက် (၃၀)အရွယ်ရှိ ဆွစ်ဇာလန်လက်ရွေးစင်ကွင်းလယ်ကစားသမား ချာကာသည် ၂၀၁၆ ခုနှစ်တွင် မိုချန်ဂလာဘတ်အသင်းမှ အာဆင်နယ်အသင်းထံသို့ ပေါင် (၃၅) သန်းဝန်းကျင်ဖြင့် ပြောင်းရွှေ့လာသူဖြစ်သည်။
ချာကာသည် အာဆင်နယ်အသင်းအတွက် အနိမ့်အမြင့်၊ အတက်အကျများစွာကို ရင်ဆိုင်ခဲ့ရကြောင်း ဝန်ခံခဲ့ပြီး ၎င်းသည် အသင်းအတွက် (၇) ရာသီအတွင်း ပြိုင်ပွဲစုံ (၂၉၅) ပွဲတွင် (၂၁)ဂိုး သွင်းယူခဲ့ကာ အသင်းနှင့်အတူ FA ဖလား (၂) ကြိမ်နှင့် ကွန်မြူနတီဒိုင်း (၁) ကြိမ် ရရှိခဲ့သည်။
အာဆင်နယ်အသင်းနှင့် ချုပ်ဆိုထားသည့် ချာကာ၏ လက်ရှိစာချုပ်မှာ ၂၀၂၄ ခုနှစ်တွင် ကုန်ဆုံးမည်ဖြစ်ပြီး ယခုရာသီကုန်တွင် အသင်းမှထွက်ခွာရန် ဆုံးဖြတ်ခဲ့ခြင်းဖြစ်သည်။
ချာကာအနေဖြင့် လာမည့်နွေရာသီအပြောင်းအရွှေ့ကာလတွင် လေဗာကူဆင်အသင်းသို့ ပြောင်းရွှေ့ရန် သဘောတူညီမှုရထားပြီဟု မီဒီယာအများစုက ဖော်ပြနေကြပြီး အာဆင်နယ်အသင်းသည် အသင်းကွင်းလယ်ကစားသမား ချာကာအတွက် ပြောင်းရွှေ့ကြေး ပေါင်(၁၃)သန်း ရရှိရန် အလိုရှိနေကြောင်း သိရှိရသည်။