အီတလီဝါရင့်နောက်ခံလူ ချီလီနီသည် အင်္ဂလန်ရှိ ဝင်ဘလေကွင်း၌ ဇွန်လ ၁ ရက်တွင် အာဂျင်တီးနားနှင့် ယှဉ်ပြိုင်ကစားမည့် Finalissima ပွဲစဉ်အပြီးတွင် လက်ရွေးစင်ကစားသမားဘဝမှ အနားယူတော့မည်ဖြစ်ကြောင်း အတည်ပြုပြောကြားခဲ့သည်။
“ဝင်ဘလေမှာ နိုင်ငံလက်ရွေးစင်အသင်းကို နှုတ်ဆက်တော့မယ့် အကြောင်းကို ပြောလိုပါတယ်။ ယူရိုအောင်ပွဲနဲ့အတူ ကျွန်တော့်ကစားသမားဘဝ အထွက်အထိပ်ကိုရောက်ရှိစေတဲ့ အတွေ့အကြုံရှိခဲ့တဲ့နေရာ ပေါ့။ အမှတ်တရကောင်းတစ်ခုနဲ့အတူ အဇူရီ(အီတလီအသင်း)ကို ကျွန်တော် နှုတ်ဆက်စကား ပြောလိုပါတယ်။ ဒီပွဲက အီတလီအသင်းနဲ့ အတူ ကျွန်တော့်ရဲ့နောက်ဆုံးပွဲဆိုတာ သေချာပါတယ်” ဟု ချီလီနီက ပြောကြားခဲ့သည်။
အသက် ၃၇ နှစ်အရွယ်ရှိ ချီလီသည် ယင်းပွဲကစားအပြီးတွင် ဒီရော့ဆီနှင့်အတူ အီတလီအသင်း၏ ပွဲအများဆုံး စတုတ္ထနေရာသို့ ရောက်ရှိလာမည်ဖြစ်သည်။ ချီလီနီသည် ယခုရာသီကုန်တွင် ဂျူဗင်တပ်စ် အသင်းနှင့် စာချုပ်သက်တမ်းကုန်ဆုံးပြီးနောက် အသင်းမှထွက်ခွာရန် သေချာသလောက်ရှိနေပြီး မေဂျာလိဂ်ကလပ်အသင်းတစ်သင်းသင်းသို့ ပြောင်းရွှေ့ရန် နီး စပ်နေကြောင်း သိရသည်။
Finalissima ပွဲစဉ်မှာ ဥရောပချန်ပီယံနှင့် တောင်အမေရိကချန်ပီယံအသင်းများအကြား ရင်ဆိုင်ကစားသည့်ပွဲစဉ်ဖြစ်ကာ ယခင် Artemio Franchi Cupကို ပြန်လည်အသက်သွင်းထားခြင်းဖြစ်ပြီး ယခုနှစ် အပါအဝင် ၂၀၂၄၊ ၂၀၂၈ ခုနှစ်များ၌ သုံးကြိမ်အထိ ယှဉ်ပြိုင်ကစားသွားရန် UEFA နှင့် CONMEBOL အကြား စာချုပ်ချုပ်ဆိုထားခဲ့သည်။
