ပြီးခဲ့တဲ့ ရက်ပိုင်းက ဘရာဇီး လက်ရွေးစင် အသင်းဟာ ကိုပါ အမေရိက ပြိုင်ပွဲရဲ့ ဆီမီး ဖိုင်နယ် ပွဲစဥ်အဖြစ် ရီယို ဒီ ဂျနေရိုး ကွင်းမှာ ပီရူး လက်ရွေးစင် အသင်းကို 1 – 0 ဆိုတဲ့ ရလဒ်နဲ့ အနိုင် ကစားနိုင်ခဲ့ပြီး ဖိုင်နယ်ကို တက်ရောက် သွားနိုင်ခဲ့ ပါတယ် ။
အခြားတစ်ဖက်မှာတော့ အာဂျင်တီးနား လက်ရွေးစင် အသင်းဟာ မနေ့က ကိုပါအမေရိက ဆီမီးဖိုင်နယ်မှာ ကိုလံဘီယာ အသင်းကို ပင်နယ်တီ အဆုံးအဖြတ်မှာ အနိုင် ကစားနိုင်ခဲ့ပြီး ဗိုလ်လုပွဲ ဆီသို့ တက်ရောက် သွားနိုင်ခဲ့ ပါတယ် ။
ဒါ့ကြောင့် အမေရိကတိုက်ရဲ့ အကောင်းဆုံး အသင်း နှစ်သင်း ဖြစ်ကြတဲ့ ဘရာဇီးနဲ့ အာဂျင်တီးနား အသင်းတို့ဟာ 11 ရက်နေ့ နံနက်မှာ မာရာကာနာ ကွင်းထဲ ဖိုင်နယ် ကစားရပါတော့မယ် ။ ဒီပွဲမှာတော့ သူတို့တွေဟာ အကောင်းဆုံး ကစားသမား စာရင်း ပိုင်ဆိုင်လိုကြမှာ အသေအချာပါပဲ ။
ဒါပေမဲ့ ဘရာဇီး လက်ရွေးစင် အသင်းဟာ အားထားရတဲ့ တိုက်စစ် ကစားသမား ဖြစ်သူ ဂါဘရီယယ် ဂျီးဆပ်ကို ဖိုင်နယ်မှာ ပိုင်ဆိုင်ခွင့် ရဖို့ ရှိမနေပါဘူး ။ ဂျီးဆပ်ဟာ ဘရာဇီးတို့ ချီလီကို အနိုင် ရရှိခဲ့တဲ့ ကွာတား ဖိုင်နယ် အဆင့်မှာ တိုက်ရိုက် အနီကဒ် ထိခဲ့လို့ ပါပဲ ။
အဆိုပါ ပွဲစဥ်မှာ ဂျီးဆပ်ဟာ ပြိုင်ဖက်နောက်ခံလူ မီနာကို ကွန်ဖူး ကန်ချက် နဲ့ ကန်ကျောက်သလို ဖြစ်သွားခဲ့တဲ့ အတွက် တိုက်ရိုက် အနီကဒ် ထိခဲ့တာ ဖြစ်ပြီး အခုတော့ ဘောလုံး အဖွဲ့ချုပ်မှ နှစ်ပွဲ ပွဲပယ် ပစ်ဒဏ် ချမှတ် သွားခဲ့လိုက် ပါတယ် ။
ဒါ့ကြောင့် ဂျီးဆပ်ဟာ ဘရာဇီးတို့ ပီရူး အသင်းနဲ့ ကစားခဲ့တဲ့ ဆီမီး ဖိုင်နယ် ပွဲစဥ်မှာ ကစားခွင့် မရရှိခဲ့ သလို အာဂျင်တီးနား လက်ရွေးစင် အသင်း နဲ့ ကစားမယ့် ဗိုလ်လုပွဲမှာလည်း ကစားခွင့် ရရှိမှာ မဟုတ်တော့ ပါဘူး ။ ဒါဟာ ဘရာဇီး အတွက် ထိုးနှက်ချက် တစ်ခု ပါပဲ ။
အခုတော့ ဘရာဇီး လက်ရွေးစင် အသင်းရဲ့ အားအထားရဆုံး တိုက်စစ် ကစားသမား ဖြစ်သူ နေမာ ဂျူနီယာ က ဆုံးဖြတ်ချက် ချမှတ်ရေး ကိစ္စမျိုး အခုလို အဖွဲ့အစည်းတွေရဲ့ လက်ထဲ ရှိနေတာက ဝမ်းနည်းစရာ ဖြစ်ကြောင်း ပေါက်ကွဲ သွားခဲ့လိုက် ပါတယ် ။
” အခုလို ဆုံးဖြတ်ချက် ချမှတ်ခြင်း ကိစ္စတွေက ဒီလိုလူ တွေရဲ့ လက်ထဲမှာ ရှိနေတာ တကယ့်ကို ဝမ်းနည်းစရာ ပါပဲ ။ သူတို့တွေဟာ ကစားခဲ့တဲ့ ပွဲစဥ်ကို လှလှပပ စိစစ်ပေးခဲ့ကြ သလို ပါပဲ ။ ဒီလို လုပ်ပေးခဲ့တဲ့ သူတို့ကို ကျွန်တော်တို့ ဂုဏ်ပြုပေးရပါ့မယ် ” လို့ နေမာက ရွဲ့စောင်း ပြောဆို သွားခဲ့လိုက် ပါတယ် ။
အဆိုပါ အဖြစ်အပျက်ရဲ့ သားကောင် ဖြစ်ခဲ့ရတဲ့ ဂါဘရီယယ် ဂျီးဆပ် ကတော့ သူ့ရဲ့ အင်စတာဂရမ် story ထဲမှာ ‘ 2 ပွဲပယ် ၊ ပြီးတော့ အယူခံ ဝင်လို့ မရ ? ဂုဏ်ပြု ပါတယ် CONMEBOL ရေ ၊ ကွင်းထဲမှာ အမှန်တကယ် ဘာဖြစ်ခဲ့သလဲ ဆိုတာ ခင်ဗျားတို့ မမြင်လိုက်ဘူး ထင်တယ် ‘ လို့ ပေါက်ကွဲ သွားခဲ့ပါသေးတယ် ။
