ချယ်လ်ဆီးအသင်းသည် အသင်းအကယ်ဒမီထွက် ကစားသမားများဖြစ်သည့် ကွင်းလယ်ကစားသမား မေဆန်မောင့်နှင့် နောက်ခံကစားသမား ရီးစ်ဂျိမ်းစ်တို့ကို နှစ်ရှည်စာချုပ်သစ်ချုပ်ဆိုရန် စီစဉ်နေကြောင်း သိရသည်။
ချယ်လ်ဆီးအသင်း၏ ပူးတွဲပိုင်ရှင်ဖြစ်သလို၊ အသင်းဥက္ကဋ္ဌအဖြစ်ပါ ဆောင်ရွက်နေသည့် တော့ဒ်ဘိုလီသည် အသင်းအတွက် အကျိုးရှိသည့် အသက် (၂၅)နှစ်အောက် ကစားသမားများကို အမေရိကန်စတိုင်စာချုပ်ပေါ်လစီအတိုင်း နှစ်ရှည်စာချုပ်ချုပ်ဆိုရန် ဆန္ဒရှိနေကြောင်း သိရသည်။
ချယ်လ်ဆီးအသင်းသည် ယခုနွေတွင် ခေါ်ယူခဲ့သည့် ကူကူရယ်လာ(၂၄ နှစ်)နှင့် ချူဝယ်မာကာ(၁၈ နှစ်)တို့ကို (၆) နှစ် စာချုပ်ချုပ်ဆိုခဲ့သည်။
ချယ်လ်ဆီးအသင်းသည် ယခုအခါ ၂၀၂၄ တွင် အသင်းနှင့်စာချုပ်သက်တမ်းကုန်ဆုံးမည့် မေဆန်မောင့် (၂၃ နှစ်)နှင့် ၂၀၂၅ တွင် စာချုပ်သက်တမ်းကုန်ဆုံးမည့် ရီးစ်ဂျိမ်းစ်(၂၂ နှစ်)တို့ကို (၇)နှစ်သက်တမ်းရှိ စာချုပ်သစ်ချုပ်ဆိုရန် စီစဉ်နေကြောင်း သိရသည်။
မေဆန်မောင့်နှင့် ရီးစ်ဂျိမ်းစ်တို့သည် ချယ်လ်ဆီးအကယ်ဒမီထွက်များဖြစ်ပြီး လက်ရှိတွင် အသင်း၏အဓိကကစားသမားများအဖြစ် ခြေစွမ်းပြလျက်ရှိသည်။
