တိုဂို လက်ရွေးစင် တိုက်စစ်မှူးဟောင်း အဒီဘာယော က ဒီရာသီ ပရီးမီးယားလိဂ်တွင် အာဆင်နယ် အသင်း နှင့် မန်စီးတီး တို့ ယှဉ်ပြိုင် နေကြတဲ့ ချန်ပီယံ ပြိုင်ပွဲမှာ အာဆင်နယ် အသင်းက မန်စီးတီးထက် ပိုပြီး အမှတ်လျော့နိုင်ချေ များတယ်လို့ သုံးသပ် ပြောကြား လိုက်ပါတယ် ။
လက်ရှိ အချိန်မှာ ပရီးမီးယားလိဂ် အမှတ်ပေး ဇယား ကို အာဆင်နယ် အသင်းက ဦးဆောင်နေတာ ဖြစ်ပေမယ့် မန်စီးတီး အသင်း က တစ်ပွဲလျော့ ကစားပြီး တစ်မှတ်အကွာ အနေအထားမှာပဲ ရှိနေတာကြောင့် ချန်ပီယံဆုက ဂွာဒီယိုလာ ရဲ့ အသင်း လက်ထဲမှာ ရှိနေသေးတဲ့ အနေအထားပါ ။
ရာသီကုန်ဖို့ ၃ ပွဲသာ လိုတော့ ချိန်မှာ အာဆင်နယ် အသင်းဟာ ဘုန်းမောက် ၊ မန်ယူနိုက်တက် ၊ အဲဗာတန် တို့ နဲ့ ကစားဖို့ ကျန်ရှိနေသေးပြီး မန်စီးတီး အသင်းကတော့ ဝုလ်ဗာဟမ်တန် ၊ ဖူလ်ဟမ် ၊ တော့တင်ဟမ် ၊ ဝက်စ်ဟမ်း တို့နဲ့ ကစားရဖို့ ကျန်နေသေးတာပါ ။
မန်စီးတီး အသင်းကို မပြောင်းမှီ အာဆင်နယ် အသင်း အတွက် ပွဲပေါင်း ၁၀၀ ကျော် ကစားပေးခဲ့ဖူးတဲ့ အဒီဘာယော က ” အာဆင်နယ် အသင်း ဘာမဆို ဖြစ်သွားနိုင်ချေ ရှိပါတယ် ။ သူတို့ ဘယ်လောက် အထိ ကောင်းသလဲ ဆိုတာ ကျနော်တို့ သိပါတယ် ၊ အသင်းက ငယ်ရွယ်ကြသလို အရည်အသွေးလည်း မြင့်မားကြပါတယ် ။ ”
” ဒါပေမဲ့ သူတို့ လက်ကျန် ၃ ပွဲမှာ ရမှတ် ၉ မှတ် ရပါ့မလားဆိုတာ မသေချာပါဘူး ။ ဘာမဆို ဖြစ်သွား နိုင်ပါတယ် ၊ ပြီးခဲ့တဲ့ နှစ်ပတ်လောက်တုန်းက သူတို့ အိမ်ကွင်းမှာ ဗီလာ ကို ရှုံးသွားခဲ့ပါတယ် ၊ မန်စီးတီး အသင်းက လက်ကျန် ပွဲ ၂၀ မှာ ပွဲ ၂၀ စလုံးကို နိုင်မယ်လို့ ခင်ဗျား ထင်သလား ဆိုရင် ကျနော်ကတော့ ထင်တယ်လို့ပဲ ဖြေမှာပါ ၊ သူတို့ လုပ်နိုင်ကြောင်း အရင်ကလည်း သက်သေပြခဲ့တာပဲလေ ။ ”
” အာဆင်နယ် က ပိုကောင်း ပိုသန်မာလာတယ် ဆိုပေမယ့် လက်ကျန် ၃ ပွဲမှာ အားလုံးကို နိုင်မယ်လို့ ကျနော်ကတော့ သေချာပေါက် မပြောရဲပါဘူး ။ ” လို့ ပြောကြား သွားခဲ့ပါတယ် ။
