အင်္ဂလန် အသင်း ခေါင်းဆောင်ဟောင်း ဒေးဗစ် ဘက်ခမ်း ဟာ ယူရို ၂၀၂၀ ဖလားကြီးကို အနိုင်ရ ဗိုလ်စွဲ ခဲ့တဲ့ အီတလီ အသင်းရဲ့ ကွင်းလယ်လူ မာကို ဗာရက်တီ ကို ဂုဏ်ပြု စကား ပြောဆို သွားခဲ့ ပါတယ် ။ ဗာရက်တီ ဟာ ဘက်ခမ်း PSG မှာ ကစား ခဲ့စဉ် တုန်းက အသင်းဖော် အဖြစ် အတူ ကစားခဲ့သူ တစ်ယောက်ဖြစ်ပြီး ယူရို ချန်ပီယံ အီတလီ အသင်းရဲ့ ကွင်းလယ်မှာ အားထားရသူ တစ်ယောက်အဖြစ် ပါဝင်ခဲ့ ပါတယ် ။
အီတလီ အသင်းဟာ အင်္ဂလန်ကို ဝင်ဘာလေ ကွင်းကြီးထဲမှာ ကစားခဲ့တဲ့ ဗိုလ်လုပွဲမှာ ပင်နယ်တီ အဆုံးအဖြတ် နဲ့ အနိုင်ရပြီး ဥရောပ ချန်ပီယံဆုကို ဒုတိယ အကြိမ်မြောက် ရယူ ပိုင်ဆိုင် နိုင်ခဲ့တာပဲ ဖြစ်ပါတယ် ။ အီတလီ ဟာ နည်းပြ မန်စီနီ လက်အောက်မှာ အထူးပုံစံကောင်း ရရှိနေပြီး ၃၄ ပွဲဆက်တိုက် ရှုံးပွဲ မရှိအောင် ကစားထား နိုင်ခဲ့ပြီ ဖြစ်ပါတယ် ။
ဘက်ခမ်း ဟာ ဝင်ဘာလေ မှာ ကစားခဲ့တဲ့ ဗိုလ်လုပွဲ ကို လာရောက် ကြည့်ရှုပြီး သူ့ရဲ့ အင်္ဂလန် အသင်းကို အားပေးခဲ့ ပါတယ် ။ အင်္ဂလန် အသင်းရှုံးနိမ့် ခဲ့ပေမယ့်လည်း ဘက်ခမ်း ကတော့ တစ်ချိန် တုန်းက မိတ်ဆွေရဲ့ အောင်ပွဲကို ဂုဏ်ပြု ပေးဖို့ တွန့်ဆုတ် မနေခဲ့ ပါဘူး ။
ဘောလုံး ကွင်းတွင်း ကွင်းပြင် အောင်မြင်နေဆဲ ဖြစ်တဲ့ ဘက်ခမ်း ဟာ ယမန်နေ့က သူ့ရဲ့ Instagram ကတဆင့် ဗာရက်တီ ရဲ့ ဓါတ်ပုံကို တင်ကာ “Congratulations my friend” လို့ ရေးသားပြီး ဗာရက်တီ နဲ့ အီတလီ အသင်းတို့ကို tag လုပ်ကာ ဂုဏ်ပြု သွားခဲ့ ပါတယ် ။
ဒါ့အပြင် ဘက်ခမ်းဟာ သူ့ရဲ့ Story မှာလည်း အီတလီ နည်းပြ ရော်ဘတ်တို မန်စီနီ ရဲ့ ပုံကို တင်ပြီး “ကျွန်တော်တို့ ချစ်တဲ့ ဘောလုံး အားကစား အပေါ် စိတ်ခံယူချက် အပြင်းပြဆုံး နိုင်ငံ တစ်ခု အတွက် ဂုဏ်ယူပါတယ်” လို့ အစချီ ရေးသားခဲ့ ပါတယ် ။ ဘက်ခမ်း ဟာ အီတလီ ကလပ် အေစီမီလန် မှာလည်း ကစားခဲ့ဖူးသူ ဖြစ်ပါတယ် ။
ဆက်လက်ပြီး ဘက်ခမ်း က သူတို့ရဲ့ အင်္ဂလန် အသင်းဟာ လာမယ့် ပြိုင်ပွဲတွေမှာ ပိုကောင်းတဲ့ အသင်း အဖြစ် နဲ့ ပြန်လာမယ့် အကြောင်းကိုလည်း သွယ်ဝိုက် သတိပေးကာ ရေးသားသွားခဲ့ ပါတယ် ။ ဒါ့အပြင် ဘက်ခမ်း ဟာ “ဥရောပချန်ပီယံ ကို ဂုဏ်ပြုပါတယ်” ဆိုတဲ့ စာသားကိုလည်း အီတလီ ဘာသာနဲ့ ရေးသား ဖော်ပြ သွားခဲ့ ပါတယ် ။
အဆိုပါ ဗိုလ်လုပွဲကို ဘက်ခမ်း အပြင် အင်္ဂလန် ဝန်ကြီးချုပ် ဘောရစ် ဂျွန်ဆင် ၊ နာမည်ကျော် ဟောလိဝုဒ် မင်းသားကြီး တွမ်ခရုစ် ၊ ကိတ်မော့စ် တို့လည်း လာရောက် အားပေး ကြည့်ရှု ခဲ့ကြတယ်လို့ သိရ ပါတယ် ။ ဘက်ခမ်း ဟာ သူ့ရဲ့ သား ၂ ယောက် ဖြစ်တဲ့ ဟာပါ ( ၁၀ နှစ် ) နဲ့ ခရုဇ် ( ၁၆ နှစ် ) တို့ကိုလည်း ဝင်ဘာလေ က ဗိုလ်လုပွဲကြီးရဲ့ အရသာကို ကြုံတွေ့ ခံစားရစေဖို့ ခေါ်ဆောင် လာခဲ့တယ်လို့လည်း သိရှိရ ပါတယ် ။
