မန်ယူအသင်းနှင့်လမ်းခွဲပြီးနောက် အသင်းလက်မဲ့ဖြစ်နေသည့် ပေါ်တူဂီတိုက်စစ်မှူး စီရော်နယ်လ်ဒိုသည် ဆော်ဒီကလပ် အယ်လ်နာဆာအသင်း၏ကမ်းလှမ်းမှုကို လက်ခံလိုက်ပြီဖြစ်ကြောင်း စပိန်သတင်းစာ Marca က ဖော်ပြခဲ့သည်။
ဆော်ဒီကလပ်အသင်းများသည် ပြီးခဲ့သည့်နွေရာသီကတည်းက စီရော်နယ်လ်ဒိုကို ခေါ်ယူရန် စိတ်ဝင်စားခဲ့ကြခြင်းဖြစ်ပြီး ယခု အသင်းလက်မဲ့ဖြစ်သွားချိန်၌ အယ်လ်နာဆာအသင်းက တရားဝင်ကမ်းလှမ်းမှု ထပ်မံပြုလုပ်ခဲ့ခြင်းဖြစ်ကြောင်း သိရသည်။
Marca ၏အဆိုအရ အယ်လ်နာဆာအသင်းသည် တစ်နှစ်လစာ ယူရိုသန်း(၂၀၀)ဝန်းကျင်ဖြင့် ကမ်းလှမ်းခဲ့ခြင်းကြောင့် စီရော်နယ်လ်ဒိုက လက်ခံခဲ့ခြင်းဖြစ်ကြောင်းလည်း သိရသည်။
စီရော်နယ်လ်ဒိုသည် မန်ယူအသင်းတွင် တစ်နှစ် ပေါင်(၅)သိန်းဝန်းကျင် ရရှိခဲ့ပြီး စာချုပ်သက်တမ်း(၇)လ ကျန်ရှိချိန်၌ စာချုပ်ဖျက်သိမ်းခဲ့ရခြင်းဖြစ်သည်။
ယင်းအတွက် ပေါင်(၁၅)သန်းဝန်းကျင် နစ်နာခဲ့ရသည့်အပြင် လာမည့်ဇန်နဝါရီ(၁)ရက်နေ့မှသာ အသင်းသစ်နှင့် လက်တွဲခွင့်ရမည် ဖြစ်ကြောင်း သိရသည်။
စီရော်နယ်လ်ဒိုသည် မေဂျာလိဂ်မှ ကလပ်အသင်းအချို့၏ စံချိန်တင်လစာနှုန်းထားဖြင့် ကမ်းလှမ်းမှု ရရှိခဲ့သော်လည်း ငြင်းပယ်ခဲ့ပြီး အယ်လ်နာဆာအသင်း၏ကမ်းလှမ်းမှုကို လက်ခံရန် ဆုံးဖြတ်ခဲ့ခြင်းဖြစ်ကြောင်း သိရသည်။
Marca က စီရော်နယ်လ်ဒိုသည် ၂၀၂၃ ဇန်နဝါရီ(၁)ရက်နေ့တွင် အယ်လ်နာဆာနှင့် စတင်လက်တွဲမည်ဖြစ်ပြီး ၂၀၂၅ ခုနှစ်အထိ စာချုပ်ချုပ်ဆိုမည်ဟု ဖော်ပြခဲ့သည်။
