ဂျူဗင်တပ်စ်အသင်း၏နည်းပြ ပီယာလိုက မိမိတို့အနေဖြင့် အမှားအယွင်းများမှသင်ယူရန် လိုအပ်နေကြောင်း ခရိုတိုနီနှင့် သရေကျခဲ့သည့်ပွဲအပြီးတွင် ဝန်ခံပြောကြားခဲ့သော်လည်း ရာသီကုန်ဆုံးချိန်၌ ချန်ပီယံအဖြစ် ထိပ်ဆုံးတွင် ရပ်တည်နိုင်မည်ဟု ယုံကြည်ကြောင်းလည်း ဆိုခဲ့သည်။
ဂျူဗင်တပ်စ်အသင်းသည် ယခုရာသီ စီးရီးအေပြိုင်ပွဲတွင် အဝေးကွင်းနှစ်ပွဲဆက်သရေကျကာ အမှတ်လျော့ခဲ့ရသည့်အတွက် ရမှတ်(၈)မှတ်သာရရှိထားသည်။
ထို့ကြောင့် နည်းပြသစ် ပီယာလို၏စွမ်းဆောင်ရည်အပေါ် မေးခွန်းထုတ်မှုများလည်း ရှိလာခဲ့သည်။
ယင်းအတွက် ပီယာလိုက ကြုံတွေ့ခဲ့ရသည့် အမှားအယွင်းများမှ သင်ယူနိုင်ရန်သာ ကြိုး ပမ်းသွားမည်ဖြစ်ပြီး မိမိ၏နည်းစနစ်ပိုင်းကို အပြောင်းအလဲပြုလုပ်ရန် အစီအစဉ်မရှိကြောင်း တုံ့ပြန်ခဲ့သည်။
ပီယာလိုက ”နောက်ဆုံးနှစ်ပွဲဆက်တိုက် ကျွန်တော်တို့ (၁၀)ယောက်တည်းနဲ့ ကစားခဲ့ရပါတယ်။ ဒါ ကျွန်တော်တို့ရဲ့ အမှားတွေပါပဲ။ ကျွန်တော်တို့အသင်းက လူငယ်ကစားသမားတွေ များပြားတာကြောင့် အတွေ့အကြုံပိုင်းမှာ လိုအပ်ချက်ရှိပါတယ်။ ဒါကြောင့် အခုလို အမှားအယွင်းတွေကို ကြုံတွေ့ရနိုင်ပါတယ်။ ဒီအမှားတွေပေါ်ကနေ သင်ယူသွားရမှာပါ။ ကျွန်တော်တို့က အရည်အသွေးမြင့်မားတဲ့ကစားသမားတွေနဲ့ တည်ဆောက်ထားတဲ့အသင်းပါ။ ဒါပေမဲ့ အချိန်တော့ လိုအပ်ပါတယ်။ အခုလိုအခြေအနေနဲ့ စောစောစီးစီးရင်ဆိုင်ရတဲ့အတွက် စွန့်စားရသလိုတော့ ဖြစ်ခဲ့ပါတယ်။ ဒီရာသီ စီးရီးအေပြိုင်ပွဲက ချန်ပီယံဆုကို စိန်ခေါ်နိုင်တဲ့အသင်းတွေ များပြားတာကြောင့် တိုက်ပွဲတစ်ခုအသွင် ဖြစ်လာပေမယ့် ထိပ်ဆုံးနေရာနဲ့ အဆုံးသတ်နိုင်လိမ့်မယ်လို့ ကျွန်တော် ယုံကြည်ပါတယ်”ဟု ပြောကြားခဲ့သည်။
ဂျူဗင်တပ်စ်အသင်းသည် ရာသီအဖွင့်ပွဲတွင် ဆမ်ဒိုးရီယားကို (၃-၀)ဂိုးဖြင့် အနိုင်ရခဲ့သော်လည်း ရိုးမား၊ ခရိုတိုနီတို့နှင့် သရေကျခဲ့ပြီး နာပိုလီနှင့်ပွဲတွင်လည်း မကစားရဘဲ (၃)မှတ်ရခဲ့ခြင်းဖြစ်သည်။
ထို့ကြောင့် ပီယာလိုအနေဖြင့် အစမ်းသပ်မခံနိုင်သေးသည့် အနေအထားဖြစ်နေပြီး ဂျူဗင်တပ်စ်နည်းပြဘဝ ချန်ပီယံလိဂ်ပွဲဦးထွက်ကိုလည်း ယခုတစ်ပတ် ထပ်မံရင်ဆိုင်ရမည်ဖြစ်သည်။
စီရော်နယ်လ်ဒိုအပါအဝင် ကစားသမားအချို့ ကိုရိုနာဗိုင်းရပ်စ်ပြဿနာ၊ ဒဏ်ရာပြဿနာများလည်းရှိနေခြင်းကြောင့် ပီယာလိုအနေဖြင့် ဖိအားများတိုးလာဖွယ်ရှိကြောင်း သုံးသပ်မှုများလည်းရှိနေသည်။
ဂျူဗင်တပ်စ်အသင်းသည် ပီယာလိုကို နည်းပြအဖြစ် (၂)နှစ်စာချုပ်ဖြင့် ခန့်အပ်ထားခြင်းဖြစ်ပြီး ကစားသမားသစ်(၅)ဦး လည်း ခေါ်ယူအားဖြည့်ပေးထားသည်။
