အမေရိကန်တွင် ဥရောပစူပါလိဂ်ပုံစံ ဖိတ်ခေါ်ခြေစမ်းပွဲကစားရန် ဂျူဗင်တပ်စ်နှင့် အေစီမီလန်အသင်း စီစဉ်ထား

လာမည့်နွေရာသီကာလတွင် ဂျူဗင်တပ်စ်နှင့် အေစီမီလန်အသင်းတို့သည် အမေရိကန်နိုင်ငံသို့သွားရောက်၍ ဥရောပစူပါလိဂ်ပုံစံ ဖိတ်ခေါ်ခြေစမ်းပွဲကစားရန် စီစဉ်ထားကြောင်း သိရသည်။

Tuttosport က ဂျူဗင်တပ်စ်နှင့် အေစီမီလန်အသင်းတို့သည် အဆိုပါဖိတ်ခေါ်ခြေစမ်းပွဲသို့ ဥရောပစူပါလိဂ်စီမံကိန်းစတင်ရန် တောင်းဆိုခဲ့သည့် (၈)သင်းထဲတွင်ပါဝင်သော ဘာစီလိုနာနှင့် ရီးယဲလ်အသင်းတို့ကို ဖိတ်ခေါ်သွားမည်ဖြစ်ကြောင်း ဖော်ပြခဲ့ သည်။

ပြီးခဲ့သည့်နှစ်အတွင်းက ဂျူဗင်တပ်စ်အသင်းဥက္ကဋ္ဌ အက်ဂ်နယ်လီ၊ ရီးယဲလ်အသင်းဥက္ကဋ္ဌ ဖလော်ရင်တီနိုပီရက်ဇ်၊ မန်ယူအသင်းဒု-ဥက္ကဋ္ဌ ဂျိုရယ်လ်ဂလေဇာ၊ လီဗာပူးလ်အသင်း ဒု-ဥက္ကဋ္ဌ ဂျွန်ဟင်နရီနှင့် အာဆင်နယ်အသင်းဒု-ဥက္ကဋ္ဌ ခရွန်ကီတို့ ဦးဆောင်၍ ဥရောပစူပါလိဂ်စီမံကိန်းစတင်ရန် စီစဉ်ခဲ့သည်။

သို့သော် ပရိသတ်များ၊ ကစားသမားများနှင့် အားကစားဂျာနယ်လစ်များက ကန့်ကွက်ခဲ့သလို၊ ဖီဖာ နှင့် UEFA ကလည်း သတိပေးတားမြစ်သဖြင့် ပျက်ပြယ်ခဲ့ရသည်။

ယခုအခါ အက်ဂ်နယ်လီနှင့် ဖလော်ရင်တီနိုပီရက်ဇ်တို့သည် ဥရောပစူပါလိဂ်ပုံစံ တန်ဖိုးမြင့်ခြေစမ်းပွဲတစ်ရပ်ဖန်တီးရန် ဆွေးနွေးမှုများပြုလုပ်နေကြောင်း သိရသည်။

ဂျူဗင်တပ်စ်အသင်းသည် ၂၀၁၈ ခုနှစ်အတွင်းက အမေရိကန်နိုင်ငံသို့ သွားရောက်၍ International Champions Cup ပြိုင်ပွဲကစားခဲ့ဖူးပြီး ယူရို (၆)သန်းမှ (၇)သန်းကြား ဆုကြေးရရှိခဲ့ဖူးကြောင်း သိရသည်။