ရီးယဲလ်မက်ဒရစ်အသင်းနည်းပြ ဇီဒန်းက ၎င်း၏အနာဂတ်နှင့်ပတ်သက်ပြီး မီဒီယာများ၏မေးမြန်းမှုကို ဒေါသတကြီး ငြင်းဆန်ခဲ့ကြောင်းသိရသည်။
ဇီဒန်းသည် ရီးယဲလ်မက်ဒရစ်အသင်းအား ပြီးခဲ့သည့် ၂၀၁၉ ခုနှစ် မတ်လအတွင်းက ဒုတိယအကြိမ် ပြန်လည်ကိုင်တွယ်ခဲ့ပြီးနောက် ပြီးဆုံးခဲ့သည့် ၂၀၁၉-၂၀ ဘောလုံးရာသီတွင် အသင်းနှင့်အတူ လာလီဂါချန်ပီယံဆုနှင့် စပိန်စူပါဖလားချန်ပီယံဆုများကို ရယူနိုင်ခဲ့သည်။
သို့သော် ဇီဒန်းအနေဖြင့် ချန်ပီယံလိဂ်ပြိုင်ပွဲတွင် ၎င်း၏နည်းပြသက်တမ်းတစ်လျှောက် ပထမဆုံးအကြိမ် ရှုံးထွက် (၁၆)သင်းအဆင့်မှ ထွက်ခွာခဲ့ရပြီးနောက် ရီးယဲလ်မက်ဒရစ်နှင့် အနာဂတ်အခြေအနေကို မီဒီယာများက မေးမြန်းခဲ့ခြင်းဖြစ်သည်။
ယင်းမေးခွန်းများနှင့်ပတ်သက်ပြီး ဇီဒန်းက ”ကျွန်တော် ဒီနေရာ (ရီးယဲလ်နည်းပြရာထူး) မှာပဲ ရှိနေပါတယ်။ တစ်စုံတစ်ခု ဖြစ်ခဲ့တဲ့တိုင်အောင် ကျွန်တော်ဟာ ရီးယဲလ်မက်ဒရစ်ရဲ့နည်းပြပါပဲ။ ခင်ဗျားတို့ (မီဒီယာသမားများ)အနေနဲ့ ဘယ်အရာမှ တွေးနေစရာမလိုပါဘူး။ ကျွန်တော်ဟာ ရီးယဲလ်မက်ဒရစ်ရဲ့ နည်းပြပါပဲ”ဟု မန်စီးတီးနှင့် ပွဲအပြီးသတင်းစာရှင်းလင်းပွဲတွင် မီဒီယာများကို တုံ့ပြန်ပြောကြားခဲ့သည်။
လက်ရှိတွင် ဇီဒန်းအနေဖြင့် လာမည့် ၂၀၂၀-၂၁ ရာသီသစ်အတွက် အစီအစဉ်များကိုရေးဆွဲနေပြီး အကောင်းဆုံးစတင်နိုင်ရန် ပြင်ဆင်နေကြောင်းလည်း သိရသည်။
ဇီဒန်းက ”ရှုံးပွဲကြုံတွေ့တဲ့အခါမှာ ကျွန်တော်တို့တစ်သင်းလုံး မပျော်ရွှင်ပါဘူး။ ဒါသေချာပါတယ်။ ဒါပေမဲ့ ကျွန်တော်တို့အနေနဲ့ အကောင်းဆုံးရာသီတစ်ခုကို ဖြတ်သန်းနိုင်ခဲ့တဲ့အတွက် ဂုဏ်ယူနိုင်ပါတယ်။ လက်ရှိမှာတော့ ကျွန်တော်တို့အနေနဲ့ အနည်း ငယ်အနားယူဖို့လိုအပ်ပြီး၊ ပြီးခဲ့ရင်တော့ ရာသီသစ်ကို အကောင်းဆုံးစတင်နိုင်ဖို့ ပြင်ဆင်ပါမယ်”ဟု ပြောကြားခဲ့သည်။
ဇီဒန်းသည် ရီးယဲလ်မက်ဒရစ်အသင်းကို (၂)ကြိမ်ကိုင်တွယ်ရာတွင် ဆုဖလား (၁၁)လုံးအထိ ရယူထားနိုင်ခဲ့သည်။
