အက်သလက်တီကိုတွင် ပွဲထွက်ခွင့်ရရန် ရုန်းကန်နေရသည့် ဆွာရက်ဇ် ပရီးမီးယားလိဂ်သို့ ပြန်လည်ပြောင်းရွှေ့ရန် ဆန္ဒရှိနေ

အက်သလက်တီကိုအသင်းတွင် ပုံမှန်ပွဲထွက်ခွင့်ရရန် ရုန်းကန်နေရသည့် ဥရုဂွေး ၀ါရင့်တိုက်စစ်မှူး ဆွာရက်ဇ်သည် ယခုဇန်နဝါရီအပြောင်းအရွှေ့ကာလတွင် ပရီးမီးယားလိဂ်သို့ ပြန်လည်ပြောင်းရွှေ့ကစားရန် ဆန္ဒရှိနေကြောင်း ဗြိတိန်သတင်းစာ Daily Mail က ဖော်ပြခဲ့သည်။

အသက် ၃၄ နှစ်အရွယ်ရှိ ဆွာရက်ဇ်သည် ယခုရာသီတွင် အက်သလက်တီကိုအသင်း၌ ပုံမှန်ပွဲထွက်ခွင့်ရရန် ရုန်းကန်နေရပြီး လာလီဂါတွင် သုံးပွဲသာ ပွဲချိန်ပြည့်ကစားခွင့်ရထားကြောင်း သိရသည်။ အက်သလက်တီကိုနည်းပြ ဆီမြွန်နီသည် အသင်းတိုက်စစ် ပိုင်းတွင် ဂျော်အိုဖေးလစ်၊ ကော်ရီယာ၊ ကန်ညာနှင့် ဂရီးဇ်မန်းတို့ကို ဦးစားပေးအဖြစ် အသုံးပြုနေပြီး ဆွာရက်ဇ်ကို အရန်အဖြစ်သာ သတ်မှတ်ထားကြောင်း သိရသည်။ ဆွာရက်ဇ်သည် လာမည့် ၂၀၂၂ ကမ္ဘာ့ဖလားပြိုင်ပွဲတွင် ပါဝင်ယှဉ်ပြိုင်လိုသည့်အတွက် ပုံမှန်ပွဲထွက် ကစားရန်အလိုရှိနေပြီး ပရီးမီးယားလိဂ်သို့ ပြန်လည်ပြောင်းရွှေ့ရန် စီစဉ်နေကြောင်း သိရှိရသည်။

ဆွာရက်ဇ်အနေဖြင့် တောင်အမေရိက ကလပ်များထံမှ ကမ်းလှမ်းမှုရရှိထားသော်လည်း ပရီးမီးယားလိဂ်အသင်းများတွင်သာ ကစားလိုနေကြောင်း သိရသည်။ ဆွာရက်ဇ်သည် ကနဦးက ၎င်း၏လီဗာပူးလ်အသင်းဖော်ဟောင်းဖြစ်သူ စတီဗင်ဂျရတ် ကိုင်တွယ်နေ သည့် အက်စတွန်ဗီလာသို့ ပြောင်းရွှေ့ကစားရန် ဆန္ဒရှိနေကြောင်း သတင်းများထွက်ပေါ် ခဲ့သေးသည်။

သို့သော် အက်စတွန်ဗီလာအသင်းအနေဖြင့် ကော်တင်ဟိုကို ခေါ်ယူထားသဖြင့် ဆွာရက်ဇ်ကို ထပ်ခေါ်ဖွယ်မရှိကြောင်း Daily Mail က ဖော်ပြခဲ့သည်။