အာဆင်နယ် ကွင်းလယ်လူဟောင်း ပေါလ်မာဆွန်က တော့တင်ဟမ် အနေနဲ့ အကယ်လို့များ ဒီနွေရာသီမှာ တိုက်စစ်မှုး ဟယ်ရီကိန်းကို လက်လွှတ်ခဲ့ရမယ် ဆိုရင် ဝုဖ်ဗာဟမ်တန် အသင်းရဲ့ တိုက်စစ်မှုး ရာအူးဂျီမီနက်နဲ့ ပြန်လည် အစားထိုးသင့်တယ်လို့ ပြောလိုက်ပါတယ်။ အင်္ဂလန် လက်ရွေးစင် ကိန်းဟာ ယခု နွေရာသီ အစမှာ တော့တင်ဟမ် ကနေ ထွက်ခွာဖို့ ဆန္ဒ ရှိတယ်လို့ ကလပ် အသင်းထံ အသိပေးခဲ့ပါတယ်။
ပရီးမီးယားလိဂ် ပြိုင်ဘက်တွေ ဖြစ်ကြတဲ့ မန်ချက်စတာစီးတီး နဲ့ မန်ချက်စတာယူနိုက်တက် တို့ဟာ အသက် ၂၇ နှစ် အရွယ် ကိန်းကို ခေါ်ယူဖို့ စိတ်ဝင်စားနေကြပေမယ့်လည်း တော့တင်ဟမ် ဘက်ကတော့ ကိန်း အတွက် ပေါင်သန်း ၁၅၀ ပတ်ဝန်းကျင် ရမှသာ ရောင်းချသွားဖို့ စဉ်းစား သွားမှာ ဖြစ်တယ်လို့ သိရပါတယ်။
ဒါပေမယ့် မာဆွန်က အကယ်၍ ကိန်းသာ ဒီနွေရာသီမှာ တော့တင်ဟမ် ကနေ ထွက်ခွာ ဖြစ်ခဲ့မယ် ဆိုရင် စပါး အနေနဲ့ မက္ကဆီကို လက်ရွေးစင် ဂျီမီနက်ကို ခေါ်ယူကာ ၎င်းရဲ့ နေရာမှာ ပြန်လည် အစားထိုးသင့်တယ်လို့ အကြံပေးလိုက်ပါတယ်။ အသက် ၃၀ အရွယ် ဂျီမီနက်ဟာ ပြီးခဲ့တဲ့ ရာသီက ပြင်းထန်တဲ့ ဦးခေါင်းဒဏ်ရာကြောင့် တစ်ရာသီလုံး နီးပါး နားခဲ့ရပေမယ့်လည်း ဝုဖ် အတွက် ၆၆ ပွဲမှာ ၃၁ ဂိုးထိ သွင်းယူခဲ့ ပါတယ်။ မာဆွန်က ဂျီမီနက်ဟာ ပရီးမီးယားလိဂ်မှာ ထူးချွန်သလောက် ချီးကျူးခံရခြင်း မရှိဆုံး ကစားသမား တစ်ဦး ဖြစ်တယ်လို့ မှတ်ချက်ပေးခဲ့ပါတယ်။
မာဆွန်က “ကျွန်တော်ဟာ ဝုဖ်ရဲ့ ရာအူးဂျီမီနက်ကို အချိန် အတော်ကြာ စောင့်ကြည့်လေ့လာ ခဲ့ပါတယ်။ ပရီးမီးယားလိဂ်ရဲ့ big sex ဟာ သူ့ရဲ့ အရည်အသွေး အပေါ် သတိမပြုမိကြတဲ့ အတွက် ကျွန်တော် အလွန် အံ့အားသင့်မိ ပါတယ်။ ဂျီမီနက်ဟာ ဝုဖ်ကို ပရီးမီးယားလိဂ်မှာ ၂ ရာသီဆက် အဆင့် ၇ နေရာ ရရှိအောင် စွမ်းဆောင်ပေးခဲ့သူပါ။ ပြီးခဲ့တဲ့ ရာသီက သူ မရှိတဲ့ အချိန်မှာ ဝုဖ်အသင်း ဘယ်လောက် ရုန်းကန် ခဲ့ရသလဲ ဆိုတာ တွေ့မြင်နိုင် ပါတယ်။
ရာအူးဂျီမီနက်ဟာ ဝုဖ်ရဲ့ ရည်မှန်းချက် အတွက် အရေးပါတဲ့ သူပါ။ သူတို့ရဲ့ မန်နေဂျာဟောင်း နူနိုဆန်တို ကလပ်ကနေ ထွက်ခွာ ခဲ့ရတာ ကလည်း ပြီးခဲ့တဲ့ ရာသီက ဂျီမီနက် ဒဏ်ရာ ရခဲ့လို့ ဖြစ်ပါတယ်။ နူနိုဆန်တိုရဲ့ ဝုဖ်အသင်းဟာ ပြီးခဲ့တဲ့ ရာသီက ဘန်လေကို ဆိုးဆိုးရွားရွား ရှုံးနိမ့်ခဲ့တာတွေ ရှိခဲ့ပြီး ပရီးမီးယားလိဂ်ရဲ့ တန်းဆင်း အန္တရာယ်နဲ့ ရင်ဆိုင်ဖို့ နီးစပ်ခဲ့ပါတယ်။
အခု နူနိုဆန်တိုဟာ မြောက်လန်ဒန်ကို ရောက်ရှိနေပြီ ဖြစ်တာကြောင့် စပါး အနေနဲ့ ဟယ်ရီကိန်းရဲ့ နေရာမှာ အစားထိုးဖို့ အတွက် တိုက်စစ်မှုးတွေ ရှာဖွေနေမှာပါ။ အင်္ဂလန် အသင်းခေါင်းဆောင်ဟာ စပါး ကနေ ထွက်ခွာနိုင်ခြေ ရှိနေပါတယ်။ ဒီအတွက် နူနိုဆန်တိုဟာ သူ့နေရာမှာ ပြန်လည် အစားထိုးမယ့်သူ လိုအပ်နေပြီး ကျွန်တော် ကတော့ ရာအူးဂျီမီနက်ဟာ ဒီနေရာကို အကောင်းဆုံး ပြန်လည် အစားထိုးပေးနိုင်မယ်လို့ ထင်ပါတယ်။
သူဟာ ဆွန်ဟောင်မင်းရဲ့ အကောင်းဆုံး ပုံစံကို ရရှိအောင် ကူညီပေးနိုင်ပြီး ပရီးမီးယားလိဂ်ရဲ့ အကောင်းဆုံးတွေ ထဲက တစ်ဦးလည်း ဖြစ်ပါတယ်။ ကျွန်တော်ကတော့ သူ့ကို ဘာကြောင့် ပရီးမီးယားလိဂ် ထိပ်တန်း အသင်းကြီးတွေ ခေါ်ယူဖို့ မကြိုးစားသလဲ ဆိုတာ နားလည်လို့ မရပါဘူး။ သူဟာ ဒီအချိန်မှာ အကောင်းဆုံး တိုက်စစ်မှုးတွေ ထဲက တစ်ဦး ဖြစ်ပြီး ပရီးမီးယားလိဂ်ရဲ့ underrated အဖြစ်ဆုံး ကစားသမား တစ်ဦး ဖြစ်ပါတယ်။”
