Football London ရဲ့သတင်းထောက် Tom Canton ကတော့ သူ့ရဲ့ You Tube Channel မှာ ဘရိုက်တန် ကွင်းလယ်လူ ကိုင်စီဒို ရဲ့နွေရာသီ အပြောင်းအရွှေ့အခြေအနေ အကြောင်း ဆွေးနွေး ပြောဆို သွားခဲ့ပြီး အီကွေဒေါသားဟာ အာဆင်နယ် ကို ပြောင်းဖို့ စိတ်အား ထက်သန်နေကြောင်း ပြောကြား သွားခဲ့ပါတယ် ။
အာဆင်နယ် အသင်းဟာ ဘရိုက်တန် အသင်းဆီကနေ ဘန်ဝှိုက် ၊ ထရောဆက်ဒ် တို့ကို ခေါ်ယူခဲ့ဖူးတဲ့ အသင်း ဖြစ်ပြီး ၊ ပြီးခဲ့တဲ့ ဇန်နဝါရီမှာလည်း အီကွေဒေါ လက်ရွေးစင် ကိုင်စီဒို ကို ခေါ်ယူဖို့ ကြိုးပမ်း ခဲ့တာပါ ။ အာဆင်နယ် အသင်းဟာ ကိုင်စီဒို အတွက် ပေါင် သန်း ၆၀ နဲ့ ကနဦး ကမ်းလှမ်းခဲ့ပြီးဘရိုက်တန် ဘက်က ချက်ချင်း ငြင်းဆန် ပယ်ချ ခဲ့ပါတယ် ။
အာဆင်နယ် အသင်းရဲ့ ကမ်းလှမ်းမှု အပြီးမှာ ကိုင်စီဒို ကိုယ်တိုင်က ဘရိုက်တန် အသင်းကနေ ထွက်ခွာခွင့်ပေးဖို့ လူသိရှင်ကြား တောင်းဆို ခဲ့ပါတယ် ။ အဲ့ဒီနောက် အာဆင်နယ် အသင်းဟာ ပေါင် ၆၅ သန်း နဲ့ ဒုတိယ အကြိမ် ကမ်းလှမ်း ခဲ့ပေမယ့် ဘရိုက်တန် အသင်းဘက်ကတော့ သူတို့ရဲ့ ‘Not for sale’ ဆိုတဲ့ သဘောထားကို လုံးဝ ပြောင်းလဲခြင်း မရှိဘဲ ထပ်မံ ပယ်ချ ခဲ့ပြန်ပါတယ် ။
ဒီနှစ် နွေရာသီမှာတော့ ဘရိုက်တန် အသင်းဟာ ကိုင်စီဒို အတွက် သူတို့ လက်ခံနိုင်တဲ့ ပမာဏ နှင့် ကမ်းလှမ်းလာပါက လက်ခံ ရောင်းချ သွားမှာ ဖြစ်တယ်လို့ Tom Canton က ဆိုလိုက်ပါတယ် ။ ” ဘောလုံး မှာ ပိုက်ဆံ က စကား အများကြီး ပြောတာကြောင့် သူ အာဆင်နယ် ကို ရောက်ပါ့မလား ဆိုတာ ကျနော် စိုးရိမ်မှုတော့ ရှိပါတယ် ။ ”
” ဒါပေမယ့် သူ့အနေနဲ့ အခုထက် မြင့်မားတဲ့ အသင်းကို ပြောင်းဖို့ ရည်မှန်းချက် ထားသင့်တယ် ဆိုတာကိုတော့ ကျနော် သဘောတူပါတယ် ။ အာဆင်နယ် က သူ့ရည်မှန်းချက် နဲ့ သေချာပေါက် ကိုက်ညီတဲ့ အသင်းပါ ၊ နောက်ပီး သူက အာဆင်နယ် ပရိသတ် အကြီးစားပါ ၊ သူ အာဆင်နယ်ကိုလည်း သဘောကျပါတယ် ၊ အာဆင်နယ် ဘက်ကသာ ဘရိုက်တန် လက်ခံ နိုင်လောက်တဲ့ ငွေကြေး ပမာဏ နှင့် ကမ်းလှမ်းရင် သူ အာဆင်နယ် ကို ပြောင်းဖို့ စိတ်အားထက်သန်နေမှာပါ ” လို့ ပြောကြား သွားခဲ့ပါတယ် ။
