PSG အသင်းအနေဖြင့် ယခုနွေရာသီတွင် မက်ဆီနှင့် ရာမို့စ်ကဲ့သို့ သက်ကြီးကစားသမားများ ခေါ်ယူခဲ့ခြင်းအတွက် လာလီဂါပြိုင်ပွဲဥက္ကဋ္ဌ ဟာဗီယာတီဘက်စ်၏ လှောင်ပြောင်မှုကို PSG အသင်း အထွေထွေအတွင်းရေးမှူး ဗစ်တိုရီယာနိုမယ်လီရိုက ပြန်လည်တုံ့ပြန်ခဲ့ကြောင်း သိရသည်။
တီဘက်စ်သည် PSG အသင်း၏ ငွေကြေးသုံးစွဲမှုကို အမြဲလိုလို ဝေဖန်လေ့ရှိသူဖြစ်ပြီး ယခုအကြိမ်တွင်လည်း မက်ဆီ(၃၄ နှစ်)နှင့် ရာမို့စ်(၃၅ နှစ်) တို့ကို ခေါ်ယူမှုနှင့်ပတ်သက်၍ ဝေဖန်ခဲ့ခြင်းဖြစ်သည်။
မက်ဆီနှင့် ရာမို့စ်တို့ကို ခေါ်ယူမှုနှင့်ပတ်သက်၍ တီဘက်စ်က ကစားသမားအချို့၏အသက်အရွယ်မှာ League of Legends ဂိမ်းကဲ့သို့ဖြစ်နေကြောင်း၊ လာလီဂါတွင်မူ ဗင်နီစီယပ်စ်ကဲ့သို့ လူငယ်ကစားသမား များရှိနေကြောင်း၊ PSG အသင်း၏လုပ်ရပ်များမှာ စူပါလိဂ်ကဲ့သို့ပင် အန္တရာယ်ရှိကြောင်း၊ မက်ဆီမရှိသော်လည်း လာလီဂါမှာ ဆက်လက်တိုးတက်နေဆဲဖြစ်ကြောင်း၊ နိုင်ငံပိုင် ကလပ်များကို ဆန့်ကျင်ရမည်ဖြစ်ကြောင်း၊ အဆိုပါကလပ်များမှာ စူပါလိဂ်ကဲ့သို့ပင်ရန် သူများဖြစ်ကြောင်း သုံးသပ်ပြောကြားထားသည်။
၎င်း၏ဝေဖန်မှုကို PSG အသင်း အထွေထွေအတွင်းရေးမှူး မယ်လီရိုက “ပြင်သစ်လိဂ်က ခင်ဗျားလိဂ်လိုမဟုတ်ဘဲ ခိုင်မာတဲ့ ဘဏ္ဍာ ရေးစည်းမျဉ်းတွေရှိတယ်။ စပိန်ကလပ်တွေနဲ့ ခင်ဗျားရဲ့လိဂ်ကသာ လွဲမှားတဲ့စီမံခန့်ခွဲမှုတွေကြောင့် အကြွေးတွေရင်ဆိုင်နေရတဲ့အဆင့်ဖြစ်နေပြီဆိုတာ အခုဆိုရင် အားလုံးလည်း သိနေပါပြီ”ဟု ကြေညာထုတ်ပြန်၍ တုံ့ပြန်ခဲ့ခြင်းဖြစ်သည်။
