၂၀၂၀-၂၁ ဘောလုံးရာသီ ရဲ့ အဖွင့် ပွဲစဉ် ဖြစ်တဲ့ လန်ဒန် ဒါဘီမှာ ဧည့်သည် အာဆင်နယ် အသင်းဟာ တန်းတက် ဖူလ်ဟမ် အသင်းကို သုံးဂိုးပြတ် အနိုင် ရသွားခဲ့ပြီး အနိုင်သုံးမှတ် ၊ Clean-Sheet နဲ့ အတူ အဖွင့်လှ သွားခဲ့ပါတယ် ။
အာဆင်နယ် အသင်းဟာ ပွဲအစ ၈ မိနစ်မှာတင် လာကာဇက် ရဲ့ သွင်းဂိုး နဲ့ ပွဲကို ဦးဆောင် နိုင်ခဲ့ပြီး ဒုတိယပိုင်းမှာတော့ နောက်ခံလူသစ် ဂါဘရီယဲလ် မက်ဂါလွိုက်စ် ၊ အသင်း ခေါင်းဆောင် တိုက်စစ်မှူး အူဘာမီယန်း ရဲ့ သွင်းဂိုးတွေ နဲ့ အတူ သုံးဂိုးပြတ် အနိုင် ရခဲ့တာပါ ။
ပရီးမီးယားလိဂ် အဖွင့်ပွဲစဉ် ဖြစ်တဲ့ ဖူလ်ဟမ် ၀-၃ အာဆင်နယ် ပွဲမှ ထူးထူးခြားခြား ပြောစရာ ဖြစ်ခဲ့တဲ့ အကြောင်းအရာများကို ဖော်ပြ ပေးလိုက်ပါတယ် ။
အဖွင့်လှသွားခဲ့တဲ့ ဝီလီယံ
ဝီလီယံ ဟာ ဒီနွေရာသီ အပြောင်းအရွှေ့ကာလမှာ ချဲလ်ဆီး ကနေ အာဆင်နယ် ကို ရောက်ရှိ လာခဲ့သူပါ ။ အသက် ၃၂ နှစ် ရှိပြီ ဖြစ်သလို စာချုပ်ကလည်း သုံးနှစ်ချုပ်ခဲ့ရတာကြောင့် ဝီလီယံ ရဲ့ ခြေစွမ်း အပေါ် သံသယဝင်မှုတွေ ရှိနေ ခဲ့ကြပါတယ် ။
ဒါပေမယ့်လည်း ဝီလီယံ ကတော့ သူ့ရဲ့ ပွဲဦးထွက်မှာ အူဘာမီယန်း ၊ လာကာဇက် တို့နဲ့ အတွဲညီညီ ကစား နိုင်ခဲ့ပြီး အာဆင်နယ် အသင်း ရရှိတဲ့ သွင်းဂိုး ၃ ဂိုးစလုံးမှာ ပါဝင် ပတ်သက် ခဲ့ကာ assist hat-trick ရရှိ သွားခဲ့ပါတယ် ။
အာဆင်နယ် အသင်းရဲ့ ဗဟို ခံစစ် အတွက် အဖြေရှာတွေ့သွားပြီလား ?
အာဆင်နယ် အသင်းဟာ ဖူလ်ဟမ် နဲ့ ပွဲမတိုင်မှီ ဗဟို နောက်ခံလူ ငါးဦး အထိ ဒဏ်ရာ ရနေတာကြောင့် အာတီတာ ဟာ ကစားသမားသစ် ဂါဘရီယဲလ် မက်ဂါလွိုက်စ် ကို ပွဲထွက် ကစားခွင့် အခွင့် အရေး ပေးခဲ့ပါတယ် ။
ဂါဘရီယဲလ် ဟာ ဖူလ်ဟမ် နဲ့ ပွဲမှာ သူ့ရဲ့ ရုပ်ပိုင်းဆိုင်ရာ ကြံ့ခိုင်မှုကို ပြသ နိုင်ခဲ့သလို အမြင့်ဘော တွေ ရှင်းထုတ်ရာမှာလည်း ပြိုင်ဘက်တွေကို အသာရခဲ့ပါတယ် ။ ဒါ့အပြင် ဂါဘရီယဲလ် ဟာ အာဆင်နယ် အတွက် ဂိုးပါ သွင်းပေးခဲ့ပြီး ပွဲဦးထွက်မှာ ဂိုးသွင်းတဲ့ ၁၀ ယောက်မြောက် အာဆင်နယ် ကစားသမား ဖြစ်လာခဲ့ပါတယ် ။
ဂါဘရီယဲလ် ဟာ ဖူလ်ဟမ် နဲ့ ပွဲမှာ ဘောလုံး ထိတွေ့မှု အများဆုံး ကစားသမား (၁၂၁ကြိမ်) ၊ အောင်မြင်တဲ့ ဘောလုံးပေးပို့မှု အကြိမ်ရေ အများဆုံး ကစားသမား(၁၀၇ကြိမ်) ၊ ဘောလုံး ဖျက်ထုတ်မှု အများဆုံးကစားသမား (၂ကြိမ်) ၊ ဘောလုံး ရှင်းထုတ်မှု အများဆုံး ကစားသမား(၃ ကြိမ်) ဆိုတဲ့ မှတ်တမ်းတွေကို ပိုင်ဆိုင် ခဲ့ပါတယ် ။ ဒါ့အပြင် BT Sports ရဲ့ MOTM ဆုကိုလည်း ရရှိ သွားခဲ့ပါတယ် ။
ပွဲထွက်ခွင့် နဲ့ ထိုက်တန်ကြောင်း သက်သေပြခဲ့တဲ့ လာကာဇက်
လာကာဇက် ဟာ ပြီးခဲ့တဲ့ရာသီကုန်ခါနီးမှာ သူ့ရဲ့ ပွဲထွက် တစ်နေရာကို အန်ခီးတီးယား ကို လွှဲပြောင်း ပေးခဲ့ရပြီး အသင်းကနေ ထွက်ခွာဖို့ အထိ သတင်း ထွက်ခဲ့သူပါ ။ ဒီရာသီမှာတော့ အာတီတာ ဟာ လာကာသစ်ဇက် ကို ပြန်ကစားခွင့် ပေးခဲ့ပြီး ပြင်သစ်သားဟာ အာတီတာ ရဲ့ ယုံကြည်မှုကို သွင်းဂိုး တစ်ဂိုး နဲ့ အတူ ပြန်လည် ပေးဆပ် ခဲ့ပါတယ် ။
အာတီတာ ရဲ့ ထိရောက်တဲ့ နည်းဗျူဟာ
အာတီတာ ဟာ လီဗာပူး ကို အနိုင်ရခဲ့တဲ့ ပွဲက နည်းဗျူဟာ ကို ဒီနေ့ပွဲမှာလည်း ထပ်မံ အသုံးပြု ခဲ့ပါတယ် ။ ဖူလ်ဟမ် အသင်း ဘောလုံး ရသွားချိန်မှာ မိတ်လန်နိုင်းလ်စ် ဟာ ဘယ်ဘက် နောက်ခံလူ နေရာကို ဝင်ကစားပြီး ခံစစ် ၅ ယောက်တန်း ပြောင်းကစားခဲ့ပါတယ် ။
အာဆင်နယ် ဘောလုံး ရချိန်မှာတော့ မိတ်လန်နိုင်းလ်စ် ဟာ ကွင်းလယ်ကို ဝင်ကစားခဲ့ပြီး တီယာနေး က ခံစစ် အစွန်လူ အဖြစ် တိုက်စစ်ကို လိုက်ပါ ကစားခဲ့ပါတယ် ။ မိတ်လန်နိုင်းလ်စ် ဟာ အာတီတာ ရဲ့ နည်းဗျူဟာ မှာ အံဝင်အောင် ကစား နိုင်ခဲ့ပြီး အူဘာမီယန်း ကို ထောက်ပံ့ ပေးခဲ့ပါတယ် ။
