အာဆင်နယ်အသင်းနည်းပြ အာတီတာက နယူးကာဆယ်အသင်းအား (၃-၀)ဂိုးဖြင့် အနိုင်ရသည့်ပွဲအပြီးတွင် အသင်းမှကွင်းလယ် ကြယ်ပွင့်များဖြစ်သည့် စမစ်ရိုးနှင့် ဆာကာတို့အား ချီးကျူးမှုများပြုလုပ်ခဲ့သည်။
အာဆင်နယ်အသင်းသည် ယင်းပွဲတွင် အူဘာမီယန်း(၂ ဂိုး)၊ ဆာကာတို့၏သွင်းဂိုးများဖြင့် အနိုင်ရပြီး အမှတ်ပေးဇယားတွင် ထိပ်ဆုံး ၁၀ သင်းစာရင်းထဲသို့ ပြန်လည်ဝင် ရောက်လာခဲ့သည်။ ယင်းပွဲတွင် တစ်ဂိုးသွင်းခဲ့သည့် ဆာကာသည် ဂိုးပါဝင်ပတ်သက်မှု ၁၁ ဂိုး( ငါးဂိုးသွင်း၊ ခြောက်ဂိုးဖန်တီး)ရှိလာ ပြီး အာဆင်နယ်အသင်း၏ပရီးမီးယားလိဂ် ဂိုးပါဝင်ပတ်သက်မှု စတုတ္ထမြောက်အများဆုံး ဆယ်ကျော်သက်ကစားသမားဖြစ်ခဲ့သည်။
ဆာကာ၏ဂိုးကို ဖန်တီးပေးခဲ့သည့် စမစ်ရိုး မှာ အာဆင်နယ်အတွက် နောက်ဆုံးကစားသည့် ၁၀ ပွဲတွင် ဂိုးပါဝင်ပတ်သက်မှု ခုနစ်ဂိုး (နှစ်ဂိုးသွင်း၊ ငါးဂိုးဖန်တီး)ရှိလာခဲ့သည်။
“သူတို့(ဆာကာနှင့် စမစ်ရိုး) ဘာတွေလုပ်နိုင်သလဲဆိုတာ ကျွန်တော် သိပါတယ်။ သူတို့ တိုးတက်လာပြီး ဒါဟာ သူတို့အတွက်သာမက အသင်းဖော်တွေနဲ့ သူတို့ကို ဖွံ့ဖြိုးတိုးတက်လာအောင် ကူညီခဲ့သူအားလုံးအတွက် ဆုလာဘ်တစ်ခုပါပဲ”ဟု အာတီတာက ပြောကြားခဲ့သည်။
ထို့ပြင် စမစ်ရိုးက အာဆင်နယ်အသင်းတွင် အခြေကျရန် စီနီယာဖြစ်သူ လာကာဇက်က များစွာကူညီခဲ့ပြီး လိုက်ပ်ဇစ်၊ ဟတ်ဒါဖီးလ်အသင်းများထံ အငှားကစားခြင်းက အကျိုးရှိခဲ့သည်ဟု ဖွင့်ဟခဲ့သည်။
