မြန်မာ MMA ကစားသမား အောင်လအန်ဆန်သည် ဇူလိုင် (၃၀) ရက်က ထိုးသတ်သည့် စိန်ခေါ်ပွဲတွင် လီအန်ဒရိုကို အနိုင်ရပြီးနောက် မစ်ဒယ်ဝိတ်တန်း ကမ္ဘာ့ချန်ပီယံဆုကို ပြန်လည်စိန်ခေါ်ခွင့်ရရန် နီးစပ်လာပြီဖြစ်ကြောင်း သိရသည်။
ONE Championship သည် ယခုပွဲမတိုင်မီကတည်းက အနိုင်ရသူကို မစ်ဒယ်ဝိတ်တန်းကမ္ဘာ့ချန်ပီယံဆု စိန်ခေါ်ခွင့်ပေးမည်ဖြစ်ကြောင်း ထုတ်ပြန်ထားပြီး အလဲထိုးအနိုင်ရခဲ့သည့် အောင်လအန်ဆန်အနေဖြင့် စိန်ခေါ်ခွင့်ရရန် နီးစပ်နေခြင်းဖြစ်သည်။
အောင်လအန်ဆန်သည် မစ်ဒယ်ဝိတ်တန်းကမ္ဘာ့ချန်ပီယံဆု ပြန်လည်စိန်ခေါ်ခွင့်ရရှိပါက လက်ရှိချန်ပီယံ ဒီရစ်ဒါနှင့် ထိုးသတ်ရမည်ဖြစ်ပြီး ONE Championship အနေဖြင့် ယင်းပွဲစီစဉ်ဖြစ်ပါက ယခုနှစ်အတွင်း ထိုးသတ်ရဖွယ်ရှိသည်။
အောင်လအန်ဆန်သည် ကမ္ဘာ့ချန်ပီယံခါးပတ် (၂)ခုစလုံး လက်လွှတ်ခဲ့ရပြီးနောက် မစ်ဒယ်ဝိတ်တန်း ကမ္ဘာ့ချန်ပီယံဆုကိုသာ ပြန်လည်ရယူနိုင်ရန် ပစ်မှတ်ထား ကြိုးပမ်းလျက်ရှိပြီး လီအန်ဒရိုနှင့်ပွဲတွင် ၎င်း၏ ကြိုးပမ်းအားထုတ်မှုများကို တွေ့မြင်ခဲ့ရသည်။
အောင်လအန်ဆန်သည် မစ်ဒယ်ဝိတ်တန်း ကမ္ဘာ့ချန်ပီယံဆုကို ၂၀၁၇ ခုနှစ် ဇွန်(၃၀)ရက်က ထိုးသတ်သည့်ပွဲတွင် ရုရှားနိုင်ငံသား ဘစ်ဒက်ရှ်ကို အနိုင်ယူကာ ရယူနိုင်ခဲ့ပြီး ကမ္ဘာ့ချန်ပီယံအဖြစ် (၃)နှစ်ကျော်ကြာ ရပ်တည်နိုင်ခဲ့သည်။
(၃)နှစ်ကျော် ကာလအတွင်း ကမ္ဘာ့ချန်ပီယံကာကွယ်ပွဲ (၄)ပွဲထိုးသတ်ခဲ့ပြီး ဒီရစ်ဒါနှင့်ပွဲမတိုင်မီ ဂျပန်နိုင်ငံသား ဟဆဲဂါ၀ါနှင့် (၂)ပွဲ၊ လက်ဘနွန်နိုင်ငံသား ကရာကီနှင့် တစ်ပွဲ အနိုင်ရခဲ့သည်။
သို့သော် ၂၀၂၀ အောက်တိုဘာ(၃၀) ရက်က ထိုးသတ်သည့် စတုတ္ထမြောက်ချန်ပီယံကာကွယ်ပွဲတွင် နယ်သာလန်နိုင်ငံသား ဒီရစ်ဒါကို ရှုံးနိမ့်ခဲ့ခြင်းဖြစ်သည်။
