မြန်မာ MMA ကစားသမား အောင်လအန်ဆန်က ဇူလိုင် ၃၀ ရက်တွင် ထိုးသတ်ခဲ့သည့် ONE မစ်ဒယ်ဝိတ်တန်းစိန်ခေါ်ပွဲ၌ လီအန်ဒရိုကို အနိုင်ရပြီးနောက် မစ်ဒယ်ဝိတ်တန်းတွင် မိမိကြောက်ရွံ့သူမရှိကြောင်း ကြုံးဝါးပြောဆိုခဲ့သည်။
”အင်တာဗျူးတစ်ခုမှာ သူ (လီအန်ဒရို)က ကျွန်တော်က သူနဲ့ထိုးသတ်ဖို့ ကြောက်နေတယ်ဆိုပြီး ပြောဖူးပါတယ်။ ကျွန်တော် မကြောက်ဘူးဆိုတာ ပြချင်ခဲ့ပါတယ်။ ကျွန်တော် ဘယ်သူ့ကိုမှ မကြောက်ပါဘူး။ မစ်ဒယ်ဝိတ်တန်းမှာ ကျွန်တော် ဘယ်သူ့ကိုမှ မကြောက်ပါဘူး။ ကြိုက်တဲ့သူနဲ့ ထိုးသတ်လို့ရပါတယ်”ဟု လီအန်ဒရိုအား အနိုင်ရသည့်ပွဲအပြီးတွင် အောင်လအန်ဆန်က ပြောကြား သည်။
အောင်လအန်ဆန်သည် ဇူလိုင် ၃၀ ရက်က ထိုးသတ်သည့်ပွဲတွင် လီအန်ဒရိုကို အနိုင်ယူပြီးနောက် ရှုံးပွဲဆက်နေမှု ရပ်တန့်နိုင်ခဲ့ပြီး ကစားသမားဘဝတစ်လျှောက် သုံးပွဲဆက်မရှုံးနိမ့်သည့်အစဉ်အလာကို ဆက်ထိန်းနိုင်ခဲ့ကြောင်း သိရသည်။
အောင်လအန်ဆန်သည် ၂၀၁၁ ခုနှစ် နိုဝင်ဘာတွင် ဒရူးပူဇွန်နှင့် ၂၀၁၂ ခုနှစ် မတ်လတွင် အိုရိုပူဇာတို့ကို နှစ်ပွဲဆက် အရေးနိမ့်ခဲ့ဖူးပြီး ၂၀၁၂ ခုနှစ် မေလတွင် ထိုးသတ်သည့်ပွဲ၌ မာတီနက်ဇ်ကို ပြန်လည်အနိုင်ရခဲ့သည်။
အောင်လအန်ဆန်သည် ၂၀၂၀ အောက်တိုဘာနှင့် ယခုနှစ် ဧပြီတွင် ဒီရစ်ဒါကို နှစ်ပွဲဆက် အရေးနိမ့်ခဲ့သော်လည်း ဇူလိုင် ၃၀ ရက်က ထိုးသတ်သည့်ပွဲ၌ လီအန်ဒရိုကို ပြန်လည်အနိုင်ယူကာ ကစားသမားဘဝတစ်လျှောက် သုံးပွဲဆက်မရှုံးနိမ့်ဖူးသည့် အစဉ်အလာကို ဆက်ထိန်းနိုင်ခဲ့ခြင်းဖြစ်သည်။
အသက် ၃၆ နှစ်အရွယ်ရှိ အောင်လအန်ဆန်သည် MMA ကစားသမားဘဝ ပွဲ ၄၀ တွင် ၂၇ ပွဲမြောက် နိုင်ပွဲရယူနိုင်ခဲ့ခြင်းဖြစ်သည်။
အောင်လအန်ဆန်သည် လီအန်ဒရိုနှင့် ပထမဆုံးတွေ့ဆုံသည့်ပွဲတွင် အလဲထိုး အနိုင်ရခဲ့ခြင်းဖြစ်ပြီး ယခုနှစ်အတွက် ပထမဆုံးနိုင်ပွဲရရှိခဲ့သည်။
ကိုရိုနာဗိုင်းရပ်စ်အခြေ အနေကြောင့် အောင်လအန်ဆန်အနေဖြင့် ၂၀၂၀ နောက်ပိုင်း သုံးပွဲသာ ထိုးသတ်ရသေးပြီး ၂၀၂၀ ပြည့်နှစ်တွင် တစ်ပွဲ၊ ယခုနှစ်တွင် နှစ်ပွဲ ထိုးသတ်ထားခြင်းဖြစ်သည်။
အောင်လအန်ဆန်သည် ဒီရစ်ဒါနှင့် ဒုတိယအကြိမ် တွေ့ဆုံသည့် လိုက်ဟဲဗီးဝိတ်တန်း ကမ္ဘာ့ချန်ပီယံကာကွယ်ပွဲပြီးကတည်းက ယခုပွဲအတွက် ပြင်ဆင်ခဲ့ပြီး ရလဒ်ကောင်း ရယူနိုင်ခဲ့ခြင်းဖြစ်သည်။
အောင်လအန်ဆန်သည် ၂၀၁၄ ခုနှစ်တွင် ONE Championship နှင့် စတင်လက်တွဲခဲ့ပြီး စိန်ခေါ်ပွဲများ၊ ကမ္ဘာ့ချန်ပီယံလုပွဲနှင့် ကမ္ဘာ့ချန်ပီယံကာကွယ်ပွဲများအပါအဝင် စုစုပေါင်း ၁၅ ပွဲ ထိုးသတ်ထားကြောင်း သိရသည်။
