လီဝန်ဒေါစကီးအတွက် ယူရို ၄၅ သန်းဖြင့် ဘာစီလိုနာ၏ တတိယအကြိမ်ကမ်းလှမ်းမှုကို ဘိုင်ယန်မြူးနစ်အသင်း ပယ်ချ

ဘိုင်ယန်မြူးနစ်အသင်းသည် တိုက်စစ်မှူး လီဝန်ဒေါစကီးအတွက် ဘာစီလိုနာအသင်း၏ ယူရို ၄၅ သန်းဖြင့် တတိယအကြိမ်ကမ်းလှမ်းမှုကို ထပ်မံပယ်ချခဲ့ကြောင်း ဂျာမနီ နိုင်ငံထုတ်အားကစားသတင်းစာ Bild က ဖော်ပြခဲ့သည်။

ဘာစီလိုနာအသင်းသည် ယခုနွေရာသီတွင် လီဝန်ဒေါစကီးကို ခေါ်ယူနိုင်ရန် ပစ်မှတ်ထား၍ ကြိုးပမ်းနေပြီး တတိယအကြိမ် ကမ်းလှမ်းမှုအဖြစ် ကနဦးပြောင်းရွှေ့ကြေး ယူရို သန်း ၄၀၊ Add-ons ယူရိုငါးသန်း၊ စုစုပေါင်း ယူရို ၄၅ သန်းဖြင့် ထပ်မံကမ်းလှမ်းသော်လည်း ပယ်ချခံရခြင်းဖြစ်သည်။

ဘိုင်ယန်မြူးနစ်အသင်းနှင့် လီဝန်ဒေါစကီးတို့၏ စာချုပ်သက်တမ်းမှာ တစ်နှစ်သာကျန်ရှိတော့သလို ကစားသမားကိုယ်တိုင်ကလည်း ၎င်း၏ ဘိုင်ယန် ကစားသမားဘဝမှာ ပြီးဆုံးပြီဖြစ်ကြောင်း ထုတ်ဖော်ပြောကြားထားသည်။ ဘိုင်ယန် မြူးနစ်အသင်းအနေဖြင့် ၎င်းင်းအား စာချုပ်သစ် မချုပ်နိုင်ပါက လာမည့်နှစ်နွေရာသီတွင် ပြောင်းရွှေ့ကြေးမပါဘဲ အလွတ်ထွက်ခွာခွင့် ပြုရမည်ဖြစ်သော်လည်း သက်သာသည့်စျေး နှုန်းဖြင့် လက်မလွှတ်လိုဘဲ ယူရိုသန်း ၅၀ အထက်ရရှိမှသာ ရောင်းချဖွယ်ရှိနေသည်။

ဘိုင်ယန်မြူးနစ်အသင်းသည် ဗုဒ္ဓဟူးနေ့ တွင် ဂျပန်ဂိမ်းကုမ္ပဏီ Konami နှင့် စာချုပ်သစ် ချုပ်ဆိုခဲ့ပြီး ကြော်ငြာဖော်ပြသည့် ဂိမ်းဗီဒီယိုတွင် မူလာ၊ ဒေးဗီးစ်၊ ကင်မစ်ချ်တို့နှင့်အတူ အပြောင်းအရွှေ့သတင်းများ ထွက်ပေါ် နေသည့် နာဘရီတို့ပါဝင်သော်လည်း လီဝန်ဒေါစကီးမှာမူ ပါဝင်ခြင်းမရှိသဖြင့် ၎င်း၏အနာဂတ်မှာ စိတ်ဝင်စားဖွယ်ဖြစ်နေသည်။