လီဗာပူးလ်အသင်းမှ ဘိုင်ယန်မြူးနစ်အသင်းသို့ ပြောင်းရွှေ့ရောက်ရှိခဲ့သည့် ဆီနီဂေါတိုက်စစ်ကစားသမား မာနေက လီဝန်ဒေါစကီးသည် ကမ္ဘာ့အကောင်းဆုံးတိုက်စစ်မှူးတစ်ဦးဖြစ်သည်ဟု ပြောကြားခဲ့သည်။
လီဝန်ဒေါစကီးသည် ဘိုင်ယန်မြူးနစ်မှထွက်ခွာကာ ဘာစီလိုနာအသင်းသို့ ပြောင်းရွှေ့ရန် စိတ်အားထက်သန်နေသော်လည်း ဘိုင်ယန်မြူးနစ် အသင်းတာဝန်ရှိသူများက ၎င်းကို အသင်းတွင် ဆက်လက်ထိန်းသိမ်းပြီး မာနေနှင့် တွဲဖက်ပေးရန် ဆန္ဒရှိနေသည်။
မာနေက “လီဝန်ဒေါစကီးက ကမ္ဘာ့အကောင်းဆုံးတိုက်စစ်မှူးတစ်ယောက်ဆိုတာ ရှင်းရှင်းလင်းလင်းသိနိုင်ပါတယ်။ ဒါပေမဲ့ သူ့ရဲ့ အနာဂတ်အကြောင်း ပြောဖို့တော့ ကျွန်တော်က သင့်တော်တဲ့သူ မဖြစ်နိုင်ပါဘူး”ဟု ပြောကြားခဲ့သည်။
လာမည့် သြဂုတ် (၂၁) ရက်တွင် အသက် (၃၄) နှစ်ပြည့်မည့် ပိုလန်ဝါရင့်တိုက်စစ်မှူး လီဝန်ဒေါစကီးသည် ၂၀၂၃ ခုနှစ်တွင် ဘိုင်ယန်မြူးနစ်အသင်းနှင့် စာချုပ်သက်တမ်းကုန်ဆုံးမည်ဖြစ်ပြီး ယခုနွေရာသီတွင် အသင်းမှထွက်ခွာလိုကြေင်း အတိအလင်းပြောကြားထားသူ ဖြစ်သည်။
လီဝန်ဒေါစကီးသည် ပြီးခဲ့သည့် ၂၀၂၁-၂၂ ရာသီက ဘိုင်ယန်မြူးနစ်အသင်းအတွက် ပြိုင်ပွဲစုံ (၄၆) ပွဲတွင် ဂိုး (၅၀) အထိ သွင်းယူပေးခဲ့သည်။