လီဗာပူးလ်အသင်းတွင် နည်းပြ ယာဂန်ကလော့ပ်၏အချိန် ကုန်ဆုံးရန်နီးစပ်လာပြီဟု အသင်းကွင်းလယ်ကစားသမားဟောင်း ဟာမန်းက သုံးသပ်ခဲ့သည်။
လီဗာပူးလ်အသင်းတွင် ၁၉၉၉ မှ ၂၀၀၆ ခုနှစ်အတွင်း ပြိုင်ပွဲစုံ ၁၉၁ ပွဲအထိ ကစားခဲ့သူ ဟာမန်းက အသင်းအနေဖြင့် ကိုယ်ပိုင်ပုံစံ ပျောက်ဆုံးနေပြီး သူနှင့်တစ်နိုင်ငံတည်းသားဖြစ်သူ ကလော့ပ်၏လီဗာပူးလ်နည်းပြဘဝ ပြီးဆုံးသွားမည်ကို စိုးရွံ့မိကြောင်း ဖွင့်ဟခဲ့သည်။
လီဗာပူးလ်အသင်းသည် လက်ရှိရာသီ ပရီးမီးယားလိဂ်ပြိုင်ပွဲတွင် ထိပ်ဆုံးမှ အာဆင်နယ်အသင်းနှင့် ၁၄ မှတ်အထိ ကွာဟနေပြီး လိဂ်ပွဲ ၈ ပွဲ တွင် ၂ ပွဲသာ အနိုင်ရရှိခဲ့မှုက ကလော့ပ်အတွက်လည်း ဖိအားမြင့်တက်လာစေခဲ့သည်။
“တချို့အခြေအနေမှာ မန်နေဂျာတွေအကြောင်း ဆွေးနွေးကြပြီး ဒါတွေဟာ ဘယ်လောက်အထိ လက်တွေ့နဲ့ အလှမ်းကွာဝေးသလဲဆိုတာ ကျွန်တော်ကိုယ်တိုင် သေချာမသိပါဘူး။ သူ(ကလော့ပ်)ကတော့ အလုပ်အတွက် သင့်တော်တဲ့သူလို့ ပြောထားပါတယ်။ ဒါပေမဲ့ အာဆင်နယ်နဲ့ ပွဲက ဟန်ဒါဆန် လက်ပတ်ချွတ်ပြီး ကွင်းထဲက ခေါင်းတစ်ခါခါနဲ့ ထွက်ခွာလာတာမျိုးလို ကျွန်တော် အနည်းငယ်တွေ့မြင်ထားတယ်။ ဒီလိုပုံစံမျိုးကို လီဗာပူးလ်အသင်းမှာ ငါးနှစ် အတွင်း မတွေ့မြင်ခဲ့ရဘူး။ ဒါဟာ ကစားသမားတွေက အသင်းနဲ့ ဒါမှမဟုတ် မန်နေဂျာနဲ့ ပြဿနာအနည်းငယ်ရှိနေတာလည်း ဖြစ်နိုင်ပါတယ်။ လီဗာပူးလ်းအသင်းရဲ့အင်အားက ဘယ်မှာမှ ကွဲပြားခြားနားမှု မရှိပါဘူး။ ရလဒ်တွေ မကောင်းလာရင်တော့ မန်နေဂျာက ဖိအားအောက် ရောက်လာပါလိမ့်မယ်”ဟု ဟာမန်းက TalkSPORT သို့ ပြောကြားခဲ့သည်
