လီဗာပူးလ်နည်းပြရာထူးမှ မကြာမီထုတ်ပယ်ခံရတော့မည်ဟု ပြောဆိုခဲ့သည့် ဟာမန်း၏ ပြောစကားကို ဂရုစိုက်စရာမလိုဟု ကလော့ပ် တုံ့ပြန်

လီဗာပူးလ်နည်းပြ ယာဂန်ကလော့ပ်က ယခုရာသီတွင် အသင်းရလဒ်ဆိုးရွားမှုများကြောင့် သူ့အနေဖြင့် မကြာမီ ရာထူးမှ ထုတ်ပယ်ခံရတော့မည်ဟု ပြောဆိုခဲ့သည့် လီဗာပူးလ်ကစားသမားဟောင်း ဟာမန်း၏ပြောစကားကို ဂရုစိုက်စရာ မလိုကြောင်း ပြောကြားခဲ့သည်။

လီဗာပူးလ်အသင်းသည် ယခုရာသီတွင် ရုန်းကန်နေရပြီး ပရီးမီးယားလိဂ် (၈) ပွဲ (၂) ပွဲနိုင်၊ (၄) ပွဲသရေ၊ (၂) ပွဲရှုံးကာ ရမှတ် (၁၀)မှတ်ဖြင့် အဆင့် (၁၀) နေရာ ရောက်ရှိနေသည်။

ထို့ကြောင့် အသင်းနည်းပြ ကလော့ပ်မှာ ဖိအားများနှင့်ရင်ဆိုင်နေရပြီး လီဗာပူးလ်ကစားသမားဟောင်းတစ်ဦးဖြစ်သူ ဟာမန်းက ကလော့ပ်အနေဖြင့် သိပ်မကြာမီ လီဗာပူးလ်နည်းပြရာထူးမှ ထုတ်ပယ်ခံရတော့မည်ဟု TalkSport တွင် သုံးသပ်ပြောကြားခဲ့သည်။

ဟာမန်း၏ ပြောဆိုမှုနှင့်ပတ်သက်ပြီး ပြီးခဲ့သည့်အင်္ဂါနေ့ကပြုလုပ်သည့် မီဒီယာတွေဆုံမှုတွင် သတင်းထောက်များက မေးမြန်းခဲ့ရာ ကလော့ပ်က ဂရုစိုက်စရာမလိုကြောင်း တုံ့ပြန်ခဲ့ခြင်းဖြစ်သည်။

ကလော့ပ်က ”(ကျွန်တော် လီဗာပူးလ်နည်းပြရာထူးက ထုတ်ပယ်ခံရတော့မယ် ဟုတ်လား) ဘယ်သူ ပြောတာလဲ။ ဟာမန်းလား။ သိပ်ကောင်းတာပေါ့။ ခင်ဗျားတို့ရဲ့သတင်းအရင်းအမြစ်က ကောင်းလိုက်တာဗျာ။ အရမ်းလေးစားဖို့ ကောင်းတာပဲ။ ကိုယ်တိုင်ဘာမှမသိတဲ့ အကြောင်းတစ်ခုကို လီဗာပူးလ်ကစားသမားဟောင်းဖြစ်နေရုံနဲ့ ပြောချင်တာကို ပြောဖို့ အခွင့်အရေးမပေးထားပါဘူး။ ဟာမန်းရဲ့စကားတွေက ကျွန်တော့်ကိုမေးဖို့အတွက် ခင်ဗျားတို့ ကိုးကားဖို့ မထိုက်တန်ပါဘူး”ဟု ပြောကြားခဲ့သည်။

လီဗာပူးလ်အသင်းအနေဖြင့် အာဆင်နယ်ကို ရှုံးနိမ့်သည့်ပွဲတွင် အဓိကကစားသမား (၃) ဦး ဒဏ်ရာရခဲ့ပြီး အာနိုးလ်နှင့် မာတစ်တို့မှာ (၂) ပတ်ခန့် အနားယူရမည်ဖြစ်ကာ ဒီယက်ဇ်မှာ (၈) ပတ်အထိ အနားယူရမည်ဖြစ်သည်။

ယခုကဲ့သို့ ရလဒ်များဆိုးရွားနေချိန်မှာ အဓိကကစားသမားများ ဒဏ်ရာရခြင်းမှာ လီဗာပူးလ်အတွက် ထိုးနှက်ချက်ဖြစ်ခဲ့သော်လည်း ကလော့ပ်ကမူ မိမိတို့အနေဖြင့် ရလဒ်ကောင်းများပြန်လည်ရယူနိုင်မည်ဟုယုံကြည်ကြောင်း ပြောကြားခဲ့သည်။