၂၀၂၁-၂၀၂၂ ရာသီ လိဂ်ဖလားပြိုင်ပွဲ ဗိုလ်လုပွဲသို့ ပရီးမီးယားလိဂ်ထိပ်သီးကလပ် ချယ်လ်ဆီးနှင့် လီဗာပူးလ်အသင်းတို့ တက်ရောက်ခဲ့ပြီး ၎င်းတို့နှစ်သင်း ဗိုလ်လုပွဲတွင် တွေ့ဆုံခြင်းမှာ သမိုင်းတစ်လျှောက် ဒုတိယအကြိမ်ဖြစ်ကြောင်း သိရသည်။
ကြာသပတေးနေ့က ယှဉ်ပြိုင်ကစားသည့် ဆီမီးဖိုင်နယ် ဒုတိယအကျော့ လက်ကျန်ပွဲတွင် လီဗာပူးလ်အသင်းက ပရီးမီးယားလိဂ်ပြိုင်ဘက် အာဆင်နယ်အသင်းအား အဝေးကွင်း၌ (၀-၂) ဂိုးဖြင့် အနိုင်ယူပြီး ဗိုလ်လုပွဲတက်ရောက်ခဲ့သည်။
ပထမအကျော့ အန်ဖီးလ်ကွင်းတွင် ဂိုးမရှိသရေကျထားပြီး အီမရိတ်စ်ကွင်း၌ ပြန်လည်ကစားရသည့် ဒုတိယအကျော့တွင် ဧည့်သည်လီဗာပူးလ်အသင်းက ၁၉၊ ၇၉ မိနစ်တွင် ဂျိုတာ၏သွင်း ဂိုးနှစ်ဂိုးဖြင့် အနိုင်ရခဲ့ခြင်းဖြစ်သည်။ ပွဲပြီး ခါနီး မိနစ် ၉၀ တွင် အာဆင်နယ်အသင်း အတွက် လူစားဝင်ကွင်းလယ်လူ ပါတေး နှစ်ဝါတစ်နီဖြင့် ထုတ်ပယ်ခံရသောကြောင့် တစ်ယောက်လျော့ဖြင့် ကစားခဲ့ရသည်။
လိဂ်ဖလားပြိုင်ပွဲ၏ ပူးတွဲအအောင်မြင်ဆုံးဖြစ်သည့် လီဗာပူးလ်အသင်းသည် ဗိုလ်လုပွဲသို့ ၂၀၁၆ ခုနှစ်နောက်ပိုင်း ခြောက်နှစ်အကြာတွင် တစ်ကျော့ပြန် တက်ရောက်ခွင့် ရခြင်းဖြစ်သည်။ လန်ဒန်ဒါဘီပြိုင်ဘက် စပါး အသင်းကို နှစ်ကျော့စလုံးကို အနိုင်ယူပြီး ဗိုလ်လုပွဲတက်ရောက်လာသည့် ချယ်လ်ဆီးအသင်းမှာမူ ၂၀၁၉ ခုနှစ်နောက်ပိုင်း သုံးနှစ်အကြာတွင် ပြန်လည်တက်ရောက်နိုင်ခြင်း ဖြစ်သည်။
ချယ်လ်ဆီးနှင့် လီဗာပူးလ်အသင်းသည် လိဂ်ဖလားပြိုင်ပွဲသမိုင်းတစ်လျှောက် ဗိုလ်လုပွဲတွင် ဒုတိယအကြိမ်တွေ့ဆုံခြင်းဖြစ်ပြီး ပထမအကြိမ်တွေ့ဆုံသည့် ၂၀၀၅ ခုနှစ် ပြိုင်ပွဲ၌ ချယ်လ်ဆီးအသင်းက မိနစ် ၉၀ တွင် တစ်ဂိုးစီသရေ၊ အချိန်ပိုတွင် (၃-၂) ဂိုးဖြင့် အနိုင်ရဗိုလ်စွဲခဲ့သည်။
ထို့ပြင် လီဗာပူးလ်အသင်းသည် ယာဂန်ကလော့ပ်လက်ထက် လိဂ်ဖလားပြိုင်ပွဲတွင် ဗိုလ်စွဲဖူးခြင်းမရှိသလို ၎င်းကိုင်တွယ်သည့် ခုနစ်နှစ်အတွင်း ဗိုလ်လုပွဲသို့ ဒုတိယအကြိမ် တက်ရောက်နိုင်ခြင်းဖြစ်သည်။
