ဆောက်ဂိတ်သည် အိုက်စလန်အား (၄-ဝ)ဂိုးဖြင့် အနိုင်ရခဲ့သည့်ပွဲတွင် အသင်း၏ ပွဲထွက်လူစာရင်း၌ အသက်(၂၁)နှစ်နှင့်အောက် ကစားသမားများဖြစ်သည့် ဆာကာ၊ မေဆန်မောင့်၊ ဒက်ကလန်ရိုက်စ်၊ ဖိုဒန်တို့ကို ထည့်သွင်းခဲ့ပြီး ယင်းတို့အနက် (၃)ဦးသည် ဂိုးသွင်းယူနိုင်ခဲ့သည်။
အင်္ဂလန်အသင်းနည်းပြ ဆောက်ဂိတ်သည် လက်ရှိလူအင်အားအတိုင်းဆိုလျှင် မိမိတို့အသင်းသည် လာမည့် (၃)နှစ်မှ (၅)နှစ် အတွင်း အထွတ်အထပ်သို့ ရောက်လိမ့်မည်ဟု သုံးသပ်ပြောဆိုခဲ့သည်။
ဆောက်ဂိတ်သည် အိုက်စလန်အား (၄-ဝ)ဂိုးဖြင့် အနိုင်ရခဲ့သည့်ပွဲတွင် အသင်း၏ ပွဲထွက်လူစာရင်း၌ အသက်(၂၁)နှစ်နှင့်အောက် ကစားသမားများဖြစ်သည့် ဆာကာ၊ မေဆန်မောင့်၊ ဒက်ကလန်ရိုက်စ်၊ ဖိုဒန်တို့ကို ထည့်သွင်းခဲ့ပြီး ယင်းတို့အနက် (၃)ဦးသည် ဂိုးသွင်းယူနိုင်ခဲ့သည်။
ယင်းကစားသမားများမှာ သက်ဆိုင်ရာကလပ်အသင်းများတွင် ငယ်ငယ်ရွယ်ရွယ်နှင့် နေရာတစ်နေရာ ရယူနေနိုင်သူများလည်း ဖြစ်ကြသည်။
ဆောက်ဂိတ်သည် ၎င်းနောက်ဆုံးရွေးချယ်ခဲ့သော လက်ရွေးစင်ကစားသမားစာရင်းတွင် အသက်အကြီးဆုံးအဖြစ် အသက်(၃၀)အရွယ် ဝေါ်လ်ကာ၊ ထရစ်ပီယာနှင့် ဟန်ဒါဆန်တို့သာ ပါဝင်ခဲ့ပြီး ကျန်ကစားသမားအားလုံးမှာ (၂၈)နှစ်အောက်များ ဖြစ်သည်။
သို့ဖြစ်ရာ ဆောက်ဂိတ်သည် အင်္ဂလန်အသင်း၏ အနာဂတ်နှင့်ပတ်သက်၍ အားရနေခြင်းဖြစ်ပြီး လာမည့်(၃)နှစ်မှ (၅)နှစ်အတွင်း အထွတ်အထိပ်ရောက်ဖွယ်ရှိသည်ဟု သုံးသပ်ခဲ့ခြင်း ဖြစ်သည်။
ဆောက်ဂိတ်က “ကျွန်တော်တို့ဟာ အမြဲတမ်းတိုးတက်အောင် ကြိုးစားနေပါတယ်။ ဒီနေ့ပွဲမှာ ကစားသွားတာ လှပပြီး ကြည့်ချင်စရာ ကောင်းပါတယ်။ လူငယ်တွေ ဂိုးသွင်းနိုင်ခဲ့တာကောင်းပြီး သူတို့အတွက် စပယ်ရှယ်ပါပဲ။ ကျွန်တော်တို့ လက်ရှိပိုင်ဆိုင်ထားတဲ့ လူစာရင်းဟာ လာမယ့်(၃)နှစ်ကနေ (၅)နှစ်အတွင်းမှာ အထွတ်အထပ်ကို ရောက်လာပါလိမ့်မယ်။ သူတို့ဟာ နိုင်ငံနဲ့ ကလပ်မှာ အတွေ့အကြုံတွေ ရလာမယ်။ ကျွန်တော်တို့ဟာ သူတို့ဆီမှာ အချိန်ကို ရင်းနှီးမြှုပ်နှံထားပါတယ်။ စီနီယာကျတဲ့ ကစားသမားကောင်းတွေလည်း အသင်းမှာ ရှိနေပါသေးတယ်။ အားလုံးက အချိုးညီညီ အလုပ်လုပ်နေကြပါတယ်။ ကျွန်တော်တို့ရဲ့တိုက်စစ်ကစားပုံကလည်း အရမ်းအရမ်းကို ကောင်းမွန်နေပါပြီ။ ကစားသမားကောင်းတွေ များနေလို့ ခေါင်းကိုက်ရတယ်ဆိုရင် အဲဒီခေါင်းကိုက်ခြင်းကို ကောင်းမွန်တဲ့အရာအဖြစ် ကျွန်တော် မှတ်ယူချင်ပါတယ်”ဟု Sky Sports သို့ ပြောကြားခဲ့သည်။
