လာမည့်ရာသီတွင် ချယ်လ်ဆီးအသင်းကို စတင်ကိုင်တွယ်မည့် ပိုချက်တီနိုသည် အသင်းအား အင်္ဂလန်ကစားသမားများကို အခြေပြုတည်ဆောက်ရန် စီစဉ်နေကြောင်း Evening Standard သတင်းစာက ဖော်ပြခဲ့သည်။
စပါးနှင့် PSG နည်းပြဟောင်း ပိုချက်တီနိုသည် ချယ်လ်ဆီးကိုကိုင်တွယ်ရန် သဘောတူညီမှုရထားပြီဖြစ်ကြောင်း ဗြိတိန်မီဒီယာများက ဖော်ပြနေကြသည်။
လက်ရှိတွင် ချယ်လ်ဆီးအသင်းကို ကိုင်တွယ်နေသည့် ယာယီနည်းပြ လမ်းပတ်သည် ယခုရာသီကုန်တွင် အသင်းနှင့်လမ်းခွဲမည်ဖြစ်ပြီး ယင်းနောက်တွင် ပိုချက်တီနိုက ချယ်လ်ဆီးအသင်းကို အမြဲတမ်းနည်းပြအဖြစ် ကိုင်တွယ်သွားမည်ဖြစ်သည်။
ပိုချက်တီနိုသည် ဆောက်သမ်တန်နှင့် စပါးအသင်းတို့ကို ကိုင်တွယ်စဉ်က လူငယ်ကစားသမားများကို မြေတောင်မြှောက်ပေးရာတွင် ထူးချွန်သူအဖြစ် နာမည်ကြီးခဲ့သည်။
ပိုချက်တီနိုသည် ဘရိုက်တန်တွင် အငှားသွားရောက်ကစားနေသည့် အင်္ဂလန်လူငယ်နောက်ခံလူ ကိုလ်ဝဲလ်၊ ချယ်လ်ဆီးတွင် ရှိနေသည့် အင်္ဂလန်ကစားသမားများဖြစ်သည့် ဂယ်လာဂါ၊ မေဆန်မောင့်၊ ရီးစ်ဂျိမ်းစ်၊ ဘင်ချီဝဲလ်တို့ကို အခြေတည်ကာ လာမည့်ရာသီတွင် အသင်းကို တည်ဆောက်သွားရန် စီစဉ်နေခြင်းဖြစ်ကြောင်း သိရှိရသည်။
