လမ်းပတ် ၊ ဂျာရတ် ၊ စခိုးလ်? တို့ထဲက အကောင်းဆုံး ကွင်းလယ်လူကို ရွေးချယ်လိုက်တဲ့ ဘရူနိုဖာနန်ဒက်

မန်ချက်စတာယူနိုက်တက် ကွင်းလယ်လူ ဘရူနိုဖာနန်ဒက်က သရဲနီ ကြယ်ပွင့်ဟောင်း ပေါလ်စခိုးလ်ဟာ ပရီးမီးယားလိဂ် ဂန္ထဝင်တွေ ဖြစ်ကြတဲ့ ဖရန့်လမ်းပတ် နဲ့ စတီဗင်ဂျာရတ် တို့ထက် ပိုမို ကောင်းမွန်တဲ့သူ ဖြစ်တယ် ဆိုတာ ရှင်းပြ သွားခဲ့ပါတယ်။ စခိုးလ် ၊ လမ်းပတ် နဲ့ ဂျာရတ် တို့ဟာ အင်္ဂလန်ရဲ့ အကြီးကြယ်ဆုံး ကွင်းလယ် ကစားသမားတွေ ထဲက ၃ ဦး အဖြစ် သတ်မှတ် ခံရထားသူတွေ ဖြစ်ပေမယ့် ဖာနန်ဒက် ကတော့ စခိုးဟာ အားလုံးထဲမှာ အကောင်းဆုံးလို့ ဆိုသွား ပါတယ်။

အိုးထရပ်ဖို့ဒ်မှာ ကစား ခဲ့တဲ့ နှစ်ပေါင်း ၂၀ ကာလ အတွင်း စခိုးလ်ဟာ မန်ချက်စတာယူနိုက်တက်ကို ပရီးမီးယားလိဂ်ဖလား ၁၁ ကြိမ် ၊ ချန်ပီယံလိဂ် ဖလား ၂ ကြိမ် ၊ အက်ဖ်အေဖလား ၃ ကြိမ် ဆွတ်ခူး ပေးနိုင် ခဲ့ပါတယ်။ ချဲလ်ဆီ မန်နေဂျာ အဖြစ် လုပ်ကိုင်နေတဲ့ လမ်းပတ် ကလည်း စတန်းဖို့ဒ်ဘရစ်ချ်မှာ အောင်မြင်တဲ့ ကစားသမား ဘဝကို ပိုင်ဆိုင် နိုင်ခဲ့ပြီး ပရီးမီးယားလိဂ် ဖလား ၃ ကြိမ် ၊ ချန်ပီယံလိဂ် ဖလား ၁ ကြိမ် နဲ့ အက်ဖ်အေဖလားတွေကို ဆွတ်ခူး နိုင်ခဲ့ ပါတယ်။

ဂျာရတ်ဟာ လီဗာပူး နဲ့ အတူ ပရီးမီးယားလိဂ် ဖလား မဆွတ်ခူး နိုင်ခဲ့ ပေမယ့်လည်း လွန်ခဲ့တဲ့ ၂၀၀၅ ခုနှစ်က လီဗာပူးတို့ ၅ ကြိမ်မြောက် ချန်ပီယံလိဂ် ဖလား ဆွတ်ခူး နိုင်အောင် ကူညီပေး ခဲ့သူ ဖြစ်ပြီး ကလပ် သမိုင်းတစ်လျှောက် အကောင်းဆုံး ကစားသမားတွေ ထဲက တစ်ဦး အဖြစ် သတ်မှတ် ခံထား ရသူ ဖြစ်ပါတယ်။

Utd podcast ရဲ့ မေးမြန်းခန်းမှာ ဖာနန်ဒက်က “ကျွန်တော် ကတော့ စခိုးလ်ဟာ ကမ္ဘာ့အကောင်းဆုံး ကွင်းလယ်လူတွေ ထဲက တစ်ဦး ဖြစ်ခဲ့တယ်လို့ ထင်ပါတယ်။ အင်္ဂလန်ရဲ့ အတွက် ပြောရမယ် ဆိုရင်တော့ လူတော်တော်များများဟာ ဖရန့်လမ်းပတ် အကြောင်းကို ပြောကြပါတယ်။။ ဘာလို့လဲဆိုတော့ သူဟာ ကစားသမား ဘဝမှာ ဂိုးတွေ အများကြီး သွင်းယူ ခဲ့သူ ဖြစ်ခဲ့လို့ပါ။ သူဟာ အင်္ဂလန်ရဲ့ အကောင်းဆုံး ကွင်းလယ်လူတွေ ထဲက တစ်ဦးလည်း ဖြစ်ပါတယ်။ ပြီးတော့ စတီဗင်ဂျာရတ်လည်း ရှိပါသေးတယ်။

ဒါပေမ့ယ် ကျွန်တော် ကတော့ ပေါလ်စခိုးလ်ဟာ အခြား သူတွေထက် ခြားနားမှုကို ပိုပြီး ပေးစွမ်း နိုင်တဲ့ သူလို့ ထင်ပါတယ်။ ဒီအကြောင်းကို အားလုံး စတင် မပြောမီ ကျွန်တော်ဟာ အင်္ဂလန်ရဲ့ ကွင်းလယ် ကစားသမားတိုင်းရဲ့ ကစားပုံကိုတော့ မြင်တွေ့ ဖူးခဲ့ခြင်း မရှိ ခဲ့ပါဘူး။ ဒါပေမယ့် နောက်ဆုံး မျိုးဆက် မှာတော့ စခိုးလ် ၊ လမ်းပတ် ၊ ဂျာရတ် တို့ဟာ အကောင်းဆုံး ကွင်းလယ်လူတွေ ဖြစ်ကြ ပါတယ်။ ကျွန်တော့် အတွက် ကတော့ စခိုးလ် ကသာ အကောင်းဆုံး ဖြစ်ပါတယ်။” လို့ ဆိုသွား ပါတယ်။

ဖာနန်ဒက်ဟာ ပြီးခဲ့တဲ့ ဇန်နဝါရီ အပြောင်းအရွေ့က စပို့တင်းလစ္စဘွန်း ကနေ ရောက်ရှိ လာခဲ့ပြီးနောက် ယူနိုက်တက်ရဲ့ အကောင်းဆုံး ကစားသမားတွေ ထဲက တစ်ဦး ဖြစ်လာ ခဲ့ပါတယ်။ ဒါပေမယ့် အိုလီရဲ့ အသင်းဟာ ဒီရာသီ ခြေစွမ်းပိုင်း တည်ငြိမ်မှုကို ရှာဖွေရန် ရုန်းကန် နေရပြီး လက်ရှိ ပရီးမီးယားလိဂ် အမှတ်ပေးဇယားရဲ့ အဆင့် ၁၄ နေရာမှာ ရပ်တည် နေပါတယ်။

အိုးထရပ်ဖို့ဒ်ကို ရောက်လာ ခဲ့ပြီးနောက် ပေါ်တူဂီ လက်ရွေးစင်ရဲ့ ကစားပုံကို ဂန္ထဝင် ကစားသမား တော်တော်များများ နဲ့ ခိုင်းနှိုင်းမှုတွေ ပြုလုပ် နေကြပြီး ဖာနန်ဒက် ကိုယ်တိုင်ကတော့ သူဟာ လမ်းပတ် ၊ ဂျာရတ် တို့ထက် စာရင် စခိုးလ်ရဲ့ ကစားပုံနဲ့ ပိုပြီး နီးစပ်မှု ရှိတယ်လို့ ယုံကြည် နေပါတယ်။

ဖာနန်ဒက်စ်က “ကျွန်တော့်ရဲ့ ကစားပုံဟာ အခြား ကစားသမား ၂ ဦးထက် စာရင် စခိုးလ်နဲ့ ပိုပြီး နီးစပ်မှု ရှိနိုင်ပါတယ်။ စခိုးလ်ဟာ ပင်နယ်တီ ဧရိယာထဲ ဝင်ရောက် ကစား ရတာကို နှစ်သက်တဲ့ အပြင် ဂိုးတွေ ဖန်တီး ရတာကိုလည်း နှစ်သက်ပါတယ်။ ဒါ့အပြင် သူဟာ ဂိုးတွေ အများကြီး သွင်းယူ ရတာကို နှစ်သက်တဲ့သူလည်း ဖြစ်ပါတယ်။” လို့ ပြောလိုက်ပါတယ်။