လက်စတာနဲ့ ပွဲစဉ်မှာ မာတစ်နဲ့ အတူ ဗဟိုခံစစ်မှာ တွဲဖက်ကစားခိုင်းသင့်တဲ့ သူကို အကြံပေးလိုက်တဲ့ ဂျွန်အဲရစ်ချ်

ဂျွန်အဲရစ်ချ်က လီဗာပူးရဲ့ လူငယ် ဗဟို နောက်ခံလူတွေဟာ ပြီးခဲ့တဲ့ ရက်သတ္တပတ်တွေက ဒဏ်ရာရ ကစားသမားတွေ ဖြစ်ကြတဲ့ ဗာဂျယ်ဗန်ဒိုက်နဲ့ ဖာဘင်ညို တို့ရဲ့ နေရာကို အကောင်းဆုံး ဖြည့်ဆည်း ကစား ပေးခဲ့တယ်လို့ ချီးကျူး လိုက်ပေမယ့် နိုင်ငံတကာ ပွဲစဉ်တွေ အပြီး လက်စတာ နဲ့ ကစားရမယ့် ပရီးမီးယားလိဂ် ပွဲစဉ် မှာတော့ ဂျော်ဒန်ဟန်ဒါဆန်ကို ဗဟို ခံစစ်မှာ ဆင်းကစားခိုင်းရန် ယာဂန်ကလော့ကို တိုက်တွန်းမှု ပြုလုပ် သွားခဲ့ ပါတယ်။

လီဗာပူးရဲ့ ဒဏ်ရာ ပြသနာ အကျပ်အတည်းဟာ ပြီးခဲ့တဲ့ ဗုဒ္ဓဟူးနေ့ ပိုမို နက်ရှိုင်း သွားခဲ့ပြီး ဂျိုးဂိုးမက်ဇ်ဟာ အင်္ဂလန်ရဲ့ လေ့ကျင့်ရေး အစီအစဉ် တစ်ခုမှာ ဒူးဒဏ်ရာ ရရှိ သွားခဲ့တာကြောင့် ခွဲစိတ်ကုသမှု ခံယူ ခဲ့ရပြီး လနဲ့ချီ အနားယူ သွားရဖို့ ရှိနေ ပါတယ်။ ဒါ့ကြောင့် လီဗာပူး အသင်းဟာ ကြံ့ခိုင်မှု ပြည့်ဝနေတဲ့ စီနီယာ ဗဟို နောက်ခံလူ ဆိုလို့ ဂျိုရယ်မာတစ် တစ်ဦးသာ ကျန်တော့ပြီး ၎င်းရဲ့ ကြံ့ခိုင်မှု အခြေအနေ ကလည်း စိတ်ချ ရတဲ့ အနေအထားမှာ မရှိပါဘူး။

လီဗာပူးဟာ နိုင်ငံတကာ ပွဲစဉ်တွေ အပြီးမှာ ပြည်တွင်းနဲ့ ချန်ပီယံလိဂ် ပွဲစဉ်တွေ ဆက်တိုက် ကစား သွားရမှာ ဖြစ်ပြီး အနည်းဆုံးတော့ လာမည့် ဇန်နဝါရီ အပြောင်းအရွေ့ထိ တောင့်ခံ ထားဖို့ လိုအပ်ပါတယ်။ ရီးစ်ဝီလီယံ နဲ့ နက်ဖီးလစ် တို့ဟာ ပြီးခဲ့တဲ့ ရက်သတ္တပတ်တွေက လီဗာပူး ရဲ့ ဗဟိုခံစစ်ပိုင်းကို ကောင်းကောင်း ကာဗာ လုပ်ပေး ခဲ့ကြပါတယ်။

ဒါပေမယ့် လီဗာပူး တိုက်စစ်မှုးဟောင်း ဖြစ်သူ ဂျွန်အဲရစ်ချ်က ဂိုးမက်ဇ်ရဲ့ ဒဏ်ရာဟာ ပြင်းထန်သည် ဖြစ်စေ မပြင်းထန်သည် ဖြစ်စေ ယာဂန်ကလော့ အနေနဲ့ ဇန်နဝါရီ အပြောင်းအရွေ့ ဈေးကွက်ထဲ မဖြစ်မနေ ဝင်ရောက်တာက လွဲပြီး အခြား ရွေးချယ်စရာ မရှိဘူးလို့ သုံးသပ် သွားပါတယ်။

အဲရစ်ချ်က “ကျွန်တော်တို့မှာ ဗဟို ခံစစ်ကို ကောင်းကောင်း ဖြည့်ကစား ပေးနိုင်တဲ့ ကစားသမားတွေ ရှိပါတယ်။ လူငယ် ကစားသမား အချို့ကလည်း အားကိုး ရပါတယ်။ သူတို့ကိုတော့ လေးစားမှု ရှိပါတယ်။ ဒါပေမယ့် ဒီရာသီကို ကောင်းကောင်း ကျော်ဖြတ် နိုင်ဖို့ အတွက် ကျွန်တော်တို့မှာ အတွေ့အကြုံ ဆိုတာ လိုအပ် ပါတယ်။ ဗဟို ခံစစ်ဟာ လီဗာပူးရဲ့ ရည်မှန်းချက်တွေကို ကောင်းကောင်း ဒုက္ခပေး နိုင်တဲ့ နေရာ တစ်ခု ဖြစ်ပါတယ်။

ကျွန်တော်တို့ရဲ့ ကွင်းလယ် နဲ့ တိုက်စစ်မှာ အရင်းအမြစ်တွေ ကြွယ်၀ နေပေမယ့်လည်း ဗဟို ခံစစ် နေရာ ကတော့ သိပ်ပြီး အခြေအနေ မကောင်းပါဘူး။ ကျွန်တော် ကတော့ လီဗာပူးတို့ ဇန်နဝါရီ အပြောင်းအရွေ့မှာ မဖြစ်မနေ ငွေကြေး သုံးစွဲ ရတော့မယ်လို့ ထင်ပါတယ်။ မာတစ် ကိုလည်း လေးစားပါတယ်။ ဒါပေမယ့် သူဟာ ဒဏ်ရာ ပြသနာတွေနဲ့ ပက်သက်ပြီး ကောင်းမွန်တဲ့ မှတ်တမ်း မရှိခဲ့ပါဘူး။

ကျွန်တော်တို့မှာ ဗဟိုခံစစ်မှာ ကစား ပေးနိုင်တဲ့ ဖာဘင်ညိုလည်း ရှိပါတယ်။ ပြီးတော့ ဟန်ဒါဆန် နဲ့ ဝိုင်နယ်ဒန် တို့ကလည်း ဒီနေရာကို ဖြည့်ကစား ပေးနိုင်ပါတယ်။ ဒါပေမယ့် သူတို့ဟာ ဒီနေရာမှာ အကြိမ် အနည်းငယ်သာ ကစား ခဲ့ဖူးပါတယ်။ သူတို့ဟာ ကောင်းကောင်း လုပ်နိုင်ပါတယ်။ လူငယ် ကစားသမားတွေ ကလည်း အရမ်းကောင်း ပါတယ်။ ဒါပေမယ့် သူတို့ဟာ ကာလရှည် အားကိုးရဖို့ အတွက် လုံလောက်မှု ရှိရဲ့လား? ကျွန်တော် မသိပါဘူး။

ကျွန်တော် ကတော့ ကလော့ အနေနဲ့ ဇန်နဝါရီမှာ အပြောင်းအရွေ့ ဈေးကွက်ထဲ မဖြစ်မနေ ဝင်သွားလိမ့်မယ်လို့ ထင်ပါတယ်။ ဂိုးမက်ဇ် ဒဏ်ရာ မရမီ ကတည်းက ဒါကို သူသိ ခဲ့မှာပါ။ ဒါဟာ အရမ်းကို ရှည်လျားတဲ့ ရာသီ ဖြစ်ပါတယ်။ ဒါပေမယ့် တိုက်စစ်ပိုင်းမှာ ကျွန်တော်တို့ ပိုင်ဆိုင် ထားတဲ့ အရာ ကတော့ လီဗာပူးဟာ သူတို့ရဲ့ တိုက်စစ် စွမ်းအားနဲ့ အသင်း အများစုကို စိုးရိမ် ထိတ်လန့်စေတဲ့ အစွမ်း ရှိနေတာပါ။” လို့ ပြောသွား ပါတယ်။

နိုင်ငံတကာ ပွဲစဉ်တွေ အပြီးမှာ လီဗာပူးဟာ ပုံစံကောင်း ပြသနေတဲ့ လက်စတာကို အန်ဖီးမှာ လက်ခံ ကစား သွားရမှာ ဖြစ်ပြီး သေချာတာ ကတော့ စိတ်လှုပ်ရှားစရာ ပရီးမီးယားလိဂ် ပွဲကောင်း တစ်ပွဲ ဖြစ်လာမှာပါ။ မာတစ်ဟာ ဒီပွဲစဉ်မှာ သေချာပေါက် ပါဝင် ကစား သွားမှာ ဖြစ်ပြီး ဖာဘင်ညို ကတော့ မရေမရာ ဖြစ်နေကာ အဲရစ်ချ်က ကလော့ အနေနဲ့ ဗဟို ခံစစ်မှာ မာတစ်နဲ့ အတူ အတွေ့အကြုံ ကြွယ်ဝတဲ့ ဟန်ဒါဆန်ကို ထားကာ ရင်ဆိုင် သွားနိုင်တယ်လို့ ယူဆ နေပါတယ်။

အဲရစ်ချ်က “လီဗာပူးဟာ နိုင်ငံတကာ ပွဲစဉ်တွေ အပြီးမှာ ဒီအချိန် အကောင်းဆုံး ပုံစံကို ရရှိနေတဲ့ ဂျေမီဗာဒီ နဲ့ ရင်ဆိုင် သွားရမှာပါ။ ကလော့ အနေနဲ့ ဒီပွဲမှာ လူငယ်တွေကို အသုံးပြု သွားမလား? ဒါမှမဟုတ် ဂျော်ဒန်ကို ခံစစ်ကို ဆင်းကစား စေမလား?

ကျွန်တော် ကတော့ အတွေ့အကြုံ ရှိတဲ့ ဂျော်ဒန်ကို ဆင်းကစား စေချင်ပါတယ်။ ဗာဒီဟာ လုံးဝကို တောက်ပ နေပါတယ်။ ဒါဟာ အနည်းငယ်တော့ စိုးရိမ်စရာ ကောင်းပါတယ်။ ဒါပေမယ့် တိုက်စစ်ပိုင်း မှာတော့ လီဗာပူးဟာ လက်စတာထက် အများကြီး သာပါတယ်။

မာတစ်ကို ဘယ်သူနဲ့ တွဲဖက် စေမလဲ ဆိုတာ မှန်းရခက်ပါတယ်။ ဗာဒီရဲ့ ကစားဟန် အရ လူငယ် ကစားသမားတွေကို အသုံးပြု သွားမယ် ဆိုရင် သူတို့ အတွက် ခက်ခဲမှု ရှိစေ နိုင်ပါတယ်။ သူ့ရဲ့ hold-up play ၊ လူကျွံထောင်ခြောက်ကို ဖောက်ထွက် ပြေးတဲ့ ပုံစံ ၊ ဗဟို ခံစစ် ကစားသမားတွေကို တောင်ပံ ဆွဲထုတ် ကစားဟန် တွေဟာ လူငယ်တွေ အတွက် ခက်ခဲမှာပါ။ သူဟာ ဒီလို အရာတွေ လုပ်ရာမှာ အရမ်း ကောင်းပါတယ်။ သူဟာ အင်္ဂလန်ရဲ့ အကောင်းဆုံး တိုက်စစ်မှုး တစ်ဦးလည်း ဖြစ်ပါတယ်။ သူ့ရဲ့ ကစားဟန်ဟာ ဒီအချိန်မှာ ဟယ်ရီကိန်းထက်တောင် ကောင်းပါတယ်။” လို့ ပြောလိုက်ပါတယ်။