ဘာစီလိုနာအသင်းအနေဖြင့် နည်းပြဖြစ်သူ ရော်နယ်လ်ကိုးမန်းကို ထုတ်ပယ်ရန် ဆွေးနွေးနေခြင်းမရှိသလို ၎င်းအား ထုတ်ပယ်ရန် အဓိကအဟန့်အတားမှာ ငွေကြေးမဟုတ်ကြောင်း ဒုဥက္ကဋ္ဌဖြစ်သူ ရိုမီအူက ပြောကြားခဲ့သည်။
ဘာစီလိုနာအသင်းသည် အင်္ဂါနေ့က ယှဉ်ပြိုင်ကစားသည့် ချန်ပီယံလိဂ်အဖွင့်ပွဲစဉ်တွင် ဘိုင်ယန်မြူးနစ်အသင်းအား အိမ်ကွင်း၌ သုံးဂိုးပြတ်ရှုံးနိမ့်ခဲ့သည်။ ယင်းပွဲအပြီးတွင် ဘာစီလိုနာအသင်းဥက္ကဋ္ဌ လာပေါ်တာအပါ အဝင် ဘုတ်အဖွဲ့ဝင်များ နံနက် ၂ နာရီဝန်းကျင်အထိ အစည်းအဝေးပြုလုပ်ခဲ့သဖြင့် ရော်နယ်လ်ကိုးမန်းကို ရာထူးမှထုတ်ပယ်ဖွယ် ရှိနေကြောင်း သတင်းများ ထွက်ပေါ်လာခဲ့သည်။ သို့သော် ၎င်းအား ထုတ်ပယ်ပါက ပေးရမည့်လျော်ကြေးမှာ ဘဏ္ဍာရေးအကျပ် အတည်းရင်ဆိုင်နေရသည့် ဘာစီလိုနာအတွက် အဓိကအခက်အခဲဖြစ်ကြောင်း သုံးသပ်မှုများလည်း ရှိနေသည်။
ယင်းသတင်းများနှင့်ပတ်သက်၍ ဘာစီလိုနာအသင်း ဒုဥက္ကဋ္ဌ ရိုမီအူက “ကျွန်တော်တို့ အဲဒီကိစ္စကို ဆွေးနွေးနေတာမဟုတ်ပါဘူး။ ငွေကြေးပြဿနာကလည်း အဓိကရင်ဆိုင်နေရတဲ့ အခက်အခဲတစ်ခုမဟုတ်ပါဘူး။ ဘာမှဖြစ်လာဖို့မရှိပါဘူး။ ဘာမှဖြစ်လာမှာ မဟုတ်ပါဘူး။ ကိုးမန်းက လူကောင်းတစ်ယောက်ပါ။ သူဆက်ရှိနေဖို့ ဥက္ကဋ္ဌနဲ့ ဘုတ်အဖွဲ့က ဆုံးဖြတ်ထားပါတယ်။ ကျွန်တော်တို့က အသင်းကို ပြန်လည်တည်ဆောက်နေတာပါ။ ဒီအခြေအနေမှာ ရှုပ်ထွေးမှုတွေရှိနေတယ်ဆိုတာ ကျွန်တော်တို့ သိပါတယ်။ ဘိုင်ယန်ကို ရှုံးနိမ့်တာက အဆိုးရွားဆုံးအခိုက်အတန့် မှာ အဆိုးဆုံးပြိုင်ဘက်ကို ရှုံးနိမ့်ခဲ့တာပါ” ဟု တုံ့ပြန်ပြောကြားခဲ့သည်။
